Ժողովուրդն արդեն ոտքի է ելել, սրանց վերջը շատ դաժան է լինելու. Դավիթ Մկրտչյան

Երեկ առավոտյան ձերբակալվեց ՀՀԿ փոխնախագահ Արմեն Աշոտյանը: Իսկ Հակակոռուպցիոն դատարան ներկայացվեց կալանքի միջնորդություն: Աշոտյանն իրեն մեղավոր չի ճանաչում` այս ամենը համարելով բացահայտ եւ ցինիկ քաղաքական հետապնդում: Այս մասին «Իրավունք TV»-ի տաղավարում զրուցել ենք ազատամարտիկ ԴԱՎԻԹ ՄԿՐՏՉՅԱՆԻ հետ:

— Ներքաղաքական իրավիճակը նոր շրջադարձ ունեցավ, ձերբակալվեց երկրի ամենամեծ քաղաքական ուժերից մեկի փոխնախագահը: Ի՞նչ կասեք այս մասին:

— Աշոտյանի ցավը տանեմ: Սա այս իշխանությունների վերջին սրիկայությունն է, իրենց «ժողովրդավարական բաստիոնում» բռնել են համար մեկ ընդդիմադիր ամենաուժեղ տղերքից մեկին: Բնականաբար, սա քաղաքական հետապնդում է, բայց այս իշխանությունը թող իմանա, որ Աշոտյանի տղա տեսակն արդեն ապացուցված է 44-օրյա պատերազմում: Այդ օրերի ապրումները տեսած Աշոտյանին ոչինչ ու ոչ ոք չի կարող կանգնեցնել, ինչ սրիկայություն ուզում են անեն: Աշոտյանը հաղթելու է, հայ ազգը հաղթելու է: Սա այս սրիկա իշխանությունների վերջին տարին է: Սրանց «ռադ» է անելու հայ ժողովուրդը, որոնց իրենց վարած քաղաքականությամբ` բռնաբարում են ամեն օր: Ժողովուրդն արդեն ոտքի է ելել, գազազած է, սրանց վերջը շատ դաժան է լինելու, ինչքան նման սրիկայություններ անեն: Իհարկե, սպասելի էր ինձ համար, որ պետք է Աշոտյանին ձերբակալեն: Իմ հետեւից էլ են ընկած, ինչքան լուրջ մարդ կա, բոլորի հետեւից ընկած են: Ու սրանց թվում է, թե Աշոտյանի նման տղերքին ձերբակալելով ու  լիկվիդացնելով` իշխանափոխությունից կխուսափե՞ն: Ավելի վատ իրենց համար, եթե Աշոտյանի նման տղերքը չլինեն դրսում, այս շարժումը չառաջնորդեն , ժողովուրդը իրենց կսատկացնի բառիս բուն իմաստով: Իսկ որ Աշոտյանի նման տղերքը գոնե առաջնորդեն այն պայթյունը, որը շուտով լինելու է, գոնե քաղաքակիրթ ավարտ կլինի: Ի վերջո, կա քաղաքակիրթ ձեւ` սրանց հեռացնելու, եւ կա 2020 թվականի նոյեմբերի 9-ի տարբերակը, երբ սրանք, մտնելով բունկերները, փրկվեցին: Այս անգամ նրանց բունկերները չեն փրկելու: Բունկերների մկան ծակերի մեջ էլ ժողովուրդը գտնելու է:

— Ստացվում է, որ այս իշխանության թիրախում առաջին հերթին հենց պատերազմի մասնակիցներն են: Գեներալներ Գրիգորի Խաչատուրովն ու Միքայել Արզումանյանը կալանավորված են, հիմա էլ Արմեն Աշոտյանը… Ինչո՞վ սա կբացատրեք:

— Սրանք թուրքերի դրած իշխանություններն են: Այդ տեսակին ատում են ի սկզբանե եւ այդ տեսակից վախենում են: Խաչատուրովի նման տղուց էլ են վախենում, բայց չեն հասկանում, որ այդ տղերքին լիկվիդացնելն ավելի վատ է լինելու իրենց համար: Գազազած ժողովրդին ո՞վ է առաջնորդելու, որ գոնե սրանց քաղաքակիրթ ձեւով հեռացնեն: Այն օրն Ազգային ժողովում նախկին պատգամավոր Գեւորգ Պետրոսյանի ասած` մի վարազի արտաքինով մեկը կա ՀՀ մրցակցության պաշտպանության հանձնաժողովի անդամի ընդդիմության կին թեկնածուին ասում է` դուք ժողովրդին ոչխար եք ասել ձեր ֆեյսբուքյան էջում: Այդ կինը չգիտեմ ինչ էր գրել, բայց դուք` ՔՊ-ականներով, այս ժողովրդին ոչխարի տեղ եք դրել ու գառի նման մորթել եք: Նորից եմ ասում` եթե խելք ունեն, թեպետ չունեն, իրենք պետք է ուզեն, որ Աշոտյանի նման տղերքը դուրսը լինեն, որ ամեն ինչ քաղաքակիրթ ձեւով տեղի ունենա: Իսկ եթե մտածում են, որ դրանով իշխանափոխությունը կկանխեն, չարաչար սխալվում են: ԱԺ «Հայաստան» խմբակցության պատգամավոր Աղվան Վարդանյանն ասում է` անհրաժեշտ է 100 մահապարտ, որոնք կունենան նույն նպատակը ու կկանգնեն մինչեւ վերջ` պատրաստ կյանքը զոհելու: Աղվան Վարդանյանի կյանքին մեռնեմ, իրեն հարգում եմ, ՀՅԴ-ին միշտ եմ հարգել, թեպետ շատ հարցերում քննադատել եմ իրենց: Աղվան Վարդանյանը իսկական դաշնակ տղա է, որ էս սրիկաներին չընտրեց 2018-ին: Դաշնակը չպետք է ընտրի սրանց, դաշնակը պալիտիկա պիտի չխաղա, այլ առաջնորդվի «մահ կամ ազատություն» սկզբունքով: Ու հիմա ասում եմ` ոչ թե 100 մահապարտ, այլ 100 հազար մահապարտ կա Հայաստանում, որ պատրաստ են ելնել եւ իրենց կյանքի գնով այս սրիկա, ազգակործան, ցեղասպան իշխանություններին վռնդել: Այդ 100 հազարավոր տղերքը պատրաստ են մեռնեն ու նեղանում են, որ հենց-նենց ցույցեր են անում: Ասում են` ելնենք, գնանք կտրուկ քայլերի` կամ այս կողմ, կամ` այն: Ժողովուրդն այս մասին է խոսում, եթե ՔՊ-ականներին ուրիշ բան են զեկուցում, ուրեմն` չեն տիրապետում իրավիճակին: Շատ շուտով իրենք կտեսնեն: Դե պատկերացրեք, որ Աշոտյանի նման տղերքը չառաջնորդեն, ինչ կկատարվի, պայթելո՛ւ է: Չեն կարողանալու սրանք առնեն նրա դեմը, ինչը սպասվում է մեր երկրին: Ես ինչ կանխատեսել եմ, եղել է: Սրանք ոչ թե դուխով են, այլ հիմար են, որ չեն տեսնում այդ վտանգը: Սրանց «դուխը» երեւաց 2020-ի նոյեմբերի 9-ին, որ մտել էին բունկերների մկան ծակերը, դե թող դուրս գային: Իսկ մինչեւ այդ երեւաց նաեւ նրանց անխելքությունը: 2020 թվականի պատերազմից առաջ Թուրքիան ու Ադրբեջանը Արցախի սահմանի վրա զորավարժություններ էին անում, սրանց «վեջը» չէր, մարդ էլ կար, ասում էր` դե դուխով են, ասում էի` դուխով չեն, անխելք են, չեն հասկանում, թե ինչ է սպասվում մեզ: Այդպես էլ անխելքությամբ ազգն ու պետությունը կործանեցին:

ՀՐԱՆՏ ՍԱՐԱՖՅԱՆ

Հ.Գ.- Հարցազրույցն ամբողջությամբ տեսանյութում.