«Պույ-պույ մկնիկը» թե՛ պատերազմի, թե՛ խաղաղության ժամանակ ընկերության մասին է. առաջնախաղ` «Թատրոն Կայարանում»

«Թատրոն Կայարան»-ում տեղի ունեցավ «Պույ-Պույ մկնիկը» մանկական հեքիաթ-մյուզիքլի առաջնախաղը: Այս առիթով «Իրավունք»-ը զրուցել է ներկայացման բեմադրիչ, ռեժիսոր ՌԻՄԱ ՀՈՎԵՅԱՆԻ հետ:

— «Պույ-Պույ մկնիկը» բեմադրելու գաղափարն ո՞ւմն էր:

— Ներկայացման առաջարկը եղել է «Թատրոն Կայարանի» կողմից, որը համընկել է իմ կարծիքի հետ, որ արժե անդրադառնալ այս գործին: «Պույ-Պույ մկնիկը» շատ գունավոր ու սիրուն հեքիաթ է, որի պակասն այսօր բեմում կար: Հիմա շատ քիչ են անդրադառնում այս գործին:

— Ներկայացման մեջ նոր մոտեցումներ կա՞ն:

— «Պույ-Պույ մկնիկը» ասելով` հանդիսատեսը միանգամից պատկերացնում է մեզ ծանոթ տիպիկ հեքիաթը եւ նաեւ մուլտֆիլմը, որով շատ տպավորված են: Այսինքն` հենց «Պույ-Պույ մկնիկը» միանգամից ասոցավում է մուլտֆիլմի հետ: Իսկ սա նոր մոտեցում է, նոր հերոսներ կան, նոր կերպարներ եւ նոր ասելիքներ: Սա լրիվ ուրիշ հեքիաթ է, իհարկե, հիմնվելով մեզ ծանոթ սյուժեի վրա:

— Երաժշտական մասում էլ կա՞ն փոփոխություններ:

— Մյուզիքլ է, եւ երաժշտությունները, երգերը շատ են այստեղ: Ծանոթ մելոդիաներ այստեղ, ինչ խոսք, կլսենք: Երաժշտությունների հեղինակը շատ տաղանդավոր կոմպոզիտոր Սերգեյ Հովհաննիսյանն է, իսկ բառերի հեղինակը ես եմ: Մի փոքր ծանոթ բաներ, ամեն դեպքում, կտեսնի հանդիսատեսը: Նոր երգեր ունենք, որոնք շատ են:

— «Թատրոն Կայարան» շա՞տ են հաճախում:

— Այո, «Թատրոն Կայարանը» հանդիսատեսի շատ մեծ բանակ ունի: Ներկայացումներն անցնում են լեփ լեցուն դահլիճում: Հուսով եմ, որ հանդիսատեսն այս ներկայացումն էլ կհավանի, ինչպես բոլոր մանկական ներկայացումները, եւ հուսախաբ չեմ անի հենց այդ բանակին, ովքեր սովոր են գալ այստեղ եւ նայել սիրուն, լուսավոր ներկայացումներ:

— Թատրոնի ամանորյա ծրագրում լինելո՞ւ է «Պույ-Պույ մկնիկը»:

— Ամանորյա շատ գունավոր ներկայացումներ կլինեն, բայց «Պույ-Պույ մկնիկը» ամբողջ տարվա համար է:

— Այս հեքիաթի Ձեր իսկ փոփոխած տարբերակի հիմնական ասելիքը ո՞րն է:

— Ներկայացման մեջ շատ հետաքրքիր մտքեր են առաջ քաշվում թե՛ պատերազմի , թե՛ խաղաղության մասին եւ թե՛ պատերազմի, թե՛ խաղաղության ժամանակ ընկերության մասին: Կարծում եմ` սա հիմնական հարցն է, որ ուղիղ կարմիր գծով այսպես գնում է` ընկերությունը` խաղաղության եւ պատերազմի ժամանակ:

ՆՈՒՆԵ ԶԱՔԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝