Թշնամին կուտակումներ է անում, ինչ-որ բաների են պատրաստվում, բայց գործողություն չկա․ Ինչ է կատարվում Գեղարքուիքում

 <<Սեպտեմբերյան դեպքերից հետո ընդհանրապես թշնամին ուժեղ կուտակումներ անում  արել Վարդենիսի շրջակայքում, էլ չասեմ, որ այդ սեպտեմբերյան դեպքերից հետո գրավված տարածքներում իրենք միանգամից շինարարական աշխատանքներ են կատարել, դիրքավորվել, ավելի են ամրացել, բայց ոչ թե ժամանակավոր մնալու համար, այլ՝ հիմնական։  Պայթյունավտանգ իրավիճակ է, որովհետև միշտ էլ, երբ Արցախում որևէ բան է լինում, Սյունիքում՝ ինչ-որ մի տեղ, նաև Վարդենիսում է ինչ-որ գործողություն լինում, որպեսզի նաև ուշադրությունը շեղեն բուն նպատակային կետերից։ Ընդհանուր իրավիճակը մեզ անհանգստացնում է, որ կարող է ամեն վայրկյան այստեղ էլ նույնը կրկնվել>>,- անդրադառնալով, թե ինչպիսինն է իրավիճակը Գեղարքունիքի սահմանային հատվածում ասաց  Գեղամասար խոշորացված համայնքի նախկին ղեկավար, համայնքի բնակիչ Հակոբ Ավետյանըը, ընդգծելով․ 

-Թշնամին կուտակումներ է անում, ինչ-որ բաների են պատրաստվում, բայց գործողություն չկա, կրակոցներ կամ այլ կարգի գործողություն չունենք այս պահին, բայց դա չենք կարող հուսադրող հանգամանք համարել: Բոլորն էլ ասում են՝ եթե թուրքն ուզի մեր գյուղ մտնի, 10 րոպեում մտնելու է, պատկերացնո՞ւմ եք՝ ինչքան վատ է դա։ Մարդիկ հիմա պատրաստվում են ոչ թե գարնանային աշխատանքների, տնտեսություն զարգացնեն, այլ մտածում են, որ պետք լինի՝ կկարողանա՞ն 10 րոպեում փախչել։

– Այսինքն՝ բնակչությունը չի՞ պատրաստվում դիմադրություն ցույց տալ, եթե կարիքը լինի։

– Այսինքն՝ ո՞նց դիմադրի, ինչո՞վ պատրաստվեն, ոչ մեկի ձեռքը զենք չկա, հասարակ գյուղացին ի՛նչ պետք է անի։ Սեպտեմբերյան դեպքերից հետո որոշ մարդկանց, այդ թվում՝ ինձ, զենք բաժանեցին, հետո որոշեցին, որ սահմանամերձ բնակիչների մոտից դրանք հետ են վերցնում, մենք էլ տարանք, հանձնեցինք։ Հիմա ուզում ենք պաշտպանենք, ինչո՞վ պաշտպանենք։

ԻԼՈՆԱ ԱԶԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝