Իշխանությունը բացահայտ ցույց է տալիս, որ այլեւս չի հանդուրժելու որեւէ քննադատություն իր հասցեին. Արսեն Բաբայան

Արցախյան 44-օրյա պատերազմում զոհված Գեւորգ Վիրաբյանի կալանավորված քրոջ` Տաթեւիկ Վիրաբյանի առողջական վիճակը խցում կտրուկ վատացել էր: Հիշեցնենք՝ Տաթեւիկ Վիրաբյանին ներկայացվել է զանգվածային անկարգության կոչեր հնչեցնելու եւ այդ անկարգություններին մասնակցելու մեղադրանք: Նրա նկատմամբ դատավոր Մանվել Շահվերդյանը կիրառել է 2 ամիս կալանք: Այս մասին «Իրավունք»-ը զրուցել է փաստաբան ԱՐՍԵՆ ԲԱԲԱՅԱՆԻ հետ:

—  Ինչպե՞ս է գնահատվում այս պահին Տաթեւիկ Վիրաբյանի առողջական վիճակը, ի՞նչ տեղեկություններ ունեք:

— Տաթեւիկ Վիրաբյանը գտնվում է քրեակատարողական հիմնարկում, կալանքի փակ ռեժիմում, օրվա մեջ ունի 1 ժամ զբոսնելու համար: Առողջական վիճակը այս պահին կայուն է, նա գտնվում է բժիշկների մշտական հսկողության տակ:

— Որքանո՞վ են իշխանությունների գործողություններն իրավաչափ: Արդյոք Տաթեւիկ Վիրաբյանի նկատմամբ իրականցվում է քաղաքական հետապնդում:

— Այո՛, սա քաղաքական հետապնդում է, Տաթեւիկ Վիրաբյանն անազատության մեջ գտնվող միակ կին քաղբանտարկյալն է: Իրավաչափ չէ ընդհանրապես կալանքի տակ պահելը, թեկուզ հենց քրեական դատավարության իրավունքի իմաստով, որովհետեւ կալանքի համար հիմքերը ամբողջությամբ բացակայում են, բացի այդ, ձերբակալությունը տեղի է ունեցել ապօրինի: Եվ այս ամենի շրջանակներում մենք բողոքարկել ենք կալանքի որոշումը Վերաքննիչ դատարանում: Հոկտեմբերի 19-ին պետք է հրապարակվի Վերաքննիչ դատարանի որոշումը:

— Ի՞նչ սպասել Վերաքննիչ դատարանի որոշումից:

— Հաշվի առնելով, թե ով է դատավորը, մի քիչ թերահավատ եմ, որ իրական արդարադատություն կիրականացվի, խոսքը Ռուբիկ Մխիթարյանի մասին է, բայց այդուամենայնիվ, հույսը չկորցնենք ու սպասենք դատարանի որոշմանը: Իսկ ինչո՞ւ եմ այսպես անում, շատ պարզ պատճառով: Իշխանությունը բացահայտ ցույց է տալիս, որ այլեւս չի հանդուրժելու որեւէ քննադատություն իր հասցեին, իշխանությունն ունի միջազգային լայն աջակցություն` կապված վերջին զարգացումների հետ` հաշվի առնելով այն կանխավարկածը, որ կարծես միջազգային հանրությունը հենց հակված էր այդպիսի լուծման եւ, բնականաբար, միջազգային հանրությունը նման ապօրինությունների, քաղաքական հետապնդումների վրա աչք է փակում: Ուստի` իշխանությունն ամենաթողության մակարդակում իր հարցերը երկրի ներսում լուծում է այնպես, ինչպես կցանկանա: Այսինքն՝ քաղաքացիներին, որոնք իրացնում են իրենց իրավունքները, բողոքի ակցիաներ, զանգվածային ակցիաներ, այլ դժգոհություններ են իրականացնում, ուղղակի փակելով զնդանում` հասարակության մյուս մասին ցույց են տալիս, որ հանկարծ մտքներովդ չանցնի բողոքել նիկոլյան իշխանության դեմ, այս իշխանությունն ինչ ուզի, կանի, որովհետեւ ունի միջազգային հանրության աջակցությունը, ցավոք սրտի, միջազգային հանրությունն էլ այդ հնարավորություններն այս իշխանությանը տալիս է:

— Այդ դեպքում ու՞ր են ժողովրդավարության սկզբունքները, որոնց մասին այդքան խոսում են բարձր ամբիոններից:

— Ոչնչացվել են, այս իշխանության կողմից ժողովրդավարական բոլոր հնարավոր կառուցակարգերը ոչնչացված են, դրանք մնացել են միայն գեղեցիկ ելույթների համար, իսկ դրա հիմքում աշխատանքը , որ իրականացնում են, ամբողջությամբ հակասում է ժողովրդավարության բոլոր հայտնի ու անհայտ կանոններին:

— Նման կերպ հնարավո՞ր է լռեցնել այն քաղաքացիներին, ակտիվիստներին , ովքեր իրոք մտահոգ են այն ամենից, ինչ կատարվում է երկրում: Արդյո՞ք սրանով էլ ավելի չեն գրգռի նրանց:

— Գիտեք, իրենք փորձում են զսպել դժգոհության այդ ալիքը, ես օբյեկտիվորեն չեմ բացառում, որ որոշ դեպքերում դա կստացվի իրենց մոտ, մասնավորապես անչափահաս կամ նոր 18 տարեկանը լրացած տղաների ընտանիքներում, որոնք ուղղակի կուզենան գլուխները ազատել այս տեսակ դժվարություններից , հնարավոր է որոշ դեպքերում սա ազդի այդ մարդկանց վրա: Բայց ակնհայտ է, եւ մենք տեսնում ենք, որ հիմնական դժգոհություն ունեցող հատվածի վրա այս կերպ հնարավոր չէ ազդեցություն ունենալ, մանավանդ Հայաստանում, կարծես թե քիչ են մնացել մարդիկ, ովքեր բանտարկությունից կվախենան: Քրեական պատասխանատվությունը, որ պետք է  լուրջ զսպող միջոց լինի անձի վատ վարքը կանխելու, տպավորություն է, որ դարձել է սովորական: Վստահ եմ, որ այս տեսակ միջոցները, որ իրականացվում է, բերելու է , այո՛, հասարակության էլ ավելի ընդվզման ու հասարակությունը շատ ավելի ագրեսիվ գործողությունների կարող է դիմել: Բայց սրա մասին թող իրենք մտածեն, թող իրենց գործողություններին հաշիվ տան, որովհետեւ, ի վերջո, ապագայում իրենք էլ պատասխան են տալու այս ամեն ինչի համար:

— ՄԻՊ-ին դիմել էիք կալանքի տակ գտնվող Տաթեւիկ Վիրաբյանի առողջական վիճակի հետ կապված: Ի՞նչ արձագանք եք ստացել, առհասարակ ինչպիսի՞ն պետք է լիներ ՄԻՊ-ի գործողությունները այս կալանավորումների հետ կապված:

— Բարեբախտաբար ՄԻՊ-ի հետ աշխատքնը վերջին, սեպտեմբերի 19-20-ի իրադարձություններով, բարեհաջող ստացվում է եւ անհրաժեշտության դեպքում արագ արձագանք եմ ստանում: Արագ արձագանքման շրջանակներում, կարող եմ ասել, որ գոհացուցիչ աշխատանք է  իրականացվում: Կարծում եմ` անհրաժեշտ է  առնվազն այս կալանավորումներին արձագանքել: ՄԻՊ-ը պետք է արձագանքի, հաշվի առնելով, որ մենք բազմաթիվ այլընտրանքային խափանման միջոցներ ունենք: Խափանման միջոց կալանավորումները կիրառվում են առանց այլընտրանքային միջոցների հնարավորությունները հաշվի առնելու, եւ դրանք արձանագրված են դատական ակտերում: Այս պահին չունենք, բայց հույս ունեմ, որ ապագայում կունենանք ՄԻՊ համապատասխան զեկույցը կամ հորդորը, որ իսկապես կալանքը դարձել է մահակ, իսկապես կալանքը կիրառվում է, որպես պատիժ, որովհետեւ այս բոլոր գործերում, երբ ուսումնասիրում ես նյութերը, տեսնում ես, որ կալանքը ոչ թե խափանման միջոց է կիրառվել, այլ , որպես պատժիչ գործողություն: Մենք դեպք ունենք նույնիսկ, որ 18 տարեկան արցախցու մորն են պատժում` թույլ չտալով տեսակցել իր որդուն :Ակնհայտ է, որ մայրը, ով 9 ամիս գտնվել էր շրջափակման մեջ, որեւէ կերպ չի կարող ազդեցություն ունենալ նախաքննության վրա, բայց չէ, հաշվի առնելով, թե ինչումն է մեղադրվում եւ ինչ գործողություններում եւ ո՞ւմ դեմ է դժգոհում 18-ամյա Մարատ Հակոբյանը, իշխանությունը պատժում է նաեւ նրա մորը` թույլ չտալով տեսակցել որդուն:

Ս. ԱՍԱՏՐՅԱՆ