Թեկնածուները, որոնց անունները շրջանառվում են, որեւէ մեկի հետ չեմ գնա ընտրության. Վարդանյան

Տեւական ժամանակ խոսակցություններ են շրջանառվում քաղաքապետի արտահերթ ընտրությունների մասին: Իսկ թե ե՞րբ այն կանցկացվի՝ դեռեւս անհայտ է: «Իրավունքի» հետ զրույցում Երեւանի ավագանու անդամ ԹԵՀՄԻՆԱ ՎԱՐԴԱՆՅԱՆԸ նշել է, որ դեռեւս չունի նախընտրելի քաղաքապետի թեկնածու, քանի որ իր համար գոնե այս փուլում կա անվստահություն թեկանծուների առումով:

— Ինչպե՞ս կգնահատեք ներկայիս քաղաքապետի գործունեությունը եւ Երեւանում տարվող աշխատանքները:

— Ներկայիս քաղաքապետի աշխատանքը գնահատում եմ դրական, որովհետեւ՝ վստահաբար գիտեմ, որ անում է հնարավորինս, այսինքն՝ ինչ լիազորություններ ունի, ի գործ է դնում: Առնվազն նախկին քաղաքապետի նման չի գալիս սենյակում քնում, մինչդեռ նախկինում այդպես էր: Ինչ վերաբերում է քաղաքում տարվող աշխատանքներին, եւս գոհ եմ` չհաշված ընթացիկ թերությունները, որպես այդպիսին, եթե համեմատենք նախկինի հետ, գնահատականս ավելի քան բարձր է:

— «Հաղթանակի» կամրջի աշխատանքներն ինչպե՞ս են ընթանում, առաջիկայում ակնկալե՞նք աշխատանքների ավարտ:

— Աշխատանքներն ընթանում են, ես մի բան հիշեցնեմ, երբ փակվեց «Բարեկամության» էստակադան, նշվել էր՝ շուրջ 20-25 օր անց կավարտվեն աշխատանքները, բայց ավարտվեց 15 օր անց, այսինքն՝ արհեստական ձգձգումներ չեն լինում, հուսով եմ` «Հաղթանակի» կամուրջն էլ շուտ կբացվի, որովհետեւ իրապես խոչընդոտներ ու խցանումներ է առաջացնում:

— Իսկ թեքահարթակների հետ կապված՝ ինչ կասեք, մի՞թե տարիների պատմություն ունեցող խնդիրը լուծված է:

— Թեքահարթակների հետ կապված՝ վերջերս գրառում էի արել, երբ Ավինյանը գնացել էր Պրոսպեկտի շուկայի դիմացի գետնանցումը բացելու շռնդալից արարողությանը, այնտեղ թեքահարթակ չկար, հետո հայտարարվեց, հետագայում վերելակ է կառուցվելու: Ուզում եմ բոլորիս հիշեցնել, որ մեր նախկին գործընկերը` ավագանու անդամ էր դեռեւս այդ ժամանակ Բաթոյան Զարուհին, մեծ աղմուկ բարձրացրեց, որ ինքն իր սեփական սայլակով չէր կարողանում հասնել ավագանու նիստերի դահլիճ: Իսկ այն սայլակը, որը պատվիրված էր նրա համար քաղաքապետարանի կողմից, որպեսզի դրանով հնարավորություն ունենար աստիճան բարձրանալու, այդ աղջիկը չտեղափոխվեց եւ ասաց՝ ինչպես ուզում եք ապահովեք ավագանու նիստերի դահլիճ իմ մուտք գործելը: Խնդիրը սրա մասին է, մնացած բարձրաձայնումները թող արդեն իշխող կուսակցությունն անի, օրինակ՝ պատգամավոր Բաթոյան Զարուհին գնահատական տա, թող ԱԺ ամբիոնից խոսի դրա մասին:

— Առաջիկայում խոսակցություններ կան քաղաքապետի արտահերթ ընտրությունների մասին, ո՞ւմ հետ կգնաք ընտրության, ո՞վ կլինի քաղաքապետի Ձեր թեկնածուն:

— Այս պահի համար որեւէ մեկի հետ չեմ գնա, այն թեկնածուները, որոնց անունները շրջանառվում են, որեւէ մեկի հետ չեմ գնա:

— Ի՞նչն է պատճառը:

— Թերեւս վստահության պակասը:

— Հնարավո՞ր է կրկնվի Աժ արտահերթ ընտրությունների սցենարը, մի շարք ուժեր ձայներ փոշիացնեն, իսկ արդյունքում Տիգրան Ավինյանը դառնա քաղաքապետ:

— Մեր օրերում որեւէ բանի վրա կասկած անգամ չունեմ, վստահ չեմ որեւէ սցենարի վրա, այսինքն՝ այո, չի բացառվում, որ ԱԺ ընտրությունների սցենարը կրկնվի կամ` հակառակը: Երբ վերջանական թեկնածուները կգրանցվեն ԿԸՀ-ում, երբ ԿԸՀ-ն կհայտարարի հերթական կամ արտահերթ քաղաքապետի ընտրությունների օրը, այդ ժամանակ կարծիք կասեմ, հիմա լուրջ չեմ վերաբերվում որեւէ խոսակցության, որովհետեւ  վերջին երեք տարին այդ շրջապտույտի մեջ ինձ զանգ են տալիս լրագրողներ ու ասում, որ այ մյուս ամիս ասում են ավագանու ընտրություն է լինելու, լուրջ չեմ վերաբերվում:

Ս. ԱՍԱՏՐՅԱՆ