Ինչպես է տոննաներով կոկաինը մտնում Հայաստան

Թմրամիջոցների ձեռք բերումն ու տարածումը վերջին տարիներին ավելի է հեշտացել՝ արձանագրում են թե՛ իշխանական թե՛ ընդդիմադիր պատգամավորները։ Սոցիալական հազարից ավելի էջեր կան, որոնք զբաղվում են թմրամիջոցների ապօրինի շրջանառությամբ։ Վիճակագրությունը փաստում է նաև, որ վերջին տարիներին մեր երկրում երիտասարդացել է թմրամիջոցներ օգտագործողների միջին տարիքը։ 2022 թվականին, օրինակ, նախորդ տարվա համեմատ շուրջ 45 տոկոսով աճել է թմրամիջոցների հետ կապված հանցագործոթյունների թիվը՝ շուրջ 1500–ից դառնալով գրեթե 2300․ սրանք միայն բացահայտված, արձանագրված դեպքերն են:

Սակայն այստեղ շատ պարզ հարցի ենք բախվում. Իսկ ինչպե՞ս է նման ծավալով թմրանյութ մտնում Հայաստանը: Վերջին օրինակը, երբ ավելի քան  250 միլիոն եվրո արժողությամբ թմրանյութը Հայաստանում հայտնաբերեցին մրգերի ներմուծմամբ զբաղվող ընկերության պահեստում՝ աշխատակիցների կողմից: Ու նույն պարզ հարցն է՝ իսկ ինչպե՞ս է այն մտել Հայաստանը՝ անցնելով բոլոր մաքսային ձեւակերպումները, առանց որոնց ընկերության պահեստ հասնել չէր կարող: Այն դեպքում, երբ մաքսային ծառայությունը սիրում է պարբերաբար ի ցույց դնել, թե, տեսեք, որքան լավ եմ աշխատում: Իսկ Ազգային անվտանգության ծառայությունը, որ զբաղվում է այդ գործով, ինչո՞ւ կանխավ չի կարողացել նման հսկայական խմբաքանակը տեսնել, ավելին՝ կանխել դրա մուտքը երկիր: Ըստ այդմ, կկանխվե՞ր Իտալիայում հայտնաբերված ավելի քան 2,7 տոննա բարձր մաքրության կոկաինի մուտքը Հայաստան,. Եթե այն իտալական պատկան մարմինները չհայտնաբերեին

Այսինքն, շատ կարճ ժամանակաշրջանում Հայաստանի հետ կապված մոտ 1 միլիարդ դոլարի թմրանյութերի պատմություններ արձանագրվեցին: Թմրանյութերի համաշխարհային մաֆիայում, իհարկե, շատ լուրջ մարդիկ են նստած: Եվ էլի պարզ հարց՝ իսկ նրանք այդ քանակի ապրանքը ռիսկի տակ կդնեի՞ն, եթե վստահ չլինեին, որ մեր սահմաններն այնքան թափանցիկ են, որ իմաստ ունի նման խմբաքանակներ ուղարկել: Իսկ կարո՞ղ է այնպես լինել, որ պետության սահմանները թափանցիկ են անգամ պետական բյուջեի հետ համադրելի ապրանքների համար, իսկ վերեւներում կամ անվտանգային մարմիններում այդ մասին գաղափար անգամ չունեն: Կարճ ասած, հարցերի պակաս չկա, եւ կփորձենք դրանց պատասխաններն առաջիկայում ստանալ:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝