Զավեշտ է, մեղադրում են ՔՊ-ի հետ գործարքի գնալու մեջ, երբ կալանքի տակ են դեռեւս կուսակցության 10 անդամ, այդ թվում՝ ես ու որդիս. Գալստյան

«Իրավունքի» հարցերին պատասխանել է Նուբարաշեն ՔԿՀ-ում գտնվող «Հանրային Ձայն» կուսակցության նախագահ, Երեւանի ավագանու համանուն խմբակցության նորընտիր անդամ ԱՐՏԱԿ ԳԱԼՍՏՅԱՆԸ:

— Ձեր կնոջ խափանման միջոց կալանքի փոփոխությունը որոշ, այսպես ասած, ընդդիմադիր գործընկերների կողմից մեկնաբանվեց, թե այն տեղի ունեցավ իշխանություն-«Հանրային Ձայն» գործարքի շնորիվ, հատկապես որ սա համընկավ Տիգրան Ավինյանի ընտրության հետ: Ի՞նչ կասեք այս մասին:

— Ցավում եմ այդ ընդդիմադիր գործիչների եւ նրանց ունեցած արժեհամակարգի համար։ Երբ ընտրությունների նախաշեմին շինծու գործերով կալանավորվեցի ես, ընտանիքիս անդամները, կուսակիցներս, գրեթե բոլորը ենթարկվեցին ֆիզիկական եւ հոգեբանական խոշտանգման, ոչ ոք այդ խնդրին չանդրադարձավ։ Ընդհակառակը՝ ընդդիմադիր մեդիա ռեսուրսը հաճույքով օրը երեք-չորս անգամ տարածում էր ՔԿ-ի հրապարակած մեզ վարկաբեկող ռելիզները։ Չարձագանքեցին նաեւ այն ժամանակ, երբ ես հաղորդում ներկայացրի եւ հանրայնացրի այն, որ մեզնից պահանջում են չմասնակցել ընտրություններին։ Այժմ, երբ կնոջս չորս ամիս ապօրինի կալանքի տակ պահելուց, որեւիցե քննչական գործողություն չանելուց հետո փոխվել է դատարանի կողմից նրա միայն խափանման միջոցը, Ձեր ասած, ընդդիմադիրներն աղմուկ են բարձրացրել՝ այն էլ այն դեպքում, երբ դեռևս կալանքի տակ են կուսակցության 10 անդամներ, այդ թվում` ես ու որդիս։ Զավեշտն այն է, որ հինգ տարի այս իշխանության հետ համագործակցող, սեւ ու սպիտակով նրանց իշխանությունը պահողները, մեզ՝ բանտերում գտնվողներիս, մեղադրում են ՔՊ-ի հետ գործարքի գնալու մեջ։ Ասեմ նաեւ, որ մեր բոլոր կուսակիցներն են արդարացվելու՝ ոչ թե Ավինյանին դեմ քվեարկելու համար, այլ որովհետեւ անմեղ են եւ քաղհալածյալ:

— Հանրության շրջանում մինչեւ հիմա էլ «մութ է մնացել»՝ «Հանրային Ձայն» խմբակցության ավագանու անդամները, քաղաքապետի ընտրությանը մասնակցելով, բայց դեմ քվեարկելով` ինչպե՞ս ապահովեցին Տիգրան Ավինյանի ընտրվելը, ինչի մասին պնդում են «Մայր Հայաստան»-ից ու «Ազգային առաջընթացից»:

— «Հանրային Ձայնն» իր որոշումներն ընդունում է առանց էմոցիաների` միմիայն քաղաքական նպատակահարմարությունից եւ ժողովիդի շահերից ելնելով։ ՔՊ-ն, նույնիսկ «Հանրապետության» հետ դաշինքով, ընտրության արդյունքներով իշխանազրկվեց Երեւանի ավագանիում եւ առանց ընդդիմության՝ չի կարող ընդունել որեւիցե որոշում։ Արձանագրվեց նաեւ, որ ՔՊ-ն կորցրել է իր լեգիտիմությունը Երեւան քաղաքում։ ՔՊ-ի թիկունքը ընդդիմադիր դաշտի անվան տակ պահող ուժերն էլ զրկվեցին միակ «ընդդիմադիրը» լինելու մենաշնորհից։ Այլ կերպ ասած՝ յոթ մանդատով «Հանրային Ձայնի» մուտքն ավագանի դրեց ներկա-նախկին կամ սեւ ու սպիտակ երկիրը կործանող խաղի վերջի սկիզբը: Այս պարագայում, տալ հնարավորություն ՔՊ-ին` նոր ընտրություններով շտկել իրավիճակը, մեր կողմից կլիներ հիմարություն եւ մեծ նվեր իշխանությանը։ Նոր ընտրությունն ամենաշատը ՔՊ-ին էր պետք, որ վարչական ռեսուրսի կիրառմամբ եւ տոտալ բռնաճնշումներով շտկի վերը նկարագրված իրենց համար խայտառակ իրավիճակը: Մենք, բոյկոտին չմասնակցելով, դա ենք կանխել, եւ սա ճիշտ որոշում էր։ Բացի այդ, սահմանային այս իրավիճակում, 100 հազար փախստականների առկայության դեպքում՝ պետությունը նոր ընտրությունների տանելը հարված է ՀՀ-ին թիկունքից։

— Հիմա Դուք ինչպե՞ս եք վարվելու Ձեր մանդատի հետ, շարունակելո՞ւ եք պահպանել, թե՞, այնուհանդերձ, վայր եք դնելու:

— Մանդատը դեռ պահելու եմ, հետո երբ կլինեմ ազատության մեջ, կորոշեմ։

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝