«Մենք ենք, մեր սարերը» քանդակն Արցախում կանգնած է` ավելորդ եմ համարում կրկնօրինակը քանդակելը. ԱՇՈՏ ԲԱՂԴԱՍԱՐՅԱՆ

Վերջերս համացանցում ֆեյսբուքյան օգտատերերից Ներսես Խաչատրյանը գրառում էր արել, որտեղ ասվում է, որ նամակով դիմել է կառավարություն՝ Արցախի հիմնական խորհրդանիշներից մեկի՝ «Մենք ենք, մեր սարերը» (Տատիկ-Պապիկ) արձանի` ՀՀ ներկայիս տարածքում ճշգրիտ կրկնօրինակն ունենալու համար: Կառավարությունը տվել է իր համաձայնությունը եւ միաժամանակ առաջարկել, որ արձանի բնօրինակի ճարտարապետը, քանդակագործի ժառանգները նույնպես ներգրավվեն այդ գործին: Այս մասին «Իրավունքը» զրուցեց «Մենք ենք, մեր սարերը» արձանի հեղինակ ՀԽՍՀՄ ժողովրդական արտիստ Սարգիս Բաղդասարյանի որդու` քանդակագործ, Հայաստանի նկարիչների միության անդամ, Հունգարիայի նկարիչների միության անդամ ԱՇՈՏ ԲԱՂԴԱՍԱՐՅԱՆԻ հետ:

— Պարոն Բաղդասարյան, ինչպիսի՞ն է Ձեր կարծիքը «Մենք ենք, մեր սարերը» (Տատիկ-Պապիկ) արձանի` ՀՀ ներկայիս տարածքում ճշգրիտ կրկնօրինակն ունենալու վերաբերյալ:

— Ներսես Խաչատրյանն ինձ գտավ, զանգեց, ես իրեն բացատրեցի ու, կարծես թե, հասկացավ: Դա լրիվ ինքնագործունեություն է, եւ մի հոգու դիմումի ու մյուս հոգու պատասխանի հարց չէ: Մի ժամանակ նավի վրա Սարյանի շատ գործեր են վառվել, թող հիմա նստեն, բոլոր այդ գործերը կրկնեն: Ու սկսեն կրկնություննե՞ր անել... Դուք դա ճի՞շտ եք համարում: Այսօր արցախցիների հետ կապված ավելի շատ հարցեր կան լուծելու, քան քանդակը: Բացի նրանից, որ այդքան ծախսեր է արվելու այդ քանդակը կրկնօրինակելու վրա, ես դրա իմաստը չեմ տեսնում: Այդ քանդակն իր տեղում դրված է: Պետք է պայքարել, որ «Մենք ենք, մեր սարերը» քանդակն այդտեղ մնա, ու ձեռք չտան: Իսկ դա արդեն դիվանագիտական հարց է: Հազար ու մի ձեւեր կարող են գտնել, որ ադրբեջանական կողմը ձեռք չտա ոչ միայն այդ քանդակին, այլեւ Արցախում գտնվող մշակութային մյուս գործերին: Էլ չեմ ասում, որ Շուշիի թանգարանում ահռելի քանակությամբ հայ արվեստի գործեր կան: Այդ թվում` տասնվեց հատ հայրիկիս գործերից, մի հատ՝ իմ գործերից: Էլի եմ ասում՝ այդ քանդակն Արցախում կանգնած է: Ես ավելորդ եմ համարում կրկնօրինակը քանդակելը: Այդ դեպքում եկեք Ավետիք Իսահակյանի քանդակը, որ կա Աբովյան փողոցի վրա, մի հատ էլ դնենք Սայաթ-Նովա փողոցում: Դա անհեթեթություն չի՞... Պետք չէ այդպիսի քայլեր անել եւ դրանով դրդել ադրբեջանցիներին, որ ասեն` հայերը ոչ էլ մտածում են քանդակն այստեղ լինել-չլինելու մասին: Ամեն ինչ տվել են, քանդակն էլ վերացնենք, մեկ է, նորն արդեն դրել են:

ՆՈՒՆԵ ԶԱՔԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝