Վանաձորի թատրոնում տեղի կունենա առաջնախաղ՝ նվիրված Վիլյամ Սարոյանի 115-ամյակին

Վանաձորի Հովհաննես Աբելյանի անվան պետական դրամատիկական թատրոնում նոյեմբերի 22-ին տեղի կունենա առաջնախաղ՝ Վիլյամ Սարոյանի «Ոստրեն ու Մարգարիտը» մեկ գործողությամբ դրաման։ Այն նվիրված է Վիլյամ Սարոյանի 115-ամյակին։ Բեմադրիչը Արեն Օսիպյանն է, զգեստները եւ նկարչական ձեւավորումն իրականացրել է Սարգիս Մանուկյանը, կոմպոզիտորը Գոռ Թադեւոսյանն է, թարգմանությունը կատարել է Էլֆիք Զոհրաբյանը, հնչյունային օպերատորը Սեդրակ Զարգարյանն է, լուսային ձեւավորումը կատարել են Աշոտ Գեւորգյանը եւ Դավիթ Գալստյանը, իսկ պլաստիկ լուծումները հեղինակել է Արման Սաքանյանը:

Նշենք, որ դերերում ներգրավված են Սարգիս Ավետիսյանը (Հարրի Վան Դյուսե), Սարգիս Ալեքյանը (Քլեյ Լարրաբի), Մարիամ Ղեւոնդյանը, Նոնա Սաֆարյանը (Վիվիեն Մըքքաչիըն), Վահրամ Խառատյանը, Արթուր Պապիկյանը (Քլարք Լարրաբի), ՀՀ վաստակավոր արտիստ Հայկ Թորոսյանը (տղամարդ-գրող), Համլետ Գյուլզադյանը, Էլֆիք Զոհրաբյանը (դատավոր Էփլգարթ), Արման Սաքանյանը (Ուոզզեք), Էդգար Բարսեղյան (սպասարկող), Դավիթ Պողոսյանը (Քլեյի ընկեր Գրիլի), Վազգեն Բադալյանը (Քլեյի ընկեր Ռոքի):

«Ոստրեն ու Մարգարիտը» պիեսի հիմքում ընկած է ընտանիքի պահպանման խորհուրդը: Ընտանեկան դժվարին իրավիճակը գրողը ներկայացնում է Քլարքի որդի պատանի Քլեյի զգացմունքների ու ապրումների միջոցով: Անհոգ երեխան բախվում է կյանքի դժվարությանը: Նրան անհայր մնալու վտանգն է սպառնում, եւ մոռանալով իր մանկական խաղերն ու անհոգությունը՝ երեխան մտածում է միայն հորը տուն վերադարձնելու մասին: Սարոյան գրողի բարությունը չէր կարող անհայր թողնել փոքրիկ հերոսին: «Ոստրեն ու մարգարիտը» համարվում է «հույսի գրականության» լավագույն սիմվոլիստական գործերից:

Վանաձորի Հովհաննես Աբելյանի անվան պետական դրամատիկական թատրոնից տեղեկացնում են, որ «Ոստրեն ու Մարգարիտը» ներկայացումը լինելու է թատրոնի խաղացանկում։ Այն նաեւ կներկայացվի Երեւանում։ Ներկայացումն իրականացվում է Երեւանի քաղաքապետարանի ֆինանսավորմամբ։ «Թատրոնի համաշխարհային օրվան ընդառաջ՝ Երևանի քաղաքապետարանն իրականացրել է «Թատերական Երեւան» խորագրով դրամաշնորհային մրցույթը։ 23 հայտ էր ներկայացվել, ընտրվել էր 9-ը։ Ընտրված թատերական նախագծերից էր Վանաձորի դրամատիկական թատրոնի «Ոստրեն եւ Մարգարիտը» ներկայացումը։ Պրեմիերային՝ նոյեմբերի 22-ին, թատրոնի ճեմասրահում նաեւ սարոյանական ցուցադրություն է լինելու։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝