Ոստիկանությունը 10 օր ջարդել ու ավերել է ՊՆ նախկին շենքերը. Խանզադյան

Անօթեւան մնացած ՊՆ նախկին շենքի բնակիչները հանդիպում են ունեցել Պետեկամուտների կոմիտեի ներկայացուցչի հետ: Այս մասին «Իրավունքը» զրուցել է արդեն գրեթե երկու շաբաթ ՊՆ նախկին շենքի դիմաց շուրջօրյա նստացույց իրականացնող բնակիչներից մեկի՝ ԱՐԱՄ ԽԱՆԶԴԱԴՅԱՆԻ հետ:

— Կբացե՞ք փակագծերը, թե ինչ բովանդակություն ունեցավ ՊԵԿ ներկայացուցչի հետ հանդիպումը, որեւէ ընդհանուր հայտարարի եկե՞լ եք:

— Եթե չեմ սխալվում, ՊԵԿ-ի աշխատակազմի ղեկավարն էր, ով այդպես էլ որեւէ հարցի չկարողացավ պատասխանել, եւ հանդիպումը ոչ մի արդյունք չտվեց: Իրենք միայն կրկնում են նույն թեզը, թե շենքը վթարային է: Բայց մենք երկար ժամանակ այնտեղ ապրում էինք ու չենք տեսել, որ որեւէ հետազոտություն անցկացնեն՝ գեոդեզիա, սեյսմիկ ուսումնասիրություն եւ այլն: Բացի այդ, ընդհանուր 22 հազար քառ.մ  շինությունների մասին է խոսքը, դրանցից ո՞րն է, ըստ իրենց, վթարային, որը՝ ոչ, ՊԵԿ-ի ներկայացուցիչը որեւէ բացատրություն չկարողացավ տալ:

— Իսկ ի՞նչ պահանջ էիք ներկայացրել Պետեկամուտների կոմիտեի նախագահ Ռուստամ Բադասյանին:

— Պահանջներից մեկն այն էր, որ մեզ ներկայացնեն կառավարությանն ուղղված իրենց գրությունը՝ ՊՆ նախկին շենքերի վիճակի հետ կապված: Հարյուրավոր հարցերից առանձնացրել էինք ընդամենը երեքը, որոնք առնչվում են մեզ մեր բնակարաններից վտարման հետ: Բայց ՊՆ ներկայացուցիչն անգամ երեք հարցի պատրաստ չէր պատասխանել, թե ինչ նպատակով էր իջել մեզ հետ հանդիպելու, այդպես էլ չհասկացա: Ի դեպ, ՊԵԿ-ի աշխատակիցն ասում էր, թե սոցիալական ծառայությունների հարց են լուծել: Վստահեցնում եմ՝ հարց չեն լուծել, եթե դրա կարիքը կա, բանալիներից մեկը մեզ մոտ է, կարող ենք գնալ, նկարահանել, եւ կտեսնեք ինչ են առաջարկում:

— Ի՞նչ իրավիճակ է հիմա ՊՆ նախկին շենքերի տարածքում, որտեղից փաստացի հարյուրավոր ընտանիքների ոստիկանությունը վտարել է:

— Ոստիկանությունը 10 օր ջարդել ու ավերել է շենքերը: Բնակիչների կողմից նոր տեղադրված պատուհաններն են անգամ ջարդել: Այսպիսի պահվածքը բերելու է նրան, որ մեր պահանջը ավելի արմատական դառնա: Մեր հարցերից երկար խուսափել չի ստացվելու:

— Պարոն Խանզդադյան, ի՞նչ եք պատրաստվում անել հաջորդիվ:

— Մեր պահանջն անփոփոխ է, ոչ մի ժամանակավոր լուծում չենք ընդունելու, թող թույլ տան վերադառնալ մեր բնակարաններ՝ մինչեւ սկսենք  քննարկում՝ խնդրի վերջնական լուծման համար: Այս պայքարը միայն մերը չէ, այսօր ունենք բազում քաղաքացիներ, որոնք ունեն սոցիալական լրջագույն խնդիրներ, եւ պետությունը ոչ մի էական քայլ չի անում՝ այն թեթեւացնելու համար: Միայն կենացային մակարդակի խոսքեր են հնչում: Հետեւապես, մենք ակնկալում ենք, որ մեզ կաջակցեն բոլոր այն ՀՀ քաղաքացիները, ովքեր ունեն նմանատիպ խնդիրներ: Պետությունը պարտավոր է նեցուկ լինել իր քաղաքացիներին: Նիկոլ Փաշինյանն ասում էր, որ իր 3-րդ մասի տունը տվել է մի ընտանիքի, որը վարձով էր ապրում, հիմա նույն կարգավիճակում Հայաստանում կա 60-70 հազար ընտանիք, որոնք տուն չունեն ու ոչ էլ ի վիճակի են տուն վարձակալել:

Հիշեցնեմ, որ պետության որդեգրած քաղաքականությունը մեր հարցում այն էր, որ մարդկանց դուրս շպրտեց շենքից եւ երեք օր հետո միայն թույլատրվեց, որ գոնե մի վրանի տակ գիշերեն՝ այն էլ ԱԺ պատգամավորներ Գառնիկ Դանիելյանի եւ Քրիստինե Վարդանյանի միջնորդությամբ: Իսկ 7-8 գիշեր փողոցում անցկացնելուց հետո «Հանրային ձայն» կուսակցության խորհրդի նախագահ Արտակ Գալստյանը միջնորդեց, որ երկրորդ վրանը տեղադրվի: Այնպիսի տպավորություն է, թե ոստիկանությունն ակնկալում է, որ ամեն անգամ որեւէ քաղաքական ուժի ներկայացուցիչ մոտենա իրենց, որպեսզի թողնեն քաղաքացին իր բողոքի ակցիան անժամկետ նստացույցի միջոցով իրականացնի:

ՀՐԱՆՏ ՍԱՐԱՖՅԱՆ

Այս թեմայով Միշտ Ձեր կողքին ենք. ՀՀԿ ԵԿ շնորհավորանքը՝ ՀՀ երրորդ նախագահի ծննդյան 70-ամյակին Արամ Ասատրյանի դուստրը`Զվարթը, անչափ գեղեցկացել է. ինչ լուսանկարներ է նա հրապարակում ինստագրամում.StarNews ՍԿԱՆԴԱԼ. Ձախողված անձերը` իրենց բանսարկություններով ու շոգմոգություններով, ապաստան ու սփոփանք են գտնում վարչապետ դարձած նախկին լրագրողի ճենճահոտ գրկում․ եկեղեցական Արշակի «կրկին փորձիր»-ը Գուցե նոր չէ՞ ՀՀ քաղաքացիությունից Թանդիլյանի ամաչելը. ԶԱՐՄԱՆՔ