Դեռ պատմությունը ցույց կտա, թե ովքեր են իրական սրիկաները. Երջանիկ Ղազարյան

Երեւանի ավագանու իշխանական եւ ընդդիմադիր անդամները ձեռք ձեռքի տված ջնջեցին ծնունդով շուշեցի պետական գործիչ, հրապարակախոս, Կոմունիստական կուսակցության անդամ Սարգիս Կասյանի (Տեր-Կասպարյան) անունը Երեւանի փողոցներից: Ու այդպես էլ երեկ ավագանու նիստին որեւէ անդամ չհիշեց, որ հենց Կասյանի օրոք Լոռին վերամիավորվեց եւ ձեւավորվեց ներկա ՀՀ տարածքը: Ինչեւէ, Կասյանի անվան փողոցը վերանվանելու հարցում ավագանին հատուկ «օպերացիա» էր մշակել` այն դարձնելով Վազգեն Առաջինի անվան փողոց` մի կողմից Եկեղեցու ականջն էին շոյել, մյուս կողմից էլ` հակազդեցությունը զրոյացրել. ո՞վ պետք է դեմ լիներ սիրված Վեհափառի անվան փողոցին: Թե ինչպես են վերաբերվում փողոցի անվանափոխությանը Կոմկուսում, «Իրավունքը» պարզեց ՀԿԿ կենտրոնական կոմիտեի առաջին քարտուղար ԵՐՋԱՆԻԿ ՂԱԶԱՐՅԱՆԻ տեսակետը:

— Նախ գտնում եմ, որ շատ ավելի կարեւոր խնդիրներ եւ հարցեր կային եւ կան Երեւանի ու ընդհանրապես Հայաստանի առաջ ծառացած, քան փողոցի անվանափոխում կատարելն է: Այս իշխանությունները դեռեւս 2017 թվականին, երբ ընդդիմություն էին, նման հարց բարձրացրել էին, հիմա իրենք մեծամասնություն են ու գնացին այդ քայլին: Արսեն Ամիրյանի անվան փողոցն էլ փոխեցին եւ դրեցին Վռամշապուհի անունով, բայց ժամանակը ցույց տվեց, որ ճիշտ չէ, եւ որոշումը փոխվեց, եւ փողոցը նորից դարձավ Ամիրյան: Իհարկե, ես ոչինչ չունեմ` Վազգեն Առաջինի անձի եւ գործունեության հետ կապված, նա արժանի մարդ էր: Բայց Երեւանում կան ուրիշ փողոցներ, որոնք կարելի էր անվանափոխել եւ դնել Վազգեն Առաջինի անունով: Ի դեպ, ինչ-որ մարդիկ մեկնաբանություններ են իրենց թույլ տվել, թե «ազատվեցինք սրիկայից» եւ այլն, դեռ պատմությունը ցույց կտա, թե ովքեր են իրական սրիկաները: Ավելին` կան փողոցներ, որոնք իսկապես պետք է անվանափոխվեն, օրինակ, Սիմոն Վրացյանի, Դրոյի անվան փողոցները: Նրանք շատ ավելի վատ դեր են ունեցել Հայոց պատմության մեջ: Այնպես որ, միանշանակ մենք այս որոշումը դատապարտում ենք: Նրանք չէ, որ պետք է գնահատական տան իմ նախկին ղեկավարների եւ կուսակցական գործիչների գործունեությունը: Պատմությունը, համոզված ենք, կտա նաեւ իրենց արժանի գնահատականը, թող երբեք չկասկածեն:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝