Հայաստանը գտնվելու է սարսափելի ճնշման տակ․ Հայ-թուրքական հարաբերությունների կարգավորման տնտեսական հետքը

Հայ-թուրքական հարբերությունների կարգավորումը ի՞նչ կտա Հայաստանի տնտեսությանը հարցի պատասխանը փորձել ենք ստանալ տնտեսագիտության պրոֆեսոր ՎԱՐԴԱՆ ԲՈՍՏԱՆՋՅԱՆԻՑ, ով փաստեց․

-Հարցը տնտեսական չէ, բոլորովին այլ է.  Ալիևի միջոցով արտահայտվող՝ Թուրքիայի որդեգրած նախապայմաններից, մոտեցումներից հասկանալի է դառնում, որ այս բարդ ընկերակցության պայմաններում Հայաստանը գտնվելու է սարսափելի ճնշման տակ: Անշուշտ, այս տարածաշրջանում  իշխող-պետությունները Ռուսաստանն ու Թուրքիան են, և Հայաստանի նման փոքր երկրի համար չափազանց դժվար է դիմակայել այս ճնշումներին: Հիմա ամբողջ հարցն այն է, թե որ երկրի, կոպիտ ասած, հսկողության կամ ազդեցության պայմաններում, Հայաստանը կկարողանա իրեն պահել:  Անցած տասնամյակները ցույց տվեցին, որ Ռուսաստանի ազդեցության պարագայում Հայաստանի անվտանգությունն ինչ որ չափով պաշտպանված էր , բացի այդ Հայաստանը մեծապես օգտվել է  Ռուսաստանի ռեսուրսներից: Միայն այն հանգամանքը, որ այսօր երեք միլիոնից ավելի հայեր հանգրվանել են Ռուսաստանում և կարողանում են հանգիստ ապրել, բավարար է ասել, որ  կայունության, անվտանգության ապահովման առումով, Ռուսաստանի ազդեցությունը տարածաշրջանում Հայաստանի շահերից է բխում, իսկ այդ ազդեցության կորուստը կարող է հղի լինել մեծ հետևանքներով: Ինչ վերաբերվում է Թուրքիային, իհարկե նրա տնտեսությունը, արդյունաբերությունը զարգանում է, բայց Թուրքիան Հայաստանի Հանրապետությանը կընձեռի՞ մեծ հնարավորություն՝ տնտեսությունը զարգացնելու, համաշխարհային շուկաներում տեղ գրավելու համար: Խիստ կասկածում եմ։

Տնտեսագետի պնդմամբ․

-Հայ-թուրքական սահմանի բացմամբ ոչ թե տնտեսական, այլ քաղաքական խնդիր է լուծվում, Եվրոպային ընդհանրապես չի էլ հետաքրքրում, նրանք, ըստ էության, չգիտեն էլ, թե Հայաստանն իրականում ինչ երկիր է,  որտեղ է գտնվում: Հիմա իրենք կարող են սիրաշահել, մեր գլուխը շոյել, բայց իրենց նպատակը մեկն է՝ Ռուսաստանին կաթվածահար անել և դուրս մղել տարածաշրջանից:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝