Աշխարհի լռության պայմաններում` 21-րդ դարում կրկնվեց ցեղասպանություն հայ ազգի նկատմամբ. Դավիթ Համբարձումյան

Մեծ թվով արցախցիներ ապաստան են գտել Մասիսում, ըստ նախնական տվյալների, նրանց թիվը հատում է 6700-ը: Ինչ է կատարվում համայնքում, «Իրավունքը» մանրամասներ է պարզել Մասիսի քաղաքապետ, ՀՀԿ-ական ԴԱՎԻԹ ՀԱՄԲԱՐՁՈՒՄՅԱՆԻՑ:

— Պարոն քաղաքապետ, ի՞նչ իրավիճակ է Մասիսում, եւ արդյոք ռեսուրսները բավարարում են այդքան արցախցիների տեղավորելու համար:

— Համայնքապետարանն իր ամբողջ կազմով աշխատում է` առանց հանգստյան օրերի, որպեսզի մեր արցախցիների հոգսերը փորձենք թեթեւացնել: Հիմնականում համայնքապետարանի բյուջեից չենք կազմակերպում օգնությունները, այլ մեր շրջապատի, մեր ընկերների, Մասիս համայնքում գործող բիզնեսմենների օգնությամբ փորձում ենք օգնել արցախցիներին: Խորին շնորհակալություն այն մարդկանց, ովքեր այս քանի օրը մեզ հետ են եղել: Մարդիկ սրտացավորեն, հոգատար վերաբերմունք են ցուցաբերում մեր հայրենակիցներին: Պետք է ասեմ, որ շատերի կացարանի հարցերը լուծել ենք, բայց արդեն մի քիչ դժվարություններ ունենք, Մասիս համայնքում ռեսուրս չի մնացել, ինչքան փակ դուռ, ինչքան վարձով տներ, ինչքան համայնքային կառույցներ կան, որտեղ հնարավոր է եղել քաղաքացիներին տեղավորել, արել ենք: Այս պահին էլ փորձում ենք օգնել, ինչ-որ հնար գտնել` մարդկանց տեղավորելու, նաեւ փորձել ենք այլ մարզերում կացարան գտնել նրանց համար: Ովքեր համաձայնել են, ուղարկել ենք Ալավերդի, Թալին, Անիի շրջան, ովքեր էլ մնացել են, փորձում ենք հնարավորության սահմաններում աջակցել: Ամեն դեպքում, հանգիստ չենք քնի, երբ գիտենք, որ մարդիկ մեքենաների մեջ են գիշերում: Դրա համար ամեն ինչ փորձելու ենք անել, ուղղակի, էլի եմ ասում` տեղակայվելու ռեսուրսները մեր համայնքում սպառվել է:

— Մասիսի քաղաքային գերեզմանատանն իրենց վերջին հանգրվանը գտան թշնամու հարվածից զոհված արցախցի փոքրիկ եղբայրները` 10-ամյա Միքայել եւ 8-ամյա Նվեր Ղազարյանները: Ի՞նչ կասեք այս մասին:

— Ցավով պետք է խոսեմ երկու փոքրիկների մասին, նրանք 21-րդ դարում ամբողջ աշխարհի լռության պայմաններում ցեղասպանվեցին: Սա 100 տարի հետո կրկնված ցեղասպանություն է հայ ազգի նկատմամբ: Աշխարհը լուռ էր, չխոսեց… Եղան մեկ-երկու հայտարարություն, մեկ-երկու հումանիտար օգնություն, բայց իրականում հայերին ոչ ոք չօգնեց: Ցավոք, պետք է նշեմ, որ մենք էլ, որպես ազգ, շատ անտարբեր ենք դարձել: Չգիտեմ` ի՞նչ արեցինք, որ մեր հայրենակիցներին օգնենք: Մարդիկ ամիսներով մնացին շրջափակման մեջ, իսկ աշխարհը բավարարվեց ինչ-ինչ պետությունների կողմից միայն հայտարարություններով: Իսկ վերջում էթնիկ զտման ենթարկվեցին մեր հայրենակիցները: Հիմա նոր ինչ-որ հումանիտար բեռներ են ուղարկում, ինտեգրման մասին են խոսում եւ այլն: Եթե հայ չի մնացել այնտեղ, ի՞նչ ինտեգրման մասին է խոսքը: Հերի՛ք է էլի: Ինչպե՞ս կարելի էր մի ամբողջ ժողովրդի մենակ թողնել: Երբ ժամանակին ասում էի` թուրքերը մեր թշնամիներն են, ի՞նչ խաղաղության մասին եք խոսում, մարդիկ ասում էին` ինչո՞ւ ես այդպես ասում: Ասում էի, որ այսօրվան չհասնենք, ինչքա՞ն կարող ենք կոտորվել, ժողովո՛ւրդ:

— Ի դեպ, Մասիսի քաղաքային գերեզմանատանը նոր փոսեր էլ կային…

— Փոքրիկ եղբայրների հուղարկավորությունից հետո մի երիտասարդ տղայի հուղարկավորություն տեղի ունեցավ ու եւս մեկ 10 տարեկան երեխայի: Այս ամենը տեսնող մարդն ուղղակի զարմանում եմ` ինչպե՞ս կարող է անտարբեր մնալ: Ղազարյան փոքրիկ եղբայրների հորեղբայրը նույնպես զոհվել է, նրա հուղարկավորությունն էլ պետք է անենք: Ու այսպես հազարավոր զոհերի մասին ենք խոսում, որ ցեղասպանվեցին 21-րդ դարում, հայ ժողովուրդն Արցախում ենթարկվեց էթնիկ զտման:

— Ի՞նչ առաջնահերթ խնդիրներ ունեն Մասիսում տեղակայված արցախցիները, եւ արդյոք նրանք աջակցություն ստանում են կառավարությունից:

— Առաջնահերթը կացարանի խնդիրներն են: Մարզպետարանից տեղեկացրել են, որ սննդային օգնություն են տրամադրելու, իսկ մնացած հարցերի հետ կապված պետք է սպասենք, թե կառավարությունն ինչ որոշում կկայացնի ամբողջ արցախահայության համար, որը կվերաբերի նաեւ Մասիս քաղաքում ապաստան գտած արցախցիներին: Թե ինչ է ծրագրված մեր հայրենակցիների համար ընդհանուր առմամբ` դեռ վաղ է ասել: Միայն կարող եմ ասել, որ բոլոր պետական մարմինները հետաքրքրված են եւ ուշադիր են մեր հայրենակիցների նկատմամբ: Այս մասով խնդիր չունենք, մեր խնդիրն այսօր ուրիշ տեղ է: Այսօր մեր աչքի առաջ մեր քաղաքական գործիչներին, մեր գեներալներին առեւանգում ու տանում են Ադրբեջան, ու մեր հասարակությունը մնում է անտարբեր: Սա լավ բանի չի բերելու: Կարծում եմ` պետք է մեր հասարակությունը դրա մասին մտածի, եւ որպես ազգ` բոլորս պետք է մտածենք մեր հետագա անելիքների մասին:

ՀՐԱՆՏ ՍԱՐԱՖՅԱՆ

Հ.Գ.- Հարցազրույցն ամբողջությամբ դիտե՛ք տեսանյութում.