Եթե ուզում ես բարոյալքել երիտասարդությանը, դարձրու պլանքյաշ. սա է իրենց նպատակը. նախկին դատախազ

Իտալական ANSA գործակալությունը հայտնել է, որ Իտալիայի Հարավային Կալաբրիա շրջանի Ջոյա Տաուրո քաղաքի նավահանգստում առգրավվել է 2,7 տոննա կոկաին, որը թմրավաճառները ծրագրում էին Հայաստան ուղարկել վրացական Բաթումի նավահանգստով: Կոկաինի տոպրակները թաքցված են եղել բանանով տարաներում, որոնք Իտալիա էին տանում Էկվադորից եւ պետք է ուղարկեին Հայաստան: Սեւ շուկայում 2,7 տոննա կոկաինի արժեքը կազմում է շուրջ 800 մլն եվրո: Զուգահեռ արդեն ՀՀ ԱԱԾ-ն հայտնեց, որ Հայաստանում գործող եւ մրգերի ներմուծմամբ զբաղվող ընկերության կողմից Էկվադորից պատվիրված ապրանքի հետ (Պանամայի, Իտալիայի եւ Վրաստանի տարածքով) Հայաստանի Հանրապետություն է ներմուծվել մոտ 1 տոննա կոկաին` շուրջ 250 միլիոն եվրո արժողությամբ, որն առգրավվել է: Այս մասին «Իրավունքը» զրուցեց նախկին դատախազ ՍՈԿՐԱՏ ՀՈՎՍԵՓՅԱՆԻ հետ:

— Միլիոնավոր եվրոներով գնված տոննաներով կոկաին են փորձում ներմուծել Հայաստան: Սա թերեւս դժվար է պատկերացնել, որ կարող է տեղի ունենալ` առանց իշխանության գիտության: Ի՞նչ կասեք այս մասին:

— Նպատակն ավելի խորն է, քան 800 կամ 250 մլն եվրոն, որովհետեւ երբ էլ ասես, թուրքը նրանց կտա այդ գումարը: Նրանց աչքը այդ փողի վրա չէ: Օրինակ` Տոկիոյի դատավարության գրքում մի միտք է ասվում, որ ճապոնացիները, առանց պատերազմի, հաղթում էին պատերազմում: Նրանք փող էին տալիս չինացիներին, ասում էին` պլան ցանեք ու ինչքան ուզում եք` ծխեք: Չինացիներն էլ ուռում էին, եւ այդպես ճապոնացիները Չինաստանը գաղութացնում էին: Եվ այսօր էլ 3 տոննա կոկաին բերելը փող աշխատելու համար չէ, այլ հայ երիտասարդներին բարոյալքելու: Եթե մարդուն ուզում ես բարոյալքել, դարձրու պլանքյաշ, կախվածություն ունեցողը ի՞նչ կամք պետք է ունենա: Կամք ունի այն մարդը, ով բարոյապես ամուր է, իսկ ուռելը ես անբարո բան եմ համարում: Նորմալ մարդը չի կարող իրեն թույլ տալ օրգանիզմը նման կերպ փչացնել:

— Պարոն Հովսեփյան, քաղաքական դատավարությունների իսկական մարաթոն է սկսվել երկրում` դատում են գեներալից մինչեւ զոհվածի մայր: Ի վերջո, ո՞րն եք տեսնում ելքը:

— Ես Նիկոլին գիտեմ 1992 թվականից եւ ասում եմ` ելքը միայն մեկն է պայքարել ամեն ձեւ: Սա առանց արյան չի հեռանալու: Այսօր մեկն ինձ ասաց, որ Եվրոպայի խորհրդի նախագահ Շառլ Միշելը բանակցությունների ժամանակ Նիկոլին ասել է` եթե չես ստորագրելու, մենք 180 կազմակերպություն ունենք Հայաստանում, ոտքի կհանենք, ու էլ Եվրոպա ոտք չես դնի: Այսինքն` նա դարձել է կամակատար, որին հարկավոր է քշել: Այսօր հանրապետությունում կյանքն այնքան է լարված, որ լուցկի տվող է պետք, որպեսզի կայծը բռնկվի: Մեկ-մեկ ասում են` բա ո՞վ գա իշխանության: Միշտ պատասխանում եմ` ժողովո՛ւրդ, հավաքվեք, ձեր միջից կծնվի հերոսը, որը ձեզ կառաջնորդի դեպի լուսավոր ապագա: Ու պետք չէ խաբված ժողովրդին մեղադրել: Եթե առաջ եվրոպացիներն էին խաբում, հիմա տեղացի ղեկավարները, բայց եթե ժողովուրդը համոզվի, որ իրոք կա ազնիվ մի մարդ, որը դուրս կգա եւ իրեն կտանի չոր ափ, կգնա իր հետեւից:

ՀՐԱՆՏ ՍԱՐԱՖՅԱՆ