Չբացահայտված Եվրոպա. ներկայացնում է մեցցո-սոպրանո Վարսենիկ Ավանյանը

«Կանտատա» մշակութային ՀԿ-ն ներկայացնում է նոր եւ բացառիկ «Չբացահայտված Եվրոպա» երաժշտական նախագիծը։ Առաջին համերգը կկայանա ապրիլի 21-ին, ժամը 19:00-ին՝ Առնո Բաբաջանյան համերգասրահում եւ նվիրված է Ֆրանկաֆոնիայի միջազգային օրվան, որին ելույթ կունենա Ա․ Սպենդիարյանի անվան օպերայի եւ բալետի ազգային ակադեմիական թատրոնի մեներգչուհի, մեցցո-սոպրանո Վարսենիկ Ավանյանը։ Համերգը կուղեկցվի դանշակահար Ելենա Վարդազարյանի նվագակցությամբ։ Բեմադրող ռեժիսոր՝ ՀՀ արվեստի վաստակավոր գործիչ Արամ Սուքիասյան։

Ծրագրում ներկայացված է ֆրանսիական իմպրեսիոնիզմն իր ողջ գունապնակով։ Արվեստի այդ ուղղությունը հայտնի է ավելի շատ գեղանկարչությամբ, սակայն այս շրջանը հայտնի է նաեւ իր երաժշտությամբ, որը, սակայն քիչ է հայտնի երաժշտասերների շրջանակում։ Կհնչեն Մ․ Ռավելի «Շեհերազադե», «Պավան», «Հայտնի երգեր» (ժողովրդական երգերի շարք), «Հունական երգեր», Հ․ Բեռլիոզի «Վիլլանելե», Գ․ Ֆորեյի «Ադաջետո» եւ «Իմպրովիզ», Կ․ Դեբյուսիի «Երազ» ստեղծագործությունները։

Արաբական գիշերների էկզոտիկությունը միշտ էլ հետաքրքրել է Ռավելին։ Ստեղծագործության հիմքում 20-րդ դարի բանաստեղծ Տ․ Կլինգզորի «Շեհերազադե» բանաստեղծությունների ժողովածուն է, որը գրվել է Ռիմսկի-Կորսակովի համանուն սիմֆոնիկ սյուիտից ոգեշնչված։ Մ․ Ռավելի «Շեհերազադե» եռամաս վոկալ շարքը հեքիաթային գունեղությամբ արտահայտում է արաբական հեքիաթների մթնոլորտը, գույները եւ երանգները։ «Հայտնի երգեր» (ժողովրդական երգերի մշակումներ) շարքում ընդգրկված է ինչպես ֆրանսիական, այնպես էլ իտալական, հրեական, իսպանական երգեր, որոնք գրված են հին բարբառներով (Լիմոժ տարածաշրջանի, ռոմաներեն, իդիշ բարբառով)։ Ռավելի մշակմամբ «Հունական երգեր» շարքը հնչում է ֆրանսերեն լեզվով։ Հ․ Բեռլիոզի «Վիլլանելե» ստեղծագործությունը գրվել է Թ․ Գոտյեի «Ամառային գիշերներ» բանաստեծղությունների շարքի հիման վրա։

Նախագիծն իրականանում է ՀՀ ԿԳՄՍ նախարարության աջակցությամբ եւ Հայաստանի պետական ֆիլհարմոնիայի գործընկերությամբ։ «Չբացահայտված Եվրոպա» նախագիծը եվրոպացի հայտնի կոմպոզիտորների՝ Հայաստանում չկատարվող ստեղծագործություններից բաղկացած ծրագիր է։ Այն բաղկացած է վոկալ-կամերային երեք համերգներից, որոնցից երկուսը նվիրված է եվրոպական կոնկրետ երկրի (Ֆրանսիա, Գերմանիա), իսկ վերջինը՝ Եվրոպային։ Ստեղծագործությունները գրված են ձայնի, կամերային նվագախմբերի եւ կամերային այլ կազմերի համար։ Յուրաքանչյուր համերգ ուղեկցվելու է ռեժիսորի կողմից պատրաստված պրոյեկցիաներով՝ ծրագրի բովանդակությանը համապատասխան։

«ԿԱՆՏԱՏԱ» մշակութային հասարակական կազմակերպությունը հիմնադրվել է 2022 թ․ հուլիսին՝ Վարսենիկ Ավանյանի եւ Սոնա Խաչատրյանի կողմից։ Այն նպատակ ունի հասանելի դարձնել մշակույթը հասարակության բոլոր շերտերին, կրթել, դաստիարակել արվեստասեր սերունդ։ ՀԿ-ի նպատակն է նաեւ արտերկում տարածել հայկական մշակույթը եւ համագործակցության կամուրջներ կառուցել տարբեր երկրների մշակութային հաստատությունների հետ։ Կազմակերպության նախագահն է Ա․ Սպենդիարյանի անվան օպերայի եւ բալետի ազգային ակադեմիական թատրոնի մեներգչուհի Վարսենիկ Ավանյանը։ ՀԿ-ի կարեւորագույն առաքելությունն է մշակույթը հասանելի դարձնել նաեւ սահմանափակ հնարավորություններ ունեցող մարդկանց շրջանում։ Երգչուհու մշտական ունկնդիրների շարքում են տարբեր խնդիրներ ունեցող երեխաները։ Նա ելույթ է ունեցել նաեւ Դաունի համախտանիշ ունեցող երեխաներից կազմված անսամբլի հետ։ 

tomsarkgh.am

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝