Կլինի միանձնյա իշխանություն` ամբողջովին Տիգրան Ավինյանի վերահսկողության ներքո. Աբգարյան

Անդրադառնալով Երեւանի քաղաքապետի հնարավոր արտահերթ ընտրություններին`«Իրավունքի» հետ զրույցում ավագանու անկախ անդամ ԻԶԱԲԵԼԼԱ ԱԲԳԱՐՅԱՆԸ նշել է, որ իր համար կարեւոր է ոչ թե լիդերը, այլ թիմը: Նա նաեւ խոսել է Տիգրան Ավինյանի՝ քաղաքապետ դառնալու հավանականության մասին:

— «Ապրելու երկիր» կուսակցության համանախագահ Մեսրոպ Առաքելյանը նշել է, որ մասնակցելու են Երեւանի ավագանու ընտրություններին, իսկ այդ թիմից Երեւանի Կենտրոն վարչական շրջանի նախկին ղեկավար Վիկտոր Մնացականյանը չի բացառել նախկին քաղաքապետ Հայկ Մարությանի հետ միասնական հանդես գալը: Կմիանա՞ք այդ թիմին:

— Այս պահի դրությամբ նման խոսակցություններից, որ Հայկ Մարությանը կմասնակցի կամ ով կմասնակցի, ես տեղյակ չեմ, թե քաղաքական ուժերը ինչ են պլանավորում: Ինքս կմասնակցեմ, թե` ոչ, այս պահին չեմ կարող ասել, որովհետեւ ինձ մոտ էլ ամեն ինչ անորոշ է, չլինելով որեւէ կուսակցության անդամ, ինձ շատ ավելի դժվար է հասկանալ` կմասնակցեմ, թե` ոչ:Ես կողմնորոշովելու եմ ոչ թե լիդերով, այլ ավագանիով:

— Այդուհանդերձ, շրջանառվող անունների մեջ կա՞ թեկնածու, ում կարելի է վստահել Երեւան քաղաքի կառավարումը:

— Քանի որ ես բավականին դառը փորձ ունեմ, շատ լավ հասկանում եմ, որ խնդիրը թեկնածուի մեջ չէ, այլ թիմի մեջ է, հենց այդ պատճառով էլ չեմ կարողանում որեւէ որոշում կայացնել: Ինձ առնվազն պետք է տեսնել ցուցակը, թե ովքեր են լինելու ավագանու կազմում: Ցավոք սրտի, մեզանում միշտ նայել են միայն առաջին համարին, բայց ես լինելով ավագանու անդամ` շատ լավ հասկանում եմ` ինչ աղետ է քաղաքի համար անորակ ավագանի ունենալը: Դրա համար ինձ համար շատ կարեւոր է լինելու` ո՞ւմ հետ եմ ես թիմով աշխատելու, արդյո՞ք այդ մարդիկ կիսում են իմ մոտեցումները: Եվ նաեւ քաղաքական ուժերի ծրագիրն է շատ կարեւոր: Հենց «Իմ քայլի» հետ էլ ընթացքում ես հասկացա, որ մենք տարբեր մոտեցում ունենք: Ես դեմ եմ լիազորությունների կենտրոնացմանը քաղաքապետարանում եւ կողմ էի վարչական շրջանները ուժեղացնելուն, բայց տեղի էր ունենում հակառակը: Որքան էլ ես ելույթ էի ունենում, միայնակ էի մնում, այսինքն՝ դա ինձ համար սկզբունքային կարեւոր հարց էր եւ ոչ միայն դա: Ես ունեմ մի քանի սկզբունքային հարցերի շուրջ դիրքորոշում, եթե այդ դիրքորոշումը չի համընկնում որեւէ ուժի հետ, պարզապես, չեմ գնա:

— Ինչո՞ւ հենց այս ընթացքում քաղաքապետ Հրաչյա Սարգսյանը հրաժարական տվեց, մի՞թե այս որոշման հետեւում ընդամենը փոխքաղաքապետ Տիգրան Ավինյանի համար տեղ բացելն էր` որպես քաղաքապետի թեկնածու:

— Դա գաղտնիք չէ, արդեն մի տարի է, բոլորը տեսնում էին, որ քաղաքապետարանում երկիշխանություն էր տիրում, հիմա կլինի միանձնյա իշխանություն` ամբողջովին Տիգրան Ավինյանի վերահսկողության ներքո: Ինչ-որ առումով ես դա հասկանում եմ, որովհետեւ քաղաքային կառավարումը մեծ ռիսկերի հետ է կապված, եւ եթե դու թեկնածու ես, որը խնդիր ունի երեւանցիներից քվե ստանալու, բնականաբար, անհանգիստ ես լինում, որ կարող է քաղաքապետը ինչ-որ որոշում ընդունի կամ ինչ-որ քայլ անի, որը կազդի քո վարկանիշի վրա, եւ հիմա ինքն է ամբողջովին զբաղվելու այդ հարցով:

— Ինչպե՞ս եք գնահատում Տիգրան Ավինյանի թեկնածությունը:

— Այն, որ նա է լինելու թեկնածու, կարծում եմ` պաշտոնապես է հայտարարված, այստեղ երկու կարծիք չկա, իսկ գնահատականը, թե որքանով է նա վստահելի թեկնածու, երեւանցիները պետք է տան, անձամբ ինձ համար նա քաղաքապետի վստահելի թեկնածու չէ:

Ս. ԱՍԱՏՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝