Որն է Արցախի փրկության ՔՊ-ի ծրագիրը. Գաղտնազերծում է Վիգեն Խաչատրյանը

Ի վերջո ո՞վ եւ ինչպե՞ս պետք է զսպի թշնամու օր-օրի աճող ախորժակը ՀՀ սահմաններին տիրանալու առումով հարցի պատասխանը փորձել ենք ստանալ ԱԺ «Քաղաքացիական պայմանագիր» խմբակցության պատգամավոր ՎԻԳԵՆ ԽԱՉԱՏՐՅԱՆԻՑ, ով նկատեց.

-Ես լուծումը տեսնում եմ նրանում, որ մենք պետք է քայլ առ քայլ մեր ռազմական հավասարակշռությունը Ադրբեջանի հետ վերականգնելու ուղղությամբ աշխատենք, որովհետեւ վերջին հաշվով դա է դեր կատարելու: Ինչպես նաեւ չապավինել ՌԴ ուժերին, ստեղծել համապատասխան միջազգային  քաղաքական ճնշումներ Ադրբեջանի նկատմամբ:

Մենք պետք է նախ մեզ ապավինենք, պետք է ճիշտ հաշվարկենք մեր կարողությունները, ելնելով այդ կարողություններից դիմել համապատասխան քայլերի: Պետք է համագործակցությունը, այն միջազգային հանրության հետ, որը ի զորու է քաղաքական ճնշում գործադրել, խորացել: Դա կարող է եւ արդյունք չտալ, բայց դա այլընտրանք է:

-Պարոն Խաչատրյան, ի՞նչ է սպասվում Արցախին:

-Երեք ճանապարհ կա. առաջինը ներքին կարողությունների ուժեղացումն է, որը այս պառակտված, ցաքուցրիվ վիճակում դժվար է ապահովել: Շատերի համար այս խնդիրը առիթ է իշխանությունը զավթելու համար, մի մասի համար դա առիթ է հաճոյանալու համար մի պետության, որը տեսնում ենք՝ ինչի է հանգեցնում: Ներքին կարողությունների հզորացման մեջ մտնում է նաեւ բանակի հզորացումը: Երկրորդ ուղղությունը ռազմական ճանապարհով հարցի լուծումն է, բայց մենք չունենք դրա կարողությունը: Երրորդը միջազգային հանրության հետ համագործակցությունն է՝ ապահովելու համար անհրաժեշտ քաղաքական ճնշում Ադրբեջանի վրա, որը մեր ցանկացած ծավալով չունենք, որովհետեւ միջազգային հանրություն էլ իր շահերն ունի Ադրբեջանի հետ: Այնպես չէ, որ մեր դարդով են ապրում: Ինչ-որ սահմաններ կան, որ չեն անցնում: Այստեղ մենք արդյունք չենք գրանցել, բայց հաջողություններ ֆիքսել ենք: Հաագայի միջազգային դատարանի վճիռը կա, եւ Ադրբեջանը հանդես է գալիս այդ վճիռն արհամարհող պետություն: Դա անհետեւանք չի կարող մնալ: ՄԱԿ-ի ԱԽ-ում երկու անգամ հարցը քննարկվել է Լաչինի միջանցքի փակման եւ Ադրբեջանի ագրեսիայի հետ կապված: Մենք այդ ուղղությամբ շարունակելու ենք աշխատել:

Շատերն ասում Նիկոլ Փաշինյանը խոսում է Արցախն Ադրբեջանի կազմում տեսնելու մասին, իրականում չկա նման բան, նիկոլ Փաշինյանը չի ասել, որ Արցախը չի կարող մնալ հայկական: Ընդհակառակը, ասվում է, որ ամեն ինչ ենք անելու, որ Արցախը մնա հայկական: Բայց մենք չենք ուզում այդ հարցադրումը ներկայացնենք աշխարհին որպես հողային պահանջ Ադրբեջանից: Մենք դա ներկայացնում ենք որպես մարդկային իրավունքների պահանջ, որն ընկալելի է: Հայաստանի քաղաքականությունն ուղղված է կանխելու Արցախի հայաթափումը:

-Պարոն Խաչատրյան, հետաքրքիր է նաեւ ՁԵր տեսակետը «Նեմեսիսի» արձանի վերաբերյալ:

-Արձանն արդեն տեղադրված է, իմ կարծիքը ես չեմ ասի, դա անիմաստ եմ համարում:

Զրույցը` ԻԼՈՆԱ ԱԶԱՐՅԱՆԻ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝