Ինչու ՍԴՀԿ-ն խզեց Խզմալյանի հետ դաշինքը

136-ամյա Սոցիալ-դեմոկրատ Հնչակյան կուսակցությունը մոտ երկու ամիս առաջ դաշինք կազմեց 5-ամյա Հայաստանի Եվրոպական կուսակցության հետ: Երկու քաղաքական ուժերի առաջնորդները` Սեդրակ Աճեմյանն ու Տիգրան Խզմալյանը, համատեղ միջոցառում կազմակերպեցին, ձեռք ձեռքի տվեցին եւ նաեւ ի լուր երեւանցիների տեղեկացրեցին, որ մասնակցելու են Երեւանի ավագանու ընտրություններին եւ իրենց դաշինքի Երեւանի քաղաքապետի թեկնածուն լինելու է սոցիոլոգ Կարեն Սարգսյանը:

Բայց, արի ու տես, որ եկավ առաջադրումների ժամանակն ու ԿԸՀ-ում հայտնվեց միայն Տիգրան Խզմալյանը՝ բացառապես Հայաստանի Եվրոպական կուսակցության նախընտրական ցուցակով, որը գլխավորում էր ոչ թե Կարեն Սարգսյանն, այլ հենց ինքը: Ի դեպ, Խզմալյանը դեռ մեկ տարի առաջ սոցցանցերում ձոնում էր ու հայտարարում, թե իրենց կուսակցության Երեւանի քաղաքապետի թեկնածուն լինելու է երգիչ, երգահան Ռուբեն Հախվերդյանը, բայց արի ու տես, որ գցեց-բռնեց ու ինքն իրենից լավ քաղաքապետի թեկնածու չգտավ:

 Թե ինչպես հասկանալ այս ամենը, «Իրավունքը» հետաքրքրվեց ՍԴՀԿ Հայաստանի վարչության անդամ ՎԱՐԱԶԴԱՏ ԵՂԻԱԶԱՐՅԱՆԻՑ:

«Ունեինք հստակ պայմանավորվածություններ Հայաստանի Եվրոպական կուսակցության հետ, սակայն նկատեցինք փոփոխություններ: Քաղաքական ուժի հետ ճանապարհ գնալու ընթացքում նման փոփոխությունները հետագայում, ըստ մեզ,  հղի էին այլ հետեւանքներով: Ուստի՝ կուսակցության վարչությունը քննարկեց հարցը քաղաքապետի թեկնածու Կարեն Սարգսյանի եւ որոշում կայացվեց այս թիմով չգնալ ընտրության», - այլ փակագծեր չբացելով՝ ընդգծեց Եղիազարյանը:

Այսպիսով՝ ՍԴՀԿ-ն եւ Եվրոպական կուսակցությունը դադարեցնում են միասնական ճակատով հանդես գալն ու երկու ամսական դաշինքը, ըստ էության, համարվում է կազմալուծված:

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝