Այսօր արցախցուն ուժ տվողը հավատն է, ապագան խորհրդանշող հղի կինն ու զինվոր հայրիկին  սպասող երեխաններն են․ Տեր Անդրեաս քահանա Թավադյան

<<Ես չգիտեմ, թե մենք որտեղ ենք թերացել, որ այսօր այս իրավիճակում ենք, բայց թերացել ենք զինվորական, քաղաքական ասպարեզներում, այդ թվում՝ հոգևոր ասպարեզում, ամեն տեղում էլ թերացումներ ունեցել ենք։ Եթե որոշ մարդիկ սխալ են եղել, մեր սխալն էլ այն է եղել, որ ժամանակին դրա մասին չենք բարձրաձայնել>>,- <<Իրավունքի>> հետ զրույցում անդրադառնալով Արցախում առկա իրավիճակին, ասաց Շուշիի սուրբ Ղազանչեցոց եկեղեցու նախկին հոգևոր հովիվ տեր Անդրեաս քահանա Թավադյանը, ընդգծելով․

-Ամեն մի հայ պետք է անդրադառնա իր կյանքին, արարքներին, սխալներին ու բացթողումներին, որպեսզի թույլ տված սխալներն այլևս չկրկնվի և հնարավոր լինի նոր հաղթանակներ կերտել։ Մենք մի բուռ ժողովուրդ ենք, մեր «ես»-ը մի կողմ պետք է դնենք ու ինչ անում ենք՝ անենք հանուն ընդհանուրի։ Եթե ամեն մեկս մեր մասին մտածենք, այլ ոչ թե ընդհանուրի ու երկրի, սխալներ շատ-շատ դեռ կլինեն։

Թե ինչն՞ է արցախցի մեր հայրենակիցներին ուժ տալիս կանգուն մնալ հայրենի հողում հոգեւորականը տվեց ուշագրավ  պատասխան․

-Այսօր արցախցուն ուժ տվողը մեր դրոշն է, հավատը, ապագան խորհրդանշող հղի կինը եւ զինվոր հայրիկին  սպասող երեխանները։

Վերջում հոգեւորականն անդրադարձավ թշնամու կողմից օկուպացվաց Ղազանչեցոցի ներկա իրավիճակին․

-Ադրբեջանն ինչպես Նախիջևանում խաչքարերը ոչնչացրեց, այնպես էլ հիմա Շուշիում է անում։ Փորձում են Շուշին քրիստոնեական բոլոր արժեքներից զրկել, այնպես անեն, որ այնտեղ բացի մզկիթներից՝ որևէ այլ բան չլինի։ 21-րդ դարում կանգնած եկեղեցին քանդում են, ու որևէ մեկը չի՞ նկատում, էլ ինչ սպասենք միջազգային հանրությունից։

ԻԼՈՆԱ ԱԶԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝