Վարդանյանները «փիառվում են»՝ ամիսներով կոնֆետի կարոտ արցախցի փոքրիկների հաշվին

«Գրանդ Հոլդինգ» ընկերության ղեկավարներ ՄԻՔԱՅԵԼ եւ ԿԱՐԵՆ ՎԱՐԴԱՆՅԱՆՆԵՐԸ, որոնք 2018-ին  գործարարների շարքում առաջիններից էին, որոնք հապշտապ քաղաքականապես «կրոնափոխվեցին» ու դարձան նիկոլական եւ սկսեցին փառք տալ տեղի ունեցած իշխանափոխությանը՝ մաղթելով, որ ուրախությունն ու ոգեշնչվածությունը երկար մնա ժողովրդի սրտերում, փոխանակ ապաշխարեն՝ երկիրն այս օրին հասցնելու մեջ իրենց մեծ լուման ունենալու համար, կրկին որոշել են «հերոսանալ»՝ այս անգամ սովի մատնված ու պաշարված արցախցիների հաշվին:

Այսպիսով՝ ինչպես 2018-ին Վարդանյանները Նիկոլ Փաշինյանի ռեժիմին իրենց «հպատակության» երդում-հայտարարության մեջ էին ասում, «ցնցեցին աշխարհը» ամբողջ մամուլով եղբայրները ողողելով, թե բա՝ «Գրանդ Քենդին» քաղցրավենիքով բեռնված երկու բեռնատար մեքենա օգնություն է ուղարկում Արցախի երեխաներին»: Իսկ իրականում սա միայն ցնցող վերնագիր էր, որովհետեւ մեքենաները Կոռնիձորում են՝ ՀՀ կառավարության` արդեն օրեր շարունակ ճամփին մնացած բեռների կողքին: Իհարկե, սա կարելի էր էժանագին փիառ քայլ համարել, եթե ավելի վաղ զգուշացրած չլիներ ԵՊՀ միջազգային հարաբերությունների եւ դիվանագիտության ամբիոնի դոցենտ, միջազգայնագետ ԳՐԻԳՈՐ ԲԱԼԱՍԱՆՅԱՆԸ, որ շուտով մեծ եւ համաձայնեցված դավադրության ենք ականատես լինելու:

«Գերի ընկած, օրեր շարունակ խմելու ջրի երես չտեսած զինվորի մոտ, սովորաբար, սառը ջրով շիշ են դնում հարցաքննության ժամանակ` նրան խոսկան դարձնելու նպատակով: Հաքարի կամրջի մոտ կանգնած ալյուրը, դեղորայքն ու առաջին անհրաժեշտության այլ ապրանքները, կարծես, նույն սառը ջրով շշի դերն են ստանձնել Արցախի համար՝ Արեւմուտք-Ադրբեջան տանդեմի պայմանները պարտադրանքով ընդունելու նպատակով», - ընդգծել էր, այս դեպքում՝ մարգարեական միտք էր հայտնել միջազգայնագետը, որը ավելի վառ ու խիտ գույներով եկան ապացուցելու Վարդանյանները: Նրանք ոչ թե սառը ջուր են ցույց տալիս օրեր շարունակ խմելու ջրի երես չտեսած զինվորին, այլ կոնֆետ են ցույց տալիս ամիսներ շարունակ կոնֆետի ու առհասարակ քաղցրի երես չտեսած փոքրիկ արցախցիներին՝ քաջ գիտակցելով, որ այն մնալու էր ճանապարհին: Եթե այսքանը չգիտակցելով են արել Վարդանյանները, ինչը 2018-ից հետո քիչ հավանական է թվում, ուրեմն՝ եղբայրների փիառշիկները, պարզապես «փուռն են տվել» նրանց՝ իրենց կարճ խելքով կարծելով, թե «ջիջիլ գցելով» արցախցի փոքրիկներին՝ արագացնելու են Փաշինյան-Արեւմուտք-Ադրբեջան տանդեմի ցանկությունների ի կատար ածվելը:

ՀՐԱՆՏ ՍԱՐԱՖՅԱՆ