Վերջին մեկ տարվա ընթացքում որքա՞ն հոգեմետ դեղեր են ներկրվել ՀՀ, ո՞ր երկրներից եւ ինչ սպառման ցուցանիշներ են գրանցվել

Թմրամիջոցների ապօրինի շրջանառության արձանագրված դեպքերի թիվը Հայաստանում աճել է 743-ով կամ 76,3 տոկոսով՝ կազմելով 1717 դեպք։ Այս մասին Ազգային ժողովում Դատախազության 2022 թվականի գործունեության մասին հաղորդման քննարկման ժամանակ ասել էր ՀՀ գլխավոր դատախազ Աննա Վարդապետյանը։ «Ընդ որում, իրացնելու նպատակով թմրամիջոցների ապօրինի շրջանառության դեպքերն աճել են 502-ով կամ 94,9 տոկոսով՝ կազմելով 1031՝ 2021 թվականի 529-ի դիմաց։ Թեեւ բարձր լատենտայնությամբ օժտված այս հանցագործությունների արձանագրված դեպքերի աճը բացահայտման տեսակետից դրական ցուցանիշ է, սակայն այն վկայում է թմրամիջոցների, հոգեմետ, հոգեներգործուն նյութերի, դրանց պատրաստուկների, դրանց համարժեք նյութերի եւ ածանցյալների աճող տարածվածության մասին եւ արտացոլում է հասարակական կյանքում առկա խիստ բացասական իրողություններ»,- ընդգծել էր դատախազը։
Հայտարարությունից անմիջապես հետ «Իրավունքը» գրավոր հարցման միջոցով դիմել ՀՀ առողջապահության նախարար Անահիտ Ավանեսյանին, խնդրելով տրամադրել մեզ տեղեկատվություն, թե վերջին մեկ տարվա ընթացքում որքա՞ն հոգեմետ դեղեր են ներկրվել ՀՀ, ո՞ր երկրներից, որ կազմակերպությունների կողմից եւ համեմատած վերջին երկու տարիներին հոգեմեդ դեղերի ներմուծման եւ սպառման ին՞չ ցուցանիշներ են գրանցվել(-աճի՞, թե՞ նվազման) եւ տարիքային ի՞նչ խմբերի է առավել շատ տրամադրվել հոգեմեդ դեղեր օրենքով սահմանված կարգով: Հատկապես ո՞ր հոգեմեդ դեղերն են ՀՀ-ում այսօր լայն սպառում ունենում:

Վերը նշված հարցմանը պատասխանելու օրենքով սահմանված ժամկետները անցել են, եւ ահա միայն նախօրեին Առողջապահության նախարարությունից մեզ տեղեկացրեցին, որ մեր հարցմանը պատասխանելու համար լրացուցիչ աշխատանքներ են իրականացվում, եւ, որ մեր հարցմանը կպատասխանեն 30-օրյա ժամկետում:

Իսկ մինչ այդ  հիշեցնենք, որ նախօրեին իտալական ֆինանսական գվարդիան հայտնաբերել է կոկաինի ռեկորդային խմբաքանակ՝ 2734 կիլոգրամ, որը Հայաստան է ուղարկվել Էկվադորից: Նշվում է, որ արգելված բեռը կալանավորվել է Կալաբրիայի հարավային շրջանի Ջոյա Տաուրո քաղաքի նավահանգստում։ Թմրանյութը սառեցված է եղել 12 մետրանոց փաթեթներում՝ 78 տոննա բանանի մեջ։ Այս երկու կոնտեյներները Գուայաքիլից (Էկվադոր) վրացական Բաթումի նավահանգստով ուղեւորվում էին Հայաստան։

Ինչը փաստում է, որ ՀՀ-ն վեր է ածվել նարկոտրաֆիկի գլխավոր տարանցիկ երկիրը, որտեղ վխտում են թմրամոլները: Ընդ որում այդ մասին փաստել է ՔՊ-ական խմբակցության պատգամավոր Էդուարդ Աղաջանյանը, ի լուր աշխարհի հայտարարելով. «Այսօր որևէ միջին վիճակագրական խնջույք առանց թմրանյութերի չի անցնում»: 

ԻԼՈՆԱ ԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝