Դադիվանքից հեռացնելով հոգեւորականներին ազերիները նպատակ ունեն լռեցնել հայի աղոթքի ձայնը, չպետք է թույլ տանք. Դադիվանքի վանահայր Տեր Հովհաննես քահանա Հովհաննիսյան

Ադրբեջանում կրոնական կազմակերպությունների հարցերով պետական կոմիտեի նախագահ Մուբարիզ Գուրբանլին ասել է, որ «հայ հոգևորականները պետք է հեռանան» Դադիվանքից։ Նրա խոսքերով՝ «հայերը ոչ մի կապ չունեն այդ վանական համալիրի հետ»։ «Այն պատկանում է կովկասցի ալբանացիներին, և վաղ թե ուշ դրա կառավարումը կիրականացվի ալբանա-ուդիական կրոնական համայնքի կողմից»,- ասել է կրոնական հարցերով պետական կոմիտեի ղեկավարը։

Ի՞նչ հետեւանքներ կարող է ունենալ հայ հոգեւորականներին Դադիվանքից հեռացնելու փաստը հարցի պատասխանը փորձել ենք ստանալ տարիներ շարունակ Դադիվանքի վանահայր Տեր Հովհաննես քահանա Հովհաննիսյանից, ով նախ նկատեց.

-Դուք գիտեք, որ մեր եկեղեցիների, վանքերի աղոթքը ուղիղ բարձրանում է առ Աստված: Այն, որ մենք այսօր ապրում ենք Արցախում եւ կարողանում ենք այսքան զրկանքներից հետո պահել մեր լեզուն, մեր մշակույթը, դա հենց մեր հոգեւոր հավատքի շնորհիվ է: Այսօր փորձում են ջլատել մեր հոգեւոր աղոթքները, ծվեն-ծվեն են անում, որպեսզի կարողանան տիրանալ ե՛ւ հոգեւորին, ե՛ւ ֆիզիկականին:

Ցավոք, մեր ներքին եւ արտաքին թշնամու ծրագրերը իրականանում են: 2018թ.-ին իշխանության գալուց ի վեր սկսեցին հարձակվել Մայր Աթոռի, Կաթողիկոսի վրա, սա թուրքի նպատակն էր, որը  մեր ներքին թշնամին կատարում է փուլ առ փուլ: Սա թշնամու ծրագրի մի մասն է, Դադիվանքից հեռացնելով հոգեւորականներին ազերիները նպատակ ունեն լռեցնել հայի աղոթքի ձայնը, բայց ինչպես Տերն է ասում. «Եթե ես լռեմ, ապա քարերը պետք է աղաղակեն»: Դադիվանքը դա մի վանական համալիր է, որտեղ բազում հայ սրբեր են աղոթել, եթե Դադիվանքի աղոթքը կտրվեց, մեզ համար շատ ծանր է լինելու, շատ...

Ադրբեջանը նման քայլերի գնում է ի շնորհիվ մեր անաստված իշխանությունների, սա է ցավը, այս իշխանությունները ուզում են վերջնակետին հասցնել պանթուրքիզմի ծրագիրը, որը 1915թ.-ից է մեկնարկել: 

ԻԼՈՆԱ ԱԶԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝