«Մկների ժողովը»՝ ռուսական թատրոնի բեմում
ՄշակութայինՀունիսի 1-ին՝ Երեխաների պաշտպանության միջազգային օրը, Կ․ Ստանիսլավսկու անվան ռուսական դրամատիկական թատրոնում կայացավ մանկական ներկայացման առաջնախաղ։
Փոքրիկ հանդիսատեսի դատին հանձնվեց «Մկների ժողովը»՝ ըստ Աթաբեկ Խնկոյանի համանուն առակի: Առակները սովորեցնում են լինել բարի, ազնիվ, ընկերասեր: Կենդանիների փոխհարաբերությունների օրինակով բացահայտվում է մարդկային որակների էությունը, ցուցադրվում են արատները։
«Մկների ժողովը» երաժշտական ներկայացումը բեմադրել է թատրոնի խորեոգրաֆ Նունե Կիրակոսյանը։ Սա նրա ռեժիսորական դեբյուտն է: Ներկայացման մեջ խաղում են թատրոնի երիտասարդ դերասանները։ Ներկայացման բեմանկարիչը Արթուր Հարությունյանն է, զգեստների նկարիչը՝ Մարի Սարգսյանը, երաժշտական ձեւավորումը եւ պարերը` Նունե Կիրակոսյանի:
Ներկայացումը նախատեսված է 6+ տարեկան երեխաների համար։