Դատարանը չկարողացավ հաղթահարել իր կախվածությունը քաղաքական իշխանությունից. Արսեն Բաբայան

Ավան եւ Նոր Նորք վարչական շրջանների ընդհանուր իրավասության դատարանի դատավոր Մանվել Շահվերդյանը 44-օրյա պատերազմում զոհված Գեւորգ Վիրաբյանի քրոջ` երկու անչափահաս երեխաների մայր Տաթեւ Արցախի (Տաթեւիկ Վիրաբյան) նկատմամբ կիրառեց կալանք` երկու ամսով։ Նրան ներկայացվել է, ոչ իրավաբանական տերմինաբանությամբ ասած, Ֆեյսբուք սոցիալական ցանցում զանգվածային անկարգության կոչեր հնչեցնելու եւ այդ անկարգություններին մասնակցելու մեղադրանք: Ավելի վաղ ՀՀ Քննչական կոմիտեն հայտարարությամբ էր հանդես եկել, որտեղ նշել էր, թե կոմիտեի Երեւան քաղաքի քննչական վարչությունում Տ. Վիրաբյանի նկատմամբ նախաձեռնվել է քրեական վարույթ՝ ՀՀ քրեական օրենսգրքի 330-րդ հոդվածի 2-րդ մասի 3-րդ կետի հատկանիշներով։ Ըստ էության, Տաթեւ Արցախը դարձավ առաջին կին քաղբանտարկյալը, որը պայքարում է օրվա իշխանության հեռացման դեմ եւ համարձակություն ուներ բարձրաձայնելու այդ մասին: Դատարանի որոշումից հետո «Իրավունքը» զրուցել է Տ. Վիրաբյանի փաստաբան ԱՐՍԵՆ ԲԱԲԱՅԱՆԻ հետ:

— Ի՞նչ կասեք դատարանի կողմից Տաթեւիկ Վիրաբյանի նկատմամբ, որպես խափանման միջոց, երկու ամիս կալանք կիրառելու մասին:

— Դատարանը չկարողացավ իրականացնել արդարդատություն եւ չկարողացավ ազատվել քաղաքական իշխանության կապանքներից եւ հանձնարարությունը կատարեց ամբողջությամբ: Քննիչը միջնորդել էր երկու ամիս կալանք, տեսակցությունների արգելում, որն ամբողջությամբ բավարարվեց: Էլի եմ ասում` դատարանը չկարողացավ հաղթահարել իր կախվածությունը քաղաքական իշխանությունից:

— Պարոն Բաբայան, որո՞նք են լինելու Ձեր հետագա քայլերը:

— Բնականաբար, պետք է անհապաղ բողոքարկենք Վերաքննիչ դատարան: Հույս ունենանք, որ այնտեղ գոնե կգտնենք արդարադատություն, եւ կլինի այնպիսի դատավոր, որն արդար դատական ակտ կկայացնի:

— Ի՞նչ իրավիճակում է Տաթեւիկ Վիրաբյանը եւ ի՞նչ է մտածում ներկայացված մեղադրանքի մասին:

— Տաթեւը շատ լավ է, ուժեղ է, պատրաստ էր… Շատ լավ գիտեր, թե ինչ հանձնարարություն է իջեցված քաղաքական իշխանության կողմից: Մի բան է ակնհայտ, որ մեղքը չի ընդունում եւ ասում է, որ որեւէ հանցանք չի կատարել: Իր գործողությունները եղել են Սահմանադրությամբ երաշխավորված իր իրավունքերի իրացում, մասնավորապես` հավաքների մասնակցելու իրավունքը, փողոց փակելը եւ այլն: Ընդհանուր առմամբ` սա է, չեմ կարող ավելի մանրամասն հրապարակել:

— Դատական նիստից առաջ Դուք, այնուհանդերձ, մեզ հետ զրույցում հույս էիք հայտնել, որ կարող էր դատարանը խափանման միջոց կալանք չկիրառել…

— Մենք դատարանում ամբողջությամբ հիմնավորել էինք, որ ձերբակալությունը տեղի է ունեցել ոչ իրավաչափ պայմաններում: Հետեւաբար, եթե դատարանը օբյեկտիվ քննություն իրականացներ եւ օբյեկտիվ որոշում կայացներ, ապա սա միայն ամբողջությամբ բավարար էր, որպեսզի քննիչի կողմից ներկայացված կալանքի միջնորդությունը ամբողջությամբ մերժվեր: Բայց հաշվի առնելով քաղաքական իրավիճակը, եւ այն, որ այդ գործողություններն, ըստ էության, քաղաքական իշխանության դեմ են՝ եղավ այն, ինչ եղավ: Մեր տեղեկություններով` քաղաքական իշխանության կողմից կան հստակ հանձնարարություններ` բոլորին ձերբակալել, ապա կալանավորել:

— Անգամ, եթե խոսքը երկու անչափահաս երեխաների մոր մասի՞ն է…

— Մենք դատարանին խնդրեցինք նաեւ, որ եթե, այնուամենայնիվ, չի կարողանա հաստատված համարել, որ ձերբակալությունը ոչ իրավաչափ է եղել, ապա խափանման միջոց կիրառելիս բացառի կալանավորումը` հաշվի առնելով, որ Տաթեւն ունի երկու անչափահաս երեխա, եղբայր է կորցրել, քույրն այս պահին Ստեփանակերտում է եւ բազում այլ հանգամանքներ: Ես ակնկալում էի, որ դատարանն ի վերջո կկարողանար ուժ գտնել իր մեջ եւ օբյեկտիվորեն կարձանագրեր, որ ձերբակալությունը տեղի է ունեցել ոչ իրավաչափ, ինչի հիմքերն ակնհայտ էին:

— Այս օրերին Դուք ստանձնել եք նաեւ մի շարք այլ քաղաքացիների պաշտպանությունը, որոնք այս կամ այն կերպ մասնակցել են հանուն Արցախի եւ ընդդեմ այս իշխանությունների իրականացվող փողոցային պայքարին: Ի՞նչ արդյունքներ ունեք մյուսների գործերով:

— Մի անչափահասի գործով ունենք ազատ արձակում, եւ այս պահին ազատության մեջ է: 18–ամյա մեր արցախցի տղան, ցավոք սրտի, կալանավորվեց դատավոր Կարեն Ֆարխոյանի կողմից: Իսկ ձերբակալվածներից Կարեն Կարապետյանի նկատմամբ նույն դատավոր Ֆարխոյանը կայացրեց որոշում` 20 օր տնային կալանք կիրառելու մասին: Մնացածի հետ կապված աշխատանքներն ընթացքի մեջ են:

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝