Չպետք է բացառել, որ հնարավոր մասշտաբային գործողությունների համար նոր դաշտ կձեւավորվի. Աբրահամյան

ԱԺ «Պատիվ ունեմ» խմբակցության քարտուղար ՏԻԳՐԱՆ ԱԲՐԱՀԱՄՅԱՆԻ գնահատմամբ` Ադրբեջանի քաղաքական ախորժակը, հատկապես Արցախի հետ կապված այսպիսի հանգուցալուծման պայմաններում, էականորեն բարձրացել է։

— Ադրբեջանը փորձում է օգտվել ստեղծված իրավիճակից, քաղաքական, ռազմական առավելությունից, ինչպես նաեւ հաշվի առնելով Հայաստանի եւ Ռուսաստանի միջեւ ձեւավորված խիստ լարված հարաբերությունները, ստանալ ավելին: Կարծում եմ` Ադրբեջանը երկու խնդիր է փորձում այս պահին լուծել` Թուրքիային դարձնել Հայաստան-Ադրբեջան հարաբերությունների գործընթացի լիարժեք մաս, դրանով ավտոմատ կերպով ավելացնել Թուրքիայի ազդեցությունը Հարավային Կովկասում: Երկրորդ` Ադրբեջանն այս պահին փորձում է վերանայել նաեւ իր մոտեցումները,  պահանջները, որոնք 44-օրյա պատերազմից հետո ձեւավորվել ու ներկայացվել են Հայաստանի իշխանություններին: Արցախում ստեղծված այս իրավիճակից հետո Ադրբեջանը կարծում է, որ իր հնարավորությունները եւ իր պահանջների ծավալը կարող է մեծացնել: Սա երկու տեսանկյունից մեզ համար սպառնալիքներ է ստեղծում: Առաջինը` հասկանալի է, որ բանակցային գործընթացում ճնշումներն էական մեծանալու են, երկրորդը` ակնհայտ է, որ սա ադրբեջանական քաղաքականությանը հարիր ձեւով ուղեկցվելու է նաեւ ուժի կիրառման սպառնալիքներով: Այս իրավիճակում չպետք է բացառել, որ առաջիկա ժամանակահատվածում հնարավոր մասշտաբային գործողությունների համար նոր դաշտ կձեւավորվի:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝