Նոր մանրամասներ` Մհեր Մկրտչյանին գեղ. ղեկավարի հաստիքի կրճատման համար վիճարկվող դատական առաջին նիստից

Ինչպես արդեն գրել էինք, այս տարվա ամռանը քաղաքապետարանը լուծարել էր «Մհեր Մկրտչյան» արտիստական թատրոնի գեղարվեստական ղեկավարի՝ ռեժիսոր, սցենարիստ Մհեր Մկրտչյանի հաստիքը: Հարցը մինչեւ այսօր վիճարկվում է դատական կարգով: Օրեր առաջ տեղի է ունեցել առաջին դատական նիստը: Այս մասին զրուցել ենք «Մհեր Մկրտչյան» արտիստական թատրոնի նախկին գեղարվեստական ղեկավար, ռեժիսոր ՄՀԵՐ ՄԿՐՏՉՅԱՆԻ հետ:

— Պարոն Մկրտչյան, գեղարվեստական ղեկավարի հաստիքի կրճատման համար դատի էիք տվել «Մհեր Մկրտչյան» արտիստական թատրոնին եւ քաղաքապետարանին: Առաջին դատական նիստն ինչպե՞ս անցավ:

— Հետաքրքիր... Քաղաքապետարանի փաստաբանի ելույթից հետո, կարծում եմ` բոլորը հասկացան, որ լավ եւ նորաձեւ թատրոն ունենալու համար պետք է ընդամենը մեկ բան` չունենալ գեղարվեստական ղեկավարի հաստիք...

— Թատրոնի տնօրենի նախկին Ժ/Պ Մակիչ Մարգարյանը ներկա՞ էր եւ կարողացա՞վ արդարանալ:

— Ո՛չ: Այդ օրը Մակիչ Մարգարյանը թատրոնում փոխքաղաքապետից շնորհակալության խոսքեր էր լսում արած գործի համար:

— Ուրիշ թատրոնից նոր տնօրենի Ժ/Պ, դերասանուհի Տաթեւիկ Մելքոնյանին նշանակելու մասին ի՞նչ կասեք: Դուք կո՞ղմ եք, որ «Մհեր Մկրտչյան» արտիստական թատրոնը ղեկավարի դրսից մեկ ուրիշը:

— Ես հասկացա, որ հարցը ներսի-դրսի մեջ չի: Նույն Մակիչ Մարգարյանը շատ հին ու ներսի մարդ է` դարձավ քաղաքապետարանի նոր չինովնիկների «գերազանցիկ»: Տաթեւիկ Մելքոնյանն ունի հնարավորություն գնալ ճիշտ կամ սխալ, գեղեցիկ կամ ոչ... մի խոսքով` տարբեր ճանապարհներով: Ըստ արած քայլերի, արդեն ձեւավորվում է մնացածը` հարգանքը, ընկալումը, հարաբերությունները... Ուզում եմ ասել, որ կարեւորը տեսակն է, մոտեցումը...

— Թիկունքից հարվածներին ինչպե՞ս եք վերաբերվում:

— Հանգիստ: Ես արդեն 51 տարեկան եմ եւ ունեցել եմ հետաքրքիր կյանք: Դա ինձ արդեն վաղուց չի զարմացնում:

— Երբ հաղթի արդարությունը, եւ վերադառնաք թատրոն, Ձեր առաջին քայլը ո՞րը կլինի:

— Չեմ մտածել առաջին քայլ անելու մասին, որովհետեւ 2015 թվից աշխատել եմ այնտեղ...

ՆՈՒՆԵ ԶԱՔԱՐՅԱՆ