Չպետք է թույլ տանք Հայաստանը գնա Ուկրաինայի հետքերով. Կարապետյան

Մի խումբ երիտասարդներ ակցիա իրականացրին Վազգեն Սարգսյանի կիսանդրու առաջ՝ զգուշացնելով, որ արեւմտյան ուժերին թույլ չեն տալու Մայդանի վերածել մեր հայրենիքը: Ներկաների թվում էր նաեւ «Զորակցություն Հայրենյաց Պաշտպանին» ՀԿ հիմնադիր-նախագահ ԱՆԻ ԿԱՐԱՊԵՏՅԱՆԸ, ում հետ զրուցել է «Իրավունքը»:

— Իսկապե՞ս կարծում եք, որ այսօր Հայաստանը Մայդանի վերածելու նախադրյալներ կան:

— Կարծում եմ, որ՝ այո, մեզ ամեն կերպ դրդում են կրկնել ուկրաինական Մայդանը Հայաստանում: Տեսեք, փետրվարի 24-ին Հայաստանի մայրաքաղաք Երեւանում իրենց ազգայնական հռչակած արեւմտամետ գործակալները եւ  պատերազմի առաջին իսկ օրերից փախած ՌԴ մի խումբ քաղաքացիներ իրականացրին բարբարոսական ակցիա՝ այրելով մեր միակ ռազմական դաշնակից պետության նախագահի նկարը, որից հետո ծածանելով Ուկրաինայի դրոշը՝ գոռում էին. «Կեցցե՛ Ուկրաինան»: Կիեւում էլ Մայդանը սկսվեց հենց նման ակցիայով: Իսկ հիմա ի՞նչ ենք տեսնում՝ Ուկրաինան կործանման շեմին է: Մենք ոչ մի դեպքում չպետք է թույլ տանք` Հայաստանը գնա Ուկրաինայի հետքերով: Իմ կարծիքով՝ այս պահին պետք է մտածենք Հայաստանի ու Արցախի մասին, թե ինչպես ենք Արցախը դուրս բերում շրջափակումից, այլ ոչ թե օտար երկրի դրոշները ձեռքներս վազվզենք Երեւան քաղաքով:

— Ակցիայի ժամանակ ասվեց, որ մեր քաղաքացիներն անգամ նախաձեռնում են Հայաստանում դրամահավաք՝ Ուկրաինայի բանակին աջակցելու համար: Ի՞նչ կասեք այս մասին՝ հաշվի առնելով, որ Ուկրաինան երբեք չի օգնել մեզ:

— Մե՞ր քաղաքացիները, դրանք վաղուց դադարել են մերը լինել, նման ակցիաների կազմակերպիչները վաղուց Արեւմուտքի հատուկ գործակալներ են դարձել, որոնք միմիայն սպասարկում են նրանց շահերը, այլ ոչ թե` Հայաստանի կամ Արցախի: Թույլ տվեք ասել, որ Ուկրաինան ոչ միայն չի օգնել, այլ նաեւ խրախուսել է մեր թշնամի պետության բարբարոսությունները եւ լիովին աջակցել Ադրբեջանին: Մենք նախ եւ առաջ պետք է մտածենք մեր բանակին ինչպես օգտակար լինենք, այլ ոչ թե` ինչպես աջակցենք մեր ռազմավարական դաշնակից երկրի թշնամու բանակին՝ սա աբսուրդ է: Դա մեր ազգային արժանապատվությունը նվաստացնող քայլ է:

— Ինչպե՞ս եք վերաբերվում ռուսաֆոբներին, ովքեր դուրս են գալիս այսօր փողոց` տարբեր ակցիաներով ընդդեմ Ռուսաստանի:

— Խիստ բացասական, որովհետեւ կա՛մ պետք է ծայրահեղ տգետ լինես, որ Արցախը շրջափակման մեջ, դուրս գաս, կանգնես ռուս խաղապահի առջեւ եւ ասես՝ «հեռացիր Արցախից», կա՛մ պետք է քո ազգի թշնամին լինես: Սա արակածախնդրություն է, եթե թույլ տվեցինք, որ Հայաստանն անցնի Արեւմուտքի վերահսկողության տակ, հստակ իմացեք՝ Արցախը հանձնելու են Արդբեջանին, ի դեպ, նույն Ուկրաինայում էին ասում, որ Արցախը ադրբեջանական է: Մենք այս պահին հնարավորինս ամուր պետք է պահենք հարաբերությունները Ռուսաստանի հետ եւ փորձենք համատեղ ուժերով շրջափակված Արցախը ապաշրջափակել եւ վերադարձնել իր բնականոն կյանքին:

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝