Ամեն օր գրանցում ենք թույլ երկրաշարժներ մեր տարածաշրջանում, այդ թվում` ՀՀ-ում. Ջերմաստիճանի անոմալ բարձրացումը կա՞պ ունի երկաշարժների հետ

Վերջին ժամանակներում մեր տարածաշրջանին բնորոշ երկրաշարժերն ու հետցնցումները հաճախակի են դարձել, ինչը մեր հանրապետության բնակչության  շրջանում տագնապի ու վախի մթնոլորտ է ձևավորում բնական այս երևույթի նկատմամբ: Երկրաշարժերը տեղի են ունենում  երկրի ընդերքի որոշակի զանգվածում կուտակված կտրուկ  էներգիայի լիցքաթափման արդյունքում, ուղեկցվում երկրակեղևի կտրուկ տատանումներով և ցնցումներով՝ ժամանակի շատ կարճ տևողության ընթացքում  և տատանումների ձևով հաղորդվում մեծ հեռավորությունների վրա։

Թեև ժոողովրդի շրջանում տարածված է այն կարծիքը, որ երկրաշարժերի վտանգն առավել մեծանում է արևոտ ու տաք եղանակի պայմաններում, սակայն մասնագետները վստահեցնում են, որ եղանակային պայմանները որևէ ազդեցություն չեն կարող ունենալ երկրի ընդերքում զարգացող այս երևույթի վրա: «Երկրաշարժը  բնական այն աղետն է, որը կանխատեսել թերևս անհնար է: Չկա այնպիսի գիտություն, որը կարող է ճշգրիտ որոշել երկրաշարժերի առաջացման վայրը կամ ժամը: Մթնոլորտային որևէ երևույթ ինչ-որ կերպ կապ չունի այս բնական աղետի հետ, երկրաշարժեր լինում են թե՛ ձմռանը, թե՛ ամռանը»,-«Իրավունքի» հետ զրույցում ասաց  «Սեյսմիկ պաշտպանության տարածքային ծառայություն» ՊՈԱԿ-ի տնօրեն Սոս Մագարյանը:

-Հնարավո՞ր է արդյոք կանխատեսել ուժեղ երկրաշարժը։

-Ընդհանրապես ո՛չ, կարելի է, օրինակ, տարվա ընթացքում 50 կամ 70 տոկոս հավանականությամբ կանխատեսել հնարավոր երկրաշարժը: Բայց, որ կարողանանք կանխատեսել հնարավոր երկրաշարշի օրը, ժամը, վարկյանը այս պահին անհնար է, ոչ միայն ՀՀ-ում, այլ նաեւ ողջ աշխարհում:

-Այս պահի դրությամբ ինչպե՞ս եք գնահատում ՀՀ սեյսմիկ իրավիճակը, կան մոտալուտ երկրաշարժների հավականություններ:

-Այս պահի դրությամբ, որ ասեմ ունենք անհանգստացմող անոմալիաներ` չունենք: Ամեն օր գրանցում ենք թույլ երկրաշարժներ մեր տարածաշրջանում, այդ թվում` ՀՀ-ում, որի մեծ մասը չի զգացվում բնակչության կողմից: Դրանք ընդամենը գրանցվում են սեյսմոգրաֆները, բայց չեմ կարծում, որ այս պահին անհանգստնալու կարիք կա: Այսինքն ՀՀ–ում ուժեղ կամ աղետալի հնարավոր երկրաշարժերի մասով անհանգստանալու պատճառ չկա։ Ուժեղ ասելով` նկատի ունեմ 5.5 և ավելի մագնիտուդ ուժգնությամբ երկրաշարժերը:

-Ասում են, որ կենդանական աշխարհի ներկայացուցիչները զգու՞մ են մոտալուտ երկրաշարժը, սա ե՞ւս միֆ է, թե՞:
– Կենդանական աշխարհի որոշ ներկայացուցիչներ զգում են մոտալուտ երկրաշարժը, հատկապես կատուները, ձկները, շները, առնետները, օձերը և այլն: Սակայն սա զանգվածային բնույթ պիտի կրի, որ համարվի երկրաշարժի նախանշան:

-ՀՀ, ո՞ր տարածքներն այսօր առավել ռիսկային համարվում հնարավոր երկրաշարժների դեպքում:

-Եփե նկատի ունեք սեյսմիկ վտանգը, ապա մեր ամբողջ տարածաշրջանը սեյսմիկ վտանգի գոտում է, իսկ ռիսկը հիմնվում է վտանգի վրա: Իսկ, եթե առհասարակ վերցնենք, ապա ամենամեծ ռիսկային գոտում Երեւանն է:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝