Գնացած-հետեկածը

«Իրավունքի» տեղեկություններով՝ ճամպրուկային տրամադրություն է ՀՀ ԿԳՄՍ փոխնախարար ԱՐԱ ԽԶՄԱԼՅԱՆԻ մոտ: Հուլիսի 17-ին նա կմասնակցի Մատենադարանի տնօրենի թափուր պաշտոնի համար մրցույթին՝ Մատենադարանի տնօրենի ԺՊ Կարեն Մաթեւոսյանի եւ պատմական ու բանասիրական գիտությունների դոկտոր, Մատենադարանի գիտաշխատող Արծրունի Սահակյանի հետ: Իսկ թե ով պետք է հաղթի, «վերեւներում» արդեն որոշված է: Եվ հանուն նրա, որ արվեստագիտության թեկնածու Արա Խզմալյանը կարողանա դառնալ Մատենադարանի տնօրեն, անգամ կանոնադրության մեջ է փոփոխություն կատարվել: Այսպիսով՝ Մատենադարանի տնօրեն կարող է դառնալ անգամ գիտությունների թեկնածուի գիտական աստիճան ունեցողը, մինչդեռ նախկինում միայն դոկտորներն իրավունք ունեին մրցույթին մասնակցելու:

Թե ինչն է դրդել Խզմալյանին ազատվել փոխնախարարի պաշտոնից ու վերադառնալ Մատենադարան, որտեղ 2009-2017թթ. աշխատել է արխիվային բաժնի վարիչ, իսկ 2014-2018 թթ.՝ զուգահեռաբար նաեւ Մատենադարանի տնօրենի խորհրդական` թանգարանային կառավարման եւ ԱՊՀ մասնակից պետությունների հետ կապերի գծով, բավական հին նախապատմություն ունի: Խզմալյանը լուրջ կոնֆլիկտ ուներ Մատենադարանի նախկին տնօրեն Վահան Տեր-Ղեւոնդյանի հետ եւ փոխնախարար նշանակվելով՝ ջանք ու եռանդ, կարծես թե, չխնայեց նրանից ազատվելու համար: Ըստ էության, Խզմալյանն անգամ փոխնախարարի պաշտոնում շարունակում էր երազել Մատենադարանի տնօրենի աթոռին հայտնվելու մասին, եւ հիմա եկել է երազանքներն իրականացնելու պահը՝ ի հեճուկս Մատենադարանի նախկին ղեկավարության:

ՀՐԱՆՏ ՍԱՐԱՖՅԱՆ