Գյումրին դարձել է թատրոնի մայրաքաղաք

Գյումրիում ապրիլի 24-ից մայիսի 10-ը անցկացվում է «Գյումրու միջազգային թատերական փառատոն» նախագիծը, որին կմասնակցեն ավելի քան քսան թատրոններ ու թատերախմբեր՝ Երևանից, ՀՀ մարզերից, Վրաստանից և Ռուսաստանից: Փառատոնը մեկնարկվեց Երևանի Հրաչյա Ղափլանյանի անվան դրամատիկական թատրոնի «Մեծ լռություն» ներկայացմամբ, որը նվիրված է Հայոց ցեղասպանությանը զոհ դարձած մտավորականներին: Այս առիթով զրուցեցինք Գյումրու Վարդան Աճեմյանի անվան պետական դրամատիկական թատրոնի տնօրեն ԼՅՈՒԴՎԻԳ ՀԱՐՈՒԹՅՈՒՆՅԱՆԻ հետ:

— Պարոն Հարությունյան, Գյումրու միջազգային թատերական փառատոնի հետ կապված՝ կմանրամասնե՞ք:

— Ապրիլի 24-ից մինչև մայիսի 10-ը ներառյալ Գյումրիում անցկացվելու է Թատերական միջազգային փառատոն: Իհարկե, փառատոնի կազմակերպիչը  չի հանդիսանում Գյումրու Վարդան Աճեմյանի անվան դրամատիկական թատրոնը: Պարզապես այն իրականացվում է Գյումրիում, և գյումրեցի հանդիսատեսը պետք է ներկա լինի: Այդ դեպքում Գյումրու թատրոնի մասնակցությունը նպատակահարմար չէր, քանի որ մեզ արդեն ճանաչում են և ծանոթ են մեր խաղացանկին: Որոշվեց, որ այս անգամ մեր թատրոնը պետք է հյուրընկալի մասնակից մեծ թատերախմբերին: Վստահ եմ, որ ապրիլ-մայիս ամիսներին թատերական մեծ իրադարձություն է լինելու: Եվ հանդիսատեսը դիտելու է մոտ քսաներկու ներկայացում` Հայաստանի տարբեր քաղաքներից ժամանած թատերախմբերի մասնակցությամբ: Նաև ներկայացումներ կլինեն արտերկրից: Այդ ընթացքում շատ սիրով թատրոնն ընդունելու է բոլոր թատերախմբերին: Եվ որպեսզի թատերական փոխհամագործակցությունն ավելի լավ ընթանա, Գյումրու Վարդան Աճեմյանի անվան դրամատիկական թատրոնը միաժամանակ իր թատերական շրջագայություններն է սկսել Հայաստանի տարբեր մարզերում` սկսած Վանաձորից, Ստեփանավանից մինչև մեր հանրապետության մյուս քաղաքներ, մարզեր: Լինելու ենք Արթիկում, Գավառում, Աբովյանում, Հրազդանում, Գորիսում, Կապանում և այլուր:

— Ի՞նչ ներկայացումներով եք հանդես գալու մարզերում:

— Ներկայանալու ենք մի քանի ներկայացումներով: Գավառում խաղալու ենք երկու ներկայացում, որից մեկը մանկական, մյուսը` երեկոյան է, որը կոչվում է «Փարիզը վտանգավոր քաղաք է»: Վանաձորում արդեն խաղացել ենք «Հրաշագործը»: Պատրաստվում ենք Ե. Չարենցի ստեղծագործությունների հիման վրա «Բովանդակություն» ներկայացումով ներկայանալ Գորիսում, Կապանում: Աբովյանում խաղալու ենք «Սիրո քասթինգ» ներկայացումը, որի բեմադրությունը ՀՀ ժողովրդական արտիստ, պրոֆեսոր Նիկոլայ Ծատուրյանինն է: Փորձում ենք որքան հնարավոր է բազմաշերտ ներկայացումներով  ներկայանալ հանդիսատեսին: Ի դեպ՝ ասեմ, որ մեր մարզային հյուրախաղերին մեզ շատ աջակցեցին  նաև տվյալ մարզերի համայնքապետարանները:

— Հյուրախաղերին միայն Գյումրու թատրոնի դերասաննե՞րն են մասնակցելու, թե՞ այլ թատրոններից հրավիրված դերասաններ էլ են լինելու:

— Թատրոնի խաղացանկում ընդգրկված են տարբեր թատրոններից դերասաններ: Եվ, բնականաբար, իրենք էլ մեզ հետ կմեկնեն հյուրախաղերի տարբեր մարզեր: Դեռևս անցած տարի Գյումրու Վարդան Աճեմյանի անվան դրամատիկական թատրոնն ունեցավ հինգ առաջնախաղ, որոնք հիմնականում առանձնահատուկ էին նրանով, որ եղան փոխհամագործակցության շնորհիվ: Համագործակցեցինք Սոս Սարգսյանի անվան Համազգային թատրոնի հետ: Բեմադրեցինք «Հրաշագործը» ներկայացումը: Մեր համատեղ թատերական ծրագրին մասնակցում էր Համազգային թատրոնի գեղարվեստական ղեկավար, ՀՀ վաստակավոր արտիստ Նարինե Գրիգորյանը, դերասանուհի Տաթև Ղազարյանը:

Մայրաքաղաքից հրավիրվեց ռեժիսոր Գոռ Մարգարյանը, ով բեմադրեց Սթիվեն Քինգի «Միզերի» ներկայացումը, որտեղ հրավիրված դերասանուհին էր Տաթև Ղազարյանը:

Ֆրանսիայից հրավիրված հայ ռեժիսոր Սաթե Խաչատրյանը բեմադրեց «Սպասում» ներկայացումը, որը ևս համատեղ ներկայացում էր, որտեղ նաև ընդգրկված էր  մայրաքաղաքից հրավիրված դերասանուհի Տաթև Հովակիմյանը:

— Նաև այս տարի «Արտավազդ» մրցանակաբաշխության ժամանակ մի քանի անվանակարգերում մրցանակներ ստացաք:

— Այո, այս տարի Գյումրու Վարդան Աճեմյանի անվան դրամատիկական թատրոնն «Արտավազդ» մրցանակաբաշխության ժամանակ արժանացավ մրցանակների հետևյալ անվանակարգերում`

ՋԵՄՄԱ ԱԴԱՄՅԱՆԸ ` «Լավագույն երիտասարդ դերասանուհի» Գյումրու Վ.Աճեմյանի անվ. դրամ.թ-ն, «Սպասում» (Կարոլին, Կին, Դայակ) ներկայացումով:

ՏԱԹԵՎ ՂԱԶԱՐՅԱՆԸ՝ «Լավագույն կին դերակատար» «Միզերի» ներկայացման մեջ Էննի Ուիլքսնին մարմնավորելու համար:

ԳՈՌ ՄԱՐԳԱՐՅԱՆԸ` «Լավագույն երիտասարդական ներկայացում» և «Լավագույն ռեժիսուրա», «Միզերի» և «Բովանդակություն» ներկայացումների համար:

ՆԱՐԵԿ ԿՈՍՄՈՍԸ` «Լավագույն երաժշտության հեղինակ» «Միզերի» և «Բովանդակություն» ներկայացումների համար:

— Նոր հետաքրքիր անակնկալներ լինելո՞ւ են:

— Եթե հիմնականում թատրոնը հյուրախաղերով լինում էր Վանաձորում և Երևանում, ապա այս դեպքում անակնկալն այն է, որ մենք լինելու ենք մարզերում` Գավառում, Աբովյանում և Հրազդանում, որտեղ երկար ժամանակ մեր թատրոնը չի եղել:

— Ինչպե՞ս է թատրոնին դիմավորում մարզերի հանդիսատեսը:

— Առայժմ եղել ենք Լոռու մարզում, որտեղ շատ ջերմ ընդունելության ենք արժանացել: Իսկ ՀՀ մյուս քաղաքներում, մարզերում, որտեղ դեռ չենք եղել, վստահ եմ, որ սիրով սպասում են մեզ:

— Գյումրեցիները հայտնի են իրենց հումորով, Թատերական փառատոնի հետ կապված, նրանց կողմից եղա՞ն արձագանքներ:

— Երբ դրվեցին թատրոնի պաստառները, գյումրեցիները կես կատակ ասում էին` Գյումրին դարձել է թատրոնի մայրաքաղաք: Իրենք դրանով ոգևորվում և հպարտանում են: Գյումրեցին սիրով է ընդունում բոլոր այն հյուրերին, ովքեր գալիս են:

ՆՈՒՆԵ ԶԱՔԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝