ՔՊ-ի նվիրատուների ցուցակը մինչ օրս հայտնի չէ. Սողոմոնյան

Նախընտրական ամենամեծ ֆոնդը ՔՊ-ինն է, եւ հատկանշական է, որ նվիրատուների ցուցակը մինչ օրս հայտնի չէ, մինչդեռ նվիրատվությունները օրենսդրությամբ կարգավորվում են: Այս մասին ահազանգում է «ՀայաՔվե» դիտորդական առաքելության շտաբի պետ ՄԵՆՈՒԱ ՍՈՂՈՄՈՆՅԱՆԸ:

«Կոռուպցիոն եւ վարչական համակարգերի ներդրմամբ` իշխանական թեկնածուն մեծ նյութական առավելություն ունի իր մյուս մրցակիցների նկատմամբ: Խախտումների երրորդ խումբն էլ վերաբերում է կաշառատվությանը: Հիշեցնեմ այն փաստը, որ իշխանական թեկնածուի համար ժամը հազար դրամով մարդիկ էին հավաքագրվում քարոզարշավին քարոզչական շապիկներով եւ պաստառներով քայլելու համար: Սակայն այս դեպքով որեւէ քրեական վարույթ չիրականացվեց»,– ընդգծեց Սողոմոնյանը:

Նշենք, որ Երեւանի ավագանու ընտրություններին ընդառաջ՝ դեռեւս հուլիսի 31-ին, տեղի էր ունեցել «Քաղաքացիական պայմանագիր» կուսակցության դրամահավաք–երեկոն: Դրանից հետո «Քաղաքացիական պայմանագիր» կուսակցության նախընտրական շտաբի պետ Արմեն Փամբուխչյանը հայտարարել էր, որ թվով 987 նվիրատուների հանգանակությունների արդյունքում հավաքվել է 506.532.950 ՀՀ դրամ: Ովքե՞ր են նվիրատվություն կատարել առավել քան 1 մլն դրամի չափով` անուն առ անուն, եւ յուրաքանչյուրը որքա՞ն գումար է նվիրաբերել, երեկոյի մասնակիցները արդյո՞ք մուտքավճար տվել են, որքա՞ն է եղել մասնակցության մուտքավճարը, «Իրավունքը» հարցմամբ դիմել էր «Քաղաքացիական պայմանագիր» կուսակցության ղեկավարությանը: Հարցումից միայն 15 օր անց ստացել էինք պատասխան, թե կուսակցության աշխատակազմը ծանրաբեռնված է Երեւանի ավագանու սպասվող ընտրությունների կազմակերպչական խնդիրներով։ Իսկ հարցմանը կփորձեն պատասխանել հնարավորինս սեղմ ժամկետներում, առ այսօր պատասխան չկա:

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝