Ով է Էրդողանի կուսակցության հայ թեկնածուն եւ, որն՞ էր ուղիղ եթերում ուշաթափվելու իրական պատճառը. Գաղտնազերծում է պոլսահայ լրագրողը

«Հայկական համայնքը Թուրքիայում կայանալիք նախագահական ընտրություններին ավելի շատ հակված է քվեարկել ընդդիմության միասնական թեկնածու, քեմալական Ժողովրդահանրապետական կուսակցության առաջնորդ, ընդդիմության հիմնական առաջնորդ Քեմալ Քըլըչդարօղլուի օգտին»,-«Իրավունքի» հետ զրույցում անդրադառնալով մայիսի 14-ին Թուրքիայում կայանալիք նախագահական ընտրություններին, ասաց  պոլսահայ լրագրող, Թուրքիայում տպագրվող «Ակոս» պարբերականի հայերեն բաժնի խմբագիր Բագրատ Էստուկյանը, ընդգծելով.

-Առհասարակ, Թուրքիայի ժողովուրդը՝ ներառյալ հայերը, գոհ չեն իշխանության որոշումներից, ապաժողովրդավարական կեցվածքից։ Դրա համար հայությունն էլ մեծամասամբ ընդդիմադիր շարքերին պետք է որ աջակցի, ի նպաստ իրենց քվեարկի: Ի դեպ, Էրդողանի ցուցակում կա նաեւ մեկ հայ թեկնածու, նա բժիշկ է մասնագիտությամբ եւ ամբողջությամբ կիսում է Էրդողանի իշխանության տեսակետը բոլոր հարցերով, նրա անունն է Սեւազ Սվազօղլու, մայրը հայ է, իսկ հայրը` թուրք:

-Քըլըչդարօղլուի՝ իշխանության գալու դեպքում կփոխվի՞ Թուրքիայի քաղաքականությունը Հայաստանի հադնեպ:

Հիմնականում մեծ փոփոխություններ չեն ակնկալվում։ Բայց, կարծես թե, Քըլըչդարօղլուն հարևան երկրների հետ պետք է որ ուզի ավելի լավ հարաբերություններ մշակել։ Բայց, անշուշտ, Ադրբեջանի հետ նրանց հարաբերությունները չեն դադարի, նրանք էլ նույն հանգերգը պետք է կրկնեն՝ «Եղբայր պետություն»:

-Պարոն Էստուկյան, բայց արդյոք ընտրվելու շանսեր ունի՞ ընդդիմության թեկնածուն:

-Այո, նա Էրդողանի համար շատ ռեալ մրցակից է: Թուրքիայում վերջին 20 օրերին անցկացված 9 սոցհարցումներից միայն մեկի համաձայն է, որ Էրդողանը հաղթում է միասնական ընդդիմության առաջնորդ Քեմալ Քըլըչդարօղլույին։ Ավելին, հարցումները վկայում են, որ մոտ տասը տարի նախագահող Էրդողանը կարող է պարտվել հենց առաջին փուլում։ Էրդողանի համար արդեն իսկ լուրջ սպառնալիք էին գնաճն ու տնտեսական ճգնաժամը, դրան գումարվեց աղետալի երկրաշարժը, որը պաշտոնական տվյալներով մոտ 50 հազար մարդու կյանք է խլել։ Երկրի ներքին կամ արտաքին հանգամանքներով պայմանավորված՝ պատճառ դարձան, որ տվյալ պարագայում Թուրքիայի ընտրողները մոտավոր անցյալի համեմատ ավելի լուրջ դժվարությունների դիմակայեն, մասնավորապես տնտեսական կտրվածքով։ Այս հանգամանքը շատ ավելի իրատեսական է դարձնում ընդդիմության հաշիվները, որ ընտրությունից կարող է հաղթական դուրս գալ:

-Պարոն էստուկյան, նախօրեին ուղիղ եթերի ժամանակ էրդողանը ուշաթափվեց, հետո պատճառաբենց, որ մրսածության հետեւանք է, իրականում ի՞նչ կատարվեց:

-Պաշտոնապես հայտարարվեց, որ մրսել է, որ փորացավ էր սկսել, բայց արդեն տեւակն ժամանակ է, ինչ տարատեսակ լուրեր են շրջանառվում, որ Էրդողանը լուրջ առողջական խնդիրներունի, որը գաղտնի է պահում: Մասնավորապես ասում են, որ խնդիրը սրտի հետ է կապված, չգիտեմ...

Զրուցը` ԻԼՈՆԱ ԱԶԱՐՅԱՆԻ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝