Ռուսական «Կատյուշան» եւ հայկական «Քոչարին» համատեղ պարով ներկայացան հանդիսատեսին

Հունիսի 4-ին ՌԴ Սոլնեչնոգորսկի շրջանի Լունևո գյուղում «Անուշ» ազգային պարային համույթը համերգային շրջանի փակումը նշեց «Հոգու պար» համերգային ծրագրով, որի ընթացքում ներկայացան «Հաղթանակ», «Կատյուշա», «Իմ Հայաստան», «Տարազ», «Նազանի», «Բալենի» և «Բերդ» խմբերը՝ նոր բեմադրված պարային համարներով: Այս առիթով «Իրավունքը» զրուցեց համույթի հիմնադիր-գեղարվեստական ղեկավար ԱՆՈՒՇ ԳՐԻԳՈՐՅԱՆԻ հետ:

— Ինչպես՞ անցավ համերգային ծրագիրը:

— Համերգը տևեց մոտ երեք ժամ: Երեխաները շատ լավ պատրաստվել էին: Բեմադրությունն ավարտեցինք «Ադանա» պարային համարով: Կային նաև հրավիրված ռուսական երգի և պարի խմբեր: Նաև ունեինք շատ հետաքրքիր մտահղացում՝ ռուսական և հայկական պարերի խառնուրդ:

— Խոսքը՝ «Քոչարի» և «Կատյուշա» պարերի մասի՞ն է:

— Այո, մեր սաները պարեցին «Կատյուշա» և «Քոչարի» պարերը միասին: Ուղղակի «Կատյուշան» պարեցին ռուսական հագուստով, իսկ «Քոչարին»՝ հայկական:

— Երկու երկրների` հայ և ռուս ժողովրդի պարի միաձուլումը համատեղ պարի ընթացքում հանդիսատեսն ինչպե՞ս ընդունեց:

— Համերգին ներկա էր և՛ հայ, և՛ ռուս հանդիսատեսը: Այն ուղեկցվեց անդադար ծափերի ներքո: Չզգացինք, թե երեք ժամն ինչպես անցավ: Եղան շնորհակալական խոսքեր: Ամեն ինչը շատ մեծ էներգետիկայով էր լցված: Երեխաները պարում էին համախմբված և մեծ նվիրումով: Համերգից հետո մեծ հայկական հյուրասիրություն էինք կազմակերպել, որտեղ հիմնականում շեշտը դրված էր հայկական ավանդական խոհանոցին: Բոլորը մոտեցան, հյուրասիրվեցին:

— Մեկտեղ ներկայացնելով հայկական և ռուսական պարը, ո՞րն էր ձեր պարային համույթի ասելիքը:

— Ինձ համար շատ կարևոր է, ապրելով օտարության մեջ, հարգել նաև տվյալ երկրի մշակույթը: Այս դեպքում խոսքը գնում է հայ և ռուս երկրների բարեկամության մասին: Երեխաների համար էլ էր շատ հետաքրքիր, որ կարելի է հայկական և ռուսական պարը համատեղել: Դա նաև երկու երկրների բարեկամության, ընկերության, լավ հարաբերությունների խորհրդանիշն է: Մենք պարի մեջ պահելով երկու երկրների կոլորիտը՝ ստացանք հետաքրքիր արդյունք, ինչը շատ կարևոր էր մեզ համար: Եվ հենց այդ «Կատյուշա-քոչարին» շատ մեծ արձագանք ունեցավ: Բոլորը հիացած էին, որովհետև չէին սպասում երկու երկրների մշակույթը նման ֆորմատով տեսնելու մեր բեմում: Հուսով եմ, որ հայ և ռուս մշակութային համագործակցությունը երբեք չի դադարի:

ՆՈՒՆԵ ԶԱՔԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝