Ֆրանսիական ժողովրդական հեքիաթները՝ հայ հեղինակի նկարազարդումներով

Ապրիլի 21-ին, ժամը 17:00-ին, Հովհաննես Շարամբեյանի անվան ժողովրդական արվեստների թանգարանում (Աբովյան 64) տեղի կունենա ՀՀ վաստակավոր նկարիչ Վլադիմիր Աբրահամյանի նկարազարդած՝
«Ֆրանսիական ժողովրդական հեքիաթներ» գրքի էսքիզների ցուցահանդեսի բացումը:

1988թ-ին «Արեւիկ» հրատարակչությունը լույս էր ընծայել «Ֆրանսիական ժողովրդական հեքիաթներ» անվանումով գիրք, որտեղ տեղ էին գտել Վ. Աբրահամյանի նկարազարդումները: Թանգարանը նախաձեռնել է
այդ նկարազարդումների բնօրինակ էսքիզների ցուցադրություն: 35 տարի առաջ ստեղծված էսքիզները առաջին անգամ կցուցադրվեն:

Թանգարանում կթեւածի ֆրանսիական ժողովրդական իմաստնությամբ ու հումորով լի հեքիաթների շունչը՝ արտացոլված հայ նկարչի յուրօրինակ պատկերացումներում, նրա վրձնած վառ ու գունեղ կերպարներում: 

Կցուցադրվեն նաեւ Վ. Աբրահամյանի մի քանի կտավներ, որոնք ստեղծել է՝ ներշնչվելով ֆրանսիական հեքիաթների կերպարներից: Վ. Աբրահամյանը շուրջ 250 գրքերի գեղարվեստական ձեւավորման հեղինակ է։ Ցանկում եւ հայ գրողների գրքեր են, եւ թագմանություններ: Ուրույն տեղ է զբաղեցնում մանկական գրականությունը:

Նրա ստեղծագործական տարերքը մարդն է՝ իր բարդ հոգեբանական ներաշխարհով: Նա մասնակցել է մի շարք հանրապետական, համամիութենական եւ միջազգային ցուցահանդեսների՝ Շվեդիա, Լեհաստան, ԱՄՆ, ՌԴ, Ֆրանսիա, Չինաստան եւ այլն: Վ. Աբրահամյանի ստեղծագործությունները գտնվում են Հայաստանի ազգային
պատկերասրահում, աշխարհի տարբեր մասնավոր հավաքածուներում:

Ցուցադրությունը նվիրված է Հայաստանում անցկացվող Ֆրանկոֆոնիայի միջազգային օրերին։ Այս մասին տեղեկացնում են Հովհաննես Շարամբեյանի անվան ժողովրդական արվեստների թանգարանից

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝