Iravunk.com-ի հարցման արդյունքները զգուշացնում էին ընտրության հենց այսպիսի պատկերի մասին

Երեւանի ավագանու ողջ քարոզարշավի ընթացքում Iravunk.com կայքում ընթանում էր սոցհարցում, թե ընտրությանը մասնակցող քաղաքական ուժերից, որոնք կհաղթահարեն նախընտրական շեմը, եւ ովքեր կկարողանան հայտնվել քաղաքապետարանում: Հատկանշական է այն, որ սոցցհարցման արդյունքները լիովին ուրվագծում էին այն պատկերը, որը կա այսօր` ընտրություններից հետո:

Այսպիսով` թեպետ տարբեր քաղաքական վերլուծություններ այլ արդյունքների մասին էին հուշում, բայց սոցհարցման արդյունքներով արդեն իսկ հայտնի էր, որ «Ապրելու երկիր» կուսակցության քաղաքապետի թեկնածու Մանե Թանդիլյանի վրա ծախսված մեծ գումարները զուր են: Նրանք այդպես էլ չհաղթահարեցին շեմը: Ըստ սոցհարցման` հավաքել էին ընդամենը 3 տոկոս:

Այն, որ Տիգրան Արզաքանցյանի «Ուժը Հայրենյաց» կուսակցությունը, Սուրեն Պետրոսյանի «Ժողովրդական համախմբում»–ը, Արման Ղուկասյանի «Հանուն սոցիալական արդարության» կուսակցությունը, Տիգրան Խզմալյանի Եվրոպական կուսակցությունը, Նորիկ Նորիկյանի «Արդար Հայաստան»–ը, Երվանդ Թարվերդյանի «Միացյալ Հայաստան»–ը, Դավիթ Խաժակյանի դեմքով` Էդմոն Մարուքյանի «Լուսավոր Հայաստան»–ը կստանան 0,1–ից մինչեւ 2 տոկոս ձայներ, նույնպես ակնհայտ էր` սոցհարցման արդյունքներով:

Ըստ էության, ըստ սոցհարցման, արդեն օրեր առաջ լիովին հայտնի էր, որ Երեւանի ավագանին կազմված է լինելու Տիգրան Ավինյանի դեմքով` ՔՊ–ից, Անդրանիկ Թեւանյանի դեմքով` «Մայր Հայաստան» շարժումից, Հայկ Մարությանի դեմքով` «Ազգային առաջընթաց» կուսակցությունից եւ ի հեճուկս այլ կանխատեսումների` «Հանրային ձայն» կուսակցությունից, որը գլխավորում է առ այսօր կալանքի տակ գտնվող Արտակ Գալստյանը:

Թերեւս միակ անակնկալը «Հանրապետություն» կուսակցության ստացած ձայներն էին, որի նախընտրական ցուցակը գլխավորում էր Արտակ Զեյնալյանը: Թեպետ Iravunk.com–ի սոցհարցման համաձայն` նրա համար անհաղթահարելի էր անցողիկ շեմը, սակայն Ա. Զեյնալյանին ռուսաֆոբները համարեցին իրենց սրտի թեկնածուն, ինչն էլ ապահովեց նրա համար բաղձալի տոկոսը:

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝