Մարդկանց պետք է բացատրել, որ եթե Նիկոլը գնա, իրենց ոչ մեկը չի հոշոտելու, չի պատժելու. Չախալյան

«Իրավունք»-ի զրուցակիցն է «Կամք» հասարակական նախաձեռնության հիմնադիր, «Զարթոնք» կուսակցության ԳՄ անդամ ՎԱՀԱԳՆ ՉԱԽԱԼՅԱՆԸ:

— Կայացավ 2021 թ. հունվարի 28-ին տեղի ունեցած «Հայահավաքի» մասնակիցների գործով հերթական դատական նիստը: Արդեն երկու տարի է, որ նաեւ Ձեզ այս գործով մեղադրում են իշխանության յուրացման փորձի համար, ի՞նչ կասեք այս մասին:

— Դատական գործը, մեղադրանքը սկզբից մինչեւ վերջ քաղաքական է: Եթե հիշում եք, սկզբում մեզ ձերբակալել էին, մեկուսացրել, բայց չկարողացան բանտում պահել, որովհետեւ այս գործը լրիվ օդ է եւ ոչ մի աղերս չունի իրականության հետ: Այսօր մի քանի դատական գործ է հարուցված իմ դեմ, բայց ես չեմ դադարել պայքարել այս չարիքի իշխանության դեմ, մեր խնդիրն իրենք են եւ օր առաջ պետք է հեռացվեն: Ինչո՞ւ են այսքան ձգձգում, ըստ իս, որպեսզի կարողանան ցանկացած պահի, առանց ավելորդ դատավարության, դատախազի միջնորդությամբ, օրինակ` գիշերվա ժամը 12-ին փոխեն մեր խափանման միջոցը: Սա հավելյալ գործիքակազմ է իշխանության ձեռքում մեր դեմ: Վաղը, թեկուզ ընտրությունների մասնակցենք կամ որեւէ այլ գործընթաց սկսենք, իրենք կարող են անմիջապես մեր խափանման միջոցը փոխել: Այսինքն` նոր քրեական գործ թխելու կարիք չեն էլ ունենա: Ուշագրավ է այն, որ նույնիսկ այս գործով ուսումնասիրված կադրերում ես չկայի: Մեկ-մեկ կատակով ասում եմ` Սահակաշվիլիենք էլ էին գործ թխում, բայց գոնե հիմնավորում էին բերում: Կարծում եմ` քանի դեռ Նիկոլ Փաշինյանն իշխանության է, փորձելու է իրեն չենթարկված, իր քաղաքական համակարգի բաղադրիչ չդարձած ուժերին լռեցնել, մեկուսացնել, հալածել: Անկեղծ, արդեն չեմ էլ ասում իմ կողմնակիցներին` երբ է դատիս օրը, որովհետեւ ամոթալի է խոսել այդ մասին, երբ 120 հազար արցախահայ սովի է մատնված, տասնյակ քաղաքական բանտարկյալներ ունենք, գեներալներ են բանտարկված: Բայց այս անօրինությունները, որոնք մի ողջ ազգի դեմ են, հենց այնպես չեն անցնելու, եւ մի օր պատասխանատվություն են կրելու դրա համար:

— Ունենք քաղբանտարկյալներ, տեւական դատավորություններով էլ փորձում են լռեցնել Ձեզ եւ Ձեր պես անձանց: Այս պայմաններում` ո՞վ պետք է իրավիճակ փոխի, երբ վտանգի մեջ է ոչ միայն Արցախը, այլեւ Հայաստանը:

— Ստեղծված իրավիճակի ելքն այն է, որ ընդդիմության ներկայացուցիչները պետք է սկսեն բաց խոսել ու շփվել ժողովրդի հետ: Այո՛, օրվա իշխանություններն ունեն իրենց կողմնակիցները, որը կազմում է 10-15 տոկոս, եւ մենք պարտավոր ենք նաեւ նրանց հետ խոսել, նրանց հետ շփվել, որը, ցավոք, չի արվում: Մեր թերություններից մեկը համարում եմ հենց սա, որ չենք բացատրում առկա խնդիրները բնակչությանը: Իշխանության հիմնական թեզերն են նախկինների ու արատների վերադարձը, եւ այս մասին մենք պետք է պարզ խոսենք բնակչության հետ: Պետք է ասենք, որ այն արատավոր երեւույթները, որոնք մինչեւ այժմ եղել են ՀՀ-ում, ոչ մեկի սրտով էլ չի եղել: Ավելին` ամեն ինչ արվելու է, որ չկրկնվի, այդ արատավոր երեւույթները չեն վերադառնալու: Ընդ որում` այն արատավոր երեւույթները, որոնք մատնանշում են, այսօր էլ կան: Ուղղակի, այս իշխանությունները տեխնոլոգիապես շատ գրագետ ձեւով այդ ամենը քողարկում են: Իրականում պետք է հիմա էլ պայքարենք նույն կաշառակերության դեմ, որն այսօր օրինականացրել են:

— Ի՞նչ նկատի ունեք` ասելով, որ «այսօր կաշառակերությունն օրինականացվել է»:

— Ասենք, կառուցապատողները եթե նախկինում մի քիչ վախվորած էին ասում, հիմա վախվորած չեն ասում եւ մի բան էլ թվերը մեծացրել են: Բայց այս մասին չի խոսվում, չի բարձրաձայնվում: Մարդիկ համոզված են, որ եթե Նիկոլը գնա, իրենց հոշոտելու են: Նմանատիպ խոսակցությունների հաճախ եմ հանդիպում, ու այդ մարդկանց չի ասվում, որ ոչ մեկը ձեզ չի հոշոտելու, չի պատժելու: Այո՛, Հայաստանի ու Արցախի կործանման համար պատժվողներ լինելու են, բայց այդ պատժվողը հասարակ քաղաքացին չի լինելու, ով կա՛մ խաբվել է այս իշխանությունների ստերով, կա՛մ ինչ- ինչ առիթներով գնացել է նրանց հետեւից: Դրա համար պետք է մեր քաղաքացիների հետ անկեղծ, պարզ զրույց ունենանք: Եվ այստեղ անելիք ունեն նաեւ ծնունդով արցախցի մեր բիզնեսմենները:

— Այս իրավիճակում ի՞նչ կարող են անել արցախցի բիզնեսմենները, որ, ըստ Ձեզ, չեն անում:

— Մենք այսօր խնդիր ունենք հասնելու X գյուղ եւ շփվելու մեր քաղաքացիների հետ: Իրենք այստեղ անելիք ունեն, որ ապահովեն այդ միջոցները, որ կարողանանք հասնենք Հայաստանի ամենահեռավոր գյուղ եւ խոսենք մեր գյուղացիների հետ: Ես փորձ արել եմ. հավատացեք, 15-20 րոպե իրենց հետ խոսելուց հետո իրենք հասկանում են, որ այն, ինչ որ իրենք Հ1-ով տեսնում են, թե իշխանափոխությունից հետո ինչ «սպառնալիք» է գալու, նման բան չկա: Այսօր իշխանությունը պահում են` մարդկանց ասելով, որ «մենք գնացինք, ձեզ հոշոտելու են, գալու են ձեր տները սամասուդ անեն»: Սա կեղծիք է, իշխանությունների կողմից հորինված միֆ է, եւ այդ միֆը ջարդել է պետք: Իսկ մենք կարող ենք դա անել, երբ մարդկանց հետ շփվենք: Մի օր 15-20 րոպե խոսեցի մի վարդենիսցու հետ, ասաց` թույլ կտա՞ս քեզ փաթաթվեմ: Հարցրի` ինչո՞ւ, նա էլ, թե` անկեղծ եմ ասում, ես գիտեի դու հրեշ ես: Այդ աստիճան մեզ հրեշացրել են, ու սա է իրենց զենքը: Եթե այս զենքը մենք վերցրինք այս իշխանությունների ձեռքից, իրենց իշխանությունը փուլ կգա:

— Բայց չէ՞ որ իրենք ունեն արտաքին աջակցություն եւ նաեւ դրանով են վստահ, որ իրենց իշխանությունը չի սասանվի:

— Այո՛, իրենք ունեն արտաքին աջակցություն, եւ վստահորեն կարող եմ ասել, որ Հայաստանի ոչ մի իշխանություն նման աջակցություն երբեւիցե չի ունեցել: Եվ դա էլ է հասկանալի, թե ինչու ունեն, որովհետեւ սպասարկում են հենց այդ ուժերի շահերը, ոչ մի տեղ չեն պաշտպանում ՀՀ շահերը: Ցանկացած իշխանություն` մեկը շատ, մեկը` քիչ, Հայաստանի շահերը պաշտպանել է: Ինչ վերաբերում է արատներին, հաճախ այն եղել է անգիտակցաբար կամ իրենց կողմից չի եղել: Շատ անգամ նույն արտաքին ուժերի կողմից են այդ արատները ներդրված  եղել, ովքեր այսօրվա իշխանությունների կատարած աշխատանքների ուղիղ շահառուն են: Ինձ մի օր մի ոստիկան ասաց, թե Եվրոպական միությունից եկել էին, որ իրենց սովորեցնեն, թե ինչպես կաշառք վերցնեն: Կոռուպցիայի դեմ պայքարի սեմինար են արել, բայց երբ մի քիչ խորացել են, հասկացել են, որ իրենց սովորեցնում են, թե ինչպես գրագետ կաշառք վերցնեն: 

ՀՐԱՆՏ ՍԱՐԱՖՅԱՆ