Ընտրարշավն անց է կացրել ատելության խոսքով. ԺՀԿ-ն պահանջում է ՔՊ-ի ընտրական ցուցակի գրանցումն ուժը կորցրած ճանաչել

«Ժողովրդավարական համախմբում» կուսակցությունը ընտրախախտումների վերաբերյալ դիմում է ներկայացրել Կենտրոնական ընտրական հանձնաժողովի նախագահ Վահագն Հովակիմյանին:

«Սույնով, հիմք ընդունելով, որ Երեւան քաղաքի ավագանու ընտրություններին մասնակցող «Քաղաքացիական Պայմանագիր» կուսակցությունը ընտրարշավն անց է կացրել ատելության խոսքով, բռնության կոչերով եւ բազմաթիվ կոպիտ խախտումներով, որոնք ներառում են, բայց չեն սահմանափակվում՝   

1․ ՀՀ Ընտրական օրենսգրքի Հոդված 23, կետ 1 (1) խախտում, այն է՝ քաղաքական պաշտոն զբաղեցնող ՀՀ Վարչապետ եւ Քաղաքացիական Պայմանագիր կուսակցության վարչության նախագահ Նիկոլ Փաշինյանը, մասնակցելով  Երեւանի ավագանու ընտրություններին առաջադրված Քաղաքացիական Պայմանագիր կուսակցության նախընտրական քարոզարշավին, քարոզչություն է իրականացրել հանդես գալով բռնության ու ատելության բացահայտ կոչերով եւ պաշտոնեական դիրքի կոպիտ չարաշահմամբ՝ Քաղաքացիական Պայմանագիր կուսակցության թեկնածուին եւ ընտրություններին մասնակցող Քաղաքացիական Պայմանագիր կուսակցությանը կողմ քվեարկելուն եւ այլ կուսակցությունների դեմ ուղղված ուղղակի եւ անուղղակի կոչերով՝ ընտրությունների ժամանակ առավելություն ստանալու համար։

2․ ՀՀ Ընտրական օրենսգրքի Հոդված 23, կետ 1 (2) խախտում, այն է՝  նախընտրական քարոզչության նպատակով Երեւանի քաղաքապետի թեկնածու եւ գործող փոխքաղաքապետ Տիգրան Ավինյանը օգտագործել է ծառայողական պարտականությունների իրականացման համար տրամադրված նյութական ու մարդկային ռեսուրսները, ներառյալ՝ կարգադրություններ է իջեցրել իր ստորադասներին քարոզարշավի ընթացքում, գտնվելով փաստացի արձակուրդի մեջ։

3․ ՀՀ Ընտրական օրենսգրքի Հոդված 21, կետ 2 (2) խախտում, այն է՝  քարոզչական տպագիր նյութերի փակցնում պետական եւ համայնքային սեփականություն հանդիսացող շենքերի, հանրակրթական դպրոցների, բազմաբնակարան կամ ստորաբաժանված շենքերի, հասարակական սննդի կամ առեւտրի օբյեկտների վրա։

Խնդրում ենք ՀՀ ԸՆտրական Օրենսգրքի 19 հոդվածի կետ 8-ի համաձայն իրականացնել ԿԸՀ գործառույթը եւ դիմել դատարան` «Քաղաքացիական Պայմանագիր» կուսակցության, որպես Երեւանի ավագանու ընտրություններին մասնակցող կուսակցության ընտրական ցուցակի գրանցումն ուժը կորցրած ճանաչելու համար»:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝