Միայն իշխանափոխությամբ հնարավոր կլինի կատարված հանցանքները մերկացնել. ԽԱՉԻԿ ՄԱՆՈՒԿՅԱՆ

«Իրավունքը» զրուցել է բանաստեղծ, ՀԳՄ անդամ ԽԱՉԻԿ ՄԱՆՈՒԿՅԱՆԻ հետ:

— Երբեւէ Ձեր մտքով կանցնե՞ր, որ Արցախից մեզ մնացած տարածքները մեկ շաբաթում կդատարկվեն, իսկ Ստեփանակերտում Ալիեւը հաղթանակի շքերթ կանցկացնի:

— Սա ծրագրված գործընթաց էր, որն իրականացրին մեր միջի դավաճանների օժանդակությամբ: Բացահայտ, առանց քողարկումների, տարիներ շարունակ՝ մեզանում գործում են լրտեսախմբեր, որոնք ֆինանսավորվելով օտար երկրների կողմից, կատարում են դրանց հրահանգները: Կարծես օրինաչափ է դարձել, որ օտարի շահերը սպասարկողներն անպատիժ կերպով պիտի շարունակեն իրենց ազգադավ գործունեությունը: Հայաստանում իշխանությունը խաբեությամբ զավթածների հին ու նոր հայտարարությունները համադրեք եւ կտեսնեք, թե որքան հակասություններ կբացահայտվեն: Այսպահական գոյանքներին հաջողվել է՝ հանրությանը մոլորեցնելով, ստի եւ կեղծիքի հնարավոր բոլոր հնարքները բանեցնելով, մորթապաշտին բնորոշ վարքով՝ ամեն բան զոհել սեփական բարօրության համար: Քանի դեռ այս շառլատաններն անպատիժ շարունակում են պաշտոնավարել մեր երկրում՝ բոլոր ոլորտներում էլ նահաջն ու պարտությունը անխուսափելի են:

— Այսքանից հետո կարո՞ղ է խոսք գնալ թշնամու հետ խաղաղ ապրելու մասին:

— Եթե մեր միջի թշնամու հետ շարունակում ենք ապրել, ապա արտաքին թշնամին ինչո՞ւ պիտի մերժվի: Ամեն կերպ փորձում են մեզ կտրել մեր արմատներից, մեր ավանդներից: Մեր ինքնությունը հեշտությամբ շրջանցելով` կապկում ենք ուրիշներին: Այնպես, ինչպես հիմա մեզ հետ են վարվում տարածաշրջանի շահառուները, այդպես վարվում են լաբորատորիայի առնետների հետ՝ ներարկեն, քննեն, ձեւախեղեն...

— Որքանո՞վ 44-օրյա պատերազմի մեղավորները, դավաճանները պատժվեցին…

— 44-օրյա պատերազմի գլխավոր մեղավորն իրեն Գերագույն գլխավոր հրամանատար հռչակած ներկա վարչապետն է, ում թիմի քաղաքական խայտառակ պարտության արդյունքում ունեցանք անդառնալի կորուստներ, որոնք հնարավոր է նաեւ մեր պետականության կորուստ հանդիսանան: Ո՛չ, որեւէ լուրջ քայլ չի արվել դավաճաններին բացահայտելու եւ համապատասխան պատժի արժանացնելու համար, եւ կարծում եմ՝ միայն իշխանափոխությամբ հնարավոր կլինի կատարված հանցանքները մերկացնել:

— Հետագայում կունենա՞ք բանաստեղծությունների շարք, որտեղ մեկ առ մեկ կնշեք դավաճանների անունները: Չէ՞ որ մնայուն գործը փոխանցվում է որպես պատմական փաստ սերունդներին: Եթե նրանք պետականորեն չպատժվեն, միգուցե պատժվեն հետագա սերունդների կողմից դավաճանի խարանո՞վ:

— Դավաճաններին անուն առ անուն մերկացնելը իրավաբանական գործընթաց է, իսկ գեղարվեստորեն վաղուց տվել եմ այս թավշյա խաբեբաների գնահատականը: Սրանց կատարածը սովորական հանցանք չէ, սա հայոց պատմության մեջ եզակի երեւույթ է, եւ սերունդները, վստահաբար, դավաճանի խարանն են դաջելու ազգ ու հայրենիք կործանած այս ստակոլոլ գոյանքների ճակատին:

— Ձեր որդին՝ Վաչագանն ու մյուս մեր քաջերն անմահացան 44-օրյա պատերազմում, որ այսօր մի ստորագրությամբ Արցախը հանձնվի՞:

— Այսօր էլ այդ քաջերն են զսպում թշնամուն` լայնածավալ ռազմական գործողություններից խուսափելու համար: Նրանց տված դասը Բաքվի բռնապետը չի մոռանա: Հզոր արսենալով, վարձկաններով ու դաշնակիցներով հարձակվելով մի բուռ Արցախի վրա, չկարողացավ ծնկի բերել, եւ մեր զավակների կյանքի գնով պահպանված տարածքներն այս պարտության սիմվոլները հեշտորեն հանձնեցին եւ շարունակում են հանձնել:

— Ի՞նչ կասեք նրանց մասին, ովքեր ասում են` Արցախն Ադրբեջան է:

— Այո, կան այդպիսի գոյանքներ՝ անազգ, անհայրենիք: Դրանց լափը տեղը պահիր, եւ աշխարհից այլ բան չեն ուզի:

— Ներկա պահին ի՞նչ ստեղծագործական պրոցեսի մեջ եք:

— Շատ նոր նյութեր են հավաքվել Վաչագանի սխրագործություններին անդրադարձող՝ ե՛ւ գեղարվեստական, ե՛ւ փաստագրական: Հիմա սկսում եմ կազմել «Ազգային հերոսը» երկրորդ գիրքը, որտեղ նոր բացահայտումներ եւ գնահատականներ կներկայացվեն: Այնուհետեւ, որքան էլ ստեղծագործական մթնոլորտից դուրս ենք մղվել, միեւնույնն է, փորձելու եմ տպագրության ներկայացնել բանաստեղծություններիս հերթական հատորը:

ՆՈՒՆԵ ԶԱՔԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝