Ուզում են իշխանափոխություն թող անեն, ով է ձեռքները բռնել, բայց ոչ հեղաշրջման գնով, դա նրանց մոտ չի ստացվելու.Հովիկ Աղազարյան

«Հայաստանի իշխանությունները այս մի քանի տարվա ընթացքում հասել են այն կետին, որ պետք է տեղի ունենար Արցախ-Ադրբեջան երկխոսություն, այդ ճանապարհով պետք է լուծվեր հարցը, հետևաբար, նորից եմ ասում, Հայաստանի իշխանությունն ուզենային էլ, չէին կարող տնօրինել Արցախի մեր հայրենակիցների ճակատագիրը։ Հիմա էլ իշխանությունները պատրաստ ենք սատար կանգնելու ցանկացած որոշման, որին համաձայն կլինի նաև արցախահայությունը։  Հիմա էլ, իհարկե դժվար է, այդ դժվարության աստիճանը մի միլիմետր անգամ չի էլ իջել, լարվածությունն է որոշ չափով թուլացել, բայց դժվարությունների մակարդակը նույնությամբ պահպանվում է, հետևաբար ես չեմ համարձակվի ասել, որ ամեն ինչ հետևում է»,-անդրադառնալով կորսված Արցախին ու տնավեր դարձած արցախահայության հետագային, ասաց ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանը:

– Որ դժվարության աստիճանն անփոփոխ է, արդյոք դա չի՞ խոսում իշխանության գործողությունների թերացման մասին։

– Չէ՛, իշխանության գործողությունները մղված են լարվածության թուլացմանը, որտեղ միանշանակորեն կարող եմ ասել, որ ունենք հաջողություն, բայց խնդիրներն Ադրբեջանի հետ դեռ լուծված չեն։ Երբ այդ լարվածության թուլացումը կբերի խնդիրների լուծման, դա կլինի շոշափելի արդյունք։

-Պարոն Աղազարյան, ընդդիմությունը դուրս է եկել փողոց  եւ պահանջում է իշխանության հեռացում, նշելով, որ Ձեր իշխանությունների հետագա պաշտոնավարումը հղի է նորանոր կորուստներով` Սյունիքի կորուստով:

-Զանգեզուրի միջանցքի թշնամու ձեռքին հայտնվելու մասին բացառապես երազում է ընդդիմությունը, Ադրբջանը եւ Թուրքիան, ուրիշ ոչ ոք: Մեր իշխանությունը ոչ մի գնով չի գնա դրան, այ ընդդիմությունն է ցանկանում հեղաշրջման փորձերով տանել թշնամուն նման քայլերի: Որ երկրում անիշխանություն լինի, իրենք ոնց ուզեն անեն, բայց դա նրանց մոտ չի հաջողվելու: Ընդդիմություն կոչվածը ոչ թե ակցիաներ է անում, այլ հեղաշրջման անհաջող փորձեր է անում, որոնք անհաջողությամբ են պսակվում ու պսակվելու:Որովհետեւ ժողովուրդը շատ լավ տարբերում է թացը չորից: Ուզում են իշխանափոխություն թող անեն, բայց ոչ հեղաշրջման գնով, դա նրանց մոտ չի ստացվելու: Իսկ Ձեր նշած այդ ակցիաների շարքը, ըստ էության, կարելի է գնահատել իշխանության վստահության հանրաքվե, ինչ-որ իմաստով կարելի է դա հենց այդպես ընկալել, որովհետե հեմց այդտեղ է երեւում, թե ով ում է վստահում, մնացածը թող ինչքան ուզում են դուրս գան փողոց, փողոց դուրս եկողների գնահատականը տալիս է ժողովուրդը:

Ընդդիմության մարտավարությունը սխալ է, որովհետև եթե իրենք զուգահեռներ են անցկացնում 2018-ին մեր իրականացրած միջոցառումների, օրինակ՝ քայլարշավի և մյուս գործողությունների հետ, ապա մենք այն ժամանակ քայլարշավ իրականացրինք, որպեսզի ժողովրդին իրապես իրազեկենք այդ օրվա խնդիրների հետ կապված հարցերն ու փորձենք լսելի լինել ժողովրդին՝ առանց պարտադրվելու, և եթե ժողովուրդն ընկալեր մեր մոտեցումները, ապա հաջորդաբար կկատարեինք մեր հաջորդ քայլերը, որոնք էլ արդեն տեղի ունեցան Երևանում: Աշխարհում չկա նման օրինակ, որ հարուստները դուրս գան պայքարի իշխանափոխության համար, հետևաբար կասկածելի են նրանց նպատակների ազնվությունն ու անկեղծությունը:

Հիմա իրենք ի՞նչ են իրազեկում, որ Արցախն ու արցախահայությունը օգնության կարիք ունի,՞ ու կան այս կամ այն մակարդակի վտանգնե՞ր: Դա բոլորը գիտեն, ո՞վ չգիտի այդ մասին, իրենք էլ գիտեն, մենք էլ գիտենք, տնային տնտեսուհիներն էլ գիտեն, հետևաբար նրանց մարտավարությունը սխալ է, իրենք պետք է ավելի հստակ օրակարգով հանդես գան ու տեսնեն՝ եթե ունեն աջակցություն՝ հաջորդ քայլերն անեն:

-Իսկ պատերազմի վտանգ այս պահին չե՞ք տեսնում հայ-ադրբեջանական սահմանին:

-Պատերազմի վտանգը ամեն վարկյան կա, բայց մենք էլ քնած չենք, արժանի հակահարված կարող ենք տալ ցանկացած ոտնձգության: Տպավորություն է, որ ընդդիմությունը ինքն է առաջին հերթին փափագում պատերազմ: