Չեմ կարողանում պատկերացնել, թե որ պարագայում թույլատրելի կլիներ կացինը, որպես զենք, օգտագործող մարդուն գնդակահարել. Գրիգորյան

«Նայում եմ հայ պարեկների տեխնիկական հագեցվածությանը եւ ինձ թվում է` ապրում եմ աշխարհի ամենահարուստ երկրներից մեկում»,- «Իրավունքի» հետ զրույցում, անդրադառնալով մարտի 13-ին Հրազդանում պարեկի կողմից ենթադրյալ հանցագործի սպանությանը, նման տեսակետ է հայտնել սահմանադրագետ ՎԱՀԵ ԳՐԻԳՈՐՅԱՆԸ:

— Ենթադրյալ հանցագործին վնասազերծելուց պարեկը կրակել է քաղաքացու կրծքավանդակին, որի հետեւանքով նա մահացել է: Որքանո՞վ է պարեկի կողմից այս քայլը օրինաչափ:

— Տվյալ պարագայում, եթե մամուլում տեղ գտած տեղեկատվությունը ամբողջությամբ համապատասխանում է իրականությանը, եւ որեւէ այլ էական հանգամանքներ չկան, ապա պարեկները պետք է կրակեին ոչ թե նրա սրտին, այլ` ձեռքերին կամ ոտքերին: Աբսուրդ է պատկերացնել, որ, օրինակ՝ կարող է անձը կացինով կրակել պարեկներին, դրա համար նրա սրտին են կրակել, հատկապես երբ խոսքը հանցանքի մեջ կասկածվողի մասին է: Ես չեմ կարողանում պատկերացնել այնպիսի իրավիճակ, որի պարագայում թույլատրելի կլիներ կացինը, որպես զենք, օգտագործող մարդուն գնդակահարել:

— Կարո՞ղ ենք ենթադրել, որ պարեկներն ունեն փորձի ու գիտելիքի պակաս:

— Վերջին ամիսներին պարեկների մասնակցությամբ տեղի ունեցող դժբախտությունները վկայությունն են նրա, որ պարեկային ծառայությունն ընդհանրապես չի պատկերացնում այն առաքելությունը, որն իր վրա դրված է ՀՀ Սահմանադրությամբ եւ օրենքներով: Նրանք քաղաքացիների պաշտպանը դառնալու փոխարեն` դարձել են այն մահակի  ոչ ամենաիրավաչափ հատվածը, որը բանեցվում է քաղաքացիների նկատմամբ: Սկսենք ամենաառաջնային խնդիրներից, որ վրա հասան, երբ պարեկների կողմից բազմաթիվ քաղաքացիներ վրաերթի էին ենթարկվում, ապա մամուլում տեղ գտավ տեղեկատվություն, որ պարեկը բնակարան է թալանել եւ բռնվել է դեպքի վայրում, այնուհետեւ՝ պարզվեց, որ նույն անձը 9-ը բնակարան է թալանել, ԱԺ նախկին պատգամավոր, փաստաբան Գեւորգ Պետրոսյանի հետ տեղի ունեցած դեպքը, Հրազդանի սպանության դեպքը, սրանից ավելի պարզ ապացո՞ւյց, որ պարեկային ծառայության ռեֆորմ կոչեցյալը ոչ այլ ինչ է, քան խայտառակ եւ շատ խիստ վտանգավոր գործողություն: Այդ բարեփոխումները այլ կերպ անվանել չի կարելի, դրանք ՉԱՐԵփոխումներ էին, որովհետեւ՝ ոստիկանությանը առողջացնելու փոխարեն՝ ստեղծվեց ավելի վտանգավոր ինչ-որ ոստիկանության ծառայության տեսակ, եւ այդ ծառայողները չեն տիրապետում իրենց իրավունքներին, բարի չեն լինում անձանց ծանուցել իրենց իրավունքների եւ պարտականությունների մասին ու դառնում են վտանգի աղբյուր:

— Պարեկային ծառայության համար մեծ ներդրումներ են արվում, նոր մեքենաներ, աշխատավարձի վերանայում, մի՞թե ՀՀ-ում այս ծառայության կարիքն այդչափ զգացվում է:

— Երբ ես նայում եմ ՀՀ պարեկների տեխնիկական հագեցվածությունը, եւ այն միջոցներին, որոնք տրամադրվում է նրանց, ինձ թվում է, թե ես ապրում եմ աշխարհի ամենահարուստ երկրներից մեկում, բայց երբ նայում ես հայ զինվորի տեխնիկական հագեցվածությանը, վերադառնում ես այն իրականությունը, որում բոլորս գտնվում ենք: Բացի այդ, Հայաստանը միշտ զբաղեցրել է աշխարհի ամենաանվտանգ երկրների 5-ից 10-րդ հորիզոնականների միջակայքը, նման պարագայում այդքան միջոցներ հատկացնել ոստիկանության տեխնիկական հագեցվածությանը, անընդունելի է: Ես նախորդ իշխանությունների ժամանակ էլ եմ դեմ եղել ոստիկանության տեխնիկական հագեցվածության միջոցների ավելացմանը, հարց է ծագում, եթե ՀՀ-ն անվտանգ երկիր է, ու եղած միջոցները բավարար էին այդպիսի անվտանգության ցուցիչի հասցնելու, ապա ինչո՞ւ են տրամադրվում լրացուցիչ ցուցիչներ, կարո՞ղ է վերջում պարզվի, որ ոստիկանը ոչ թե ըստ Սահմանադրության եւ օրենքների պահանջի ծառայում է ի շահ պետության եւ քաղաքացիների, այլ ծառայում է ի շահ ինչ-որ քաղաքական խմբակների, խմբավորումների:

Հիշեցնենք, որ ըստ ՔԿ-ի, մարտի 13-ին Հրազդան քաղաքի բնակչուհուց ահազանգ է ստացվել այն մասին, որ անհայտ անձինք մուտք են գործել իր տուն: Ըստ ստացված հաղորդման՝ ահազանգի հիման վրա դեպքի վայր մեկնած ոստիկանության աշխատակիցները, քաղաքացուց տեղեկանալով, որ  վերջինիս տանը կից անասնագոմում մարդ կա, ներկայանալով` պահանջել են, որ վերջինս դուրս գա: Անասնագոմից դուրս է եկել մի տղամարդ՝ պարկով դեմքը ծածկած, ում ձեռքին եղել է կացին: Վերջինս պահանջել է իրեն բաց թողնել, այնուհետեւ կացնով անկանոն շարժումներ կատարելով, հարձակվել է ոստիկանության ծառայողների վրա՝ փորձելով վնասել նրանցից մեկին:  Ոստիկանության ծառայողները պահանջել են վայր դնել կացինը՝ տեղեկացնելով, որ հակառակ դեպքում կկիրառեն զենք: Սակայն տղամարդը շարունակել է կացնով անկանոն շարժումները՝ փորձելով վնասել պարեկային ծառայողներից մեկին:Պարեկն էլ իրեն ամրակցված «GLOCK» տեսակի ատրճանակով նախազգուշական 2 կրակոց  է արձակել, որի ընթացքում նշված տղամարդը կրկին փորձել է ձեռքին եղած կացնով հարվածել պարեկային ծառայողին, ով նշված ատրճանակով 1 անգամ կրակոց է արձակել տղամարդու ուղղությամբ՝ կրծքավանդակի շրջանում:

Ս. ԱՍԱՏՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝