Կորեական աղցան հնդկահավով և բանջարեղենով. Օրվա բաղադրատոմոս

Այս աղցանն ապացուցում է, որ նույնիսկ հետեւելով ճիշտ սննդակարգի, դուք կարող եք համեղ սնվել եւ զարմացնել ձեր սիրելիներին ու ընկերներին համերի վառ բազմազանությամբ։ Հնդկահավը շատ լավ համադրվում է մի շարք թարմ բանջարեղենի հետ:

Այս աղցանը բազմազան կդարձնի ձեր տոնական սեղանի ճաշացանկը:

Բաղադրիչները

• Հնդկահավ (հնդկահավի կրծքամիս)՝ 400 գ
• գազար՝ 1 հատ
• Սոխ՝ 1 հատ
• Վարունգ ՝ 2 հատ
• Բուլղարական պղպեղ՝ 1 հատ
• Քացախ (70%)՝ 1/2 ճ.գ.
• Սոյայի սոուս՝ 2 ճ.գ.
• Սև պղպեղ (աղացած)՝ ըստ ճաշակի
• Կարմիր կծու պղպեղ (փաթիլներ)՝ ըստ ճաշակի
• Համեմ (աղացած) – 1 ճ.գ.
• Սխտոր՝ 2 պճեղ
• Շաքարավազ՝ 1/2 ճ.գ.
• Աղ՝ ըստ ճաշակի
• Բուսական յուղ՝ 4 ճ.գ.
• Համեմ՝ 1 փունջ։

Պատրաստման ժամանակը՝ 40 րոպե
Չափաբաժինը՝ 4 հոգու։

Պատրաստման եղանակը

Վերցնում ենք հնդկահավի կրծքմիսը, լվանում, չորացնում և մանր կտրատում։

Տաք թավայի մեջ լցնում ենք ձեթը (2 ճաշի գդալ)։ Թավայի մեջ դնում ենք հնդկահավը։ Տապակում ենք 10 րոպե միջին կրակի վրա, առանց կափարիչի, անընդհատ խառնելով։ Կրակի վրայից հանում ենք։

Մաքրում ենք սոխն ու գազարը։ Սոխը կտրատում ենք բարակ օղակներով, գազարը՝ բարակ շերտերով (կամ անցկացնում ենք քերիչով)։

Սոխին ու գազարին ավելացնում ենք աղ, շաքարավազ, քացախ, խառնում։ Թողնում ենք 10 րոպե։

Ավելացնում ենք սոյայի սոուսը, համեմը, սեւ պղպեղը, վրան ճզմում սխտորը։

Մնացած բուսական յուղը լցում ենք թավայի մեջ, ավելացնում կարմիր կծու պղպեղը։ Մարմանդ կրակի վրա թողնում ենք եփվի այնքան, մինչև համեղ հոտ գա։ Չենք թողնում, որ պղպեղի հատիկները վառվեն, դրանք պետք է հաղորդեն իրենց համը, գույնը և սրությունը:

Պղպեղով հագեցած յուղը լցնում ենք համեմունքների և սխտորի վրա: Խառնում ենք։

Վարունգը և պղպեղը լվանում ենք, մաքրում: Պղպեղը և վարունգը շերտերով կտրատում ենք։

Սոխով գազարին ավելացնում ենք վարունգը, պղպեղը և հնդկահավը։ Խառնում ենք։

Ավելացնում ենք կտրատած համեմը, խառնում:

Աղցանը առնվազն 1 ժամ թողնում ենք հանգստանա, ցանկալի է՝ մեկ օր։ Մատուցում ենք սառը վիճակում։ Բարի ախորժակ։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝