«Իմ ապրումներն են ներդրված իմ ողջ ստեղծագործության մեջ». Հակոբ Հակոբյանի հոբելյանական 100 ամյակի նկարների ցուցադրությունը

Հայաստանի ազգային պատկերասրահում տեղի ունեցավ նկարիչ Հակոբ Հակոբյանի հոբելյանական 100-ամյակին նվիրված նկարների ցուցահանդեսը։  Ներկայացված են նկարչի ստեղծագործական հարուստ ժառանգությունները, գեղանկարչական և գրաֆիկական գործեր,  քանդակներ Հայաստանի ազգային պատկերասրահի, ժամանակակից արվեստի թանգարանի, ընտանիքի և մասնավոր հավաքածուներից։ Ցուցահանդեսի համակարգող Մարգարիտա Խաչատրյանը նշեց, որ հետաքրքրական է հեղինակի եգիպտական շրջանի մարգինալացված մարդու  կերպարը, որը ամբողջովին փոխվում է հայրենադարձվելուց հետո։ 1962 թվականին 40 տարեկան հասակում նկարիչը հաստատվում է Հայաստանում։ 
Կարոտի, երազի և ինքնաճանաչողության փնտրտուքների շրջանում նա կարողանում է գտնել  իրեն, և նա այն բախտավոր արվեստագետներից է, որի արվեստն ընկալվեց և ճանաչվեց ինչպես հարկն է։ 
1970-80-ական թվականներին նկարիչը  մանեկենների, անմարմին հագուստների քանդակային աշխատանքների շնորհիվ կարողացավ անշունչ առարկաներին, աշխատանքային գործիքներին նոր շունչ հաղորդել և պատկերել իր կտավներում։ 
— Մշակույթն ու արվեստը այն կարևորագույն լծակն է, որոնց միջոցով մենք կարող ենք զարթոնք ապրել, հաղթանակ տանել  և պայքարել։ Հենց մշակույթի միջոցով է հնարավոր ճանաչել ինքներս մեզ, և պատահական չէ, որ ցուցահանդեսի գլխավոր նկար է ընտրվել նկարչի «Մարդը և բույսը» նկարը։ Այն արդիական է այսօր, քանի որ այն ոչ թե կոնկրետ կերպար է և բույս, այլ խորհրդանշում է մարդու և բնության, մարդու և կյանքի փոխհարաբերությունները։ Հատկապես այսօր մենք պետք է մեծագույն պատասխանատվությամբ մոտենանք մարդկանց հետ փոխհարաբերություններին, մեր և շրջակա աշխարհին, մեզ և բնությանը,– ասաց պատկերասրահի տնօրեն Մարինա Հակոբյանը։
Հակոբ Հակոբյանը կարողացել է գեղարվեստական միջավայրում իր  ուրույն գունամտածողության ոճականության և գեղագիտական սկզբունքները ներմուծել, որոնք ընդունվել և հաստատվել են հայրենական մշակութային դաշտում` ձևավորելով յուրօրինակ, հակոբյանական պատկերային մտածողություն։

Անժելա Սեդրակյան

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝