«Որդու պորտալարն ինքն է կտրել». A. Chilla-ն ներկա է եղել կնոջ ծննդաբերությանը

Ռեփեր, 3.33 խմբի անդամ A.Chilla-ն (Նարեկ Հովսեփյան) հայր է դարձել: Նա իր ֆեյսբուքյան էջում կիսվել է նորածին որդու լուսանկարով եւ կից գրառում կատարել. «Նայում եմ ապագայի աչքերին»:

Տղային անվանել են Վիլյամ Լուկա:

«Նա կրկնապատկել է մեր պատասխանատվությունը, էլ ավելի շատ սեր է լցրել մեր մեջ, ուրախությամբ ու մաքրությամբ է պատել սիրտս, մոռացել եմ աշխարհում տիրող անախորժությունների մասին: Ես եւ Chill-ն ավելի միասնական ենք՝ չնայած անքուն գիշերներին»,- BRAVO.am-ի հետ զրույցում պատմել է ռեփերի կինը՝ Լյուսի Արմենին:

Նա նաեւ նշել է, որ Նարեկը ծննդատանը ոչ մի վայրկյան իրեն միայնակ չի թողել. «Այդ դաժան ցավերի ժամանակ ձեռքս բռնած կողքիս է եղել, բալիկի պորտալարն էլ ինքն է կտրել: Զարմացել էի, թե ինչպես դիմացավ: Իր թե՛ ֆիզիկապես, թե՛ հոգեպես ներկայությունն ինձ համար բոլոր նվերներից առավել էր, չնայած՝ տանը գեղեցիկ պատրաստություն էին տեսել»:

Լյուսին անկեղծանում է, որ փոքրիկի հետ չեն էլ գիտակցում, թե ինչպես է օրն անցնում, նույնիսկ մոռանում են տնից դուրս գալու մասին. «Նարեկն ինձ հավասար հոգ է տանում երեխայի մասին. երբ ես եմ քնած, ինքն է զբաղվում բալիկով:
Շատ շնորհակալ եմ Աստծուն, որ ունեմ իրենց՝ երկուսին»:

Խոսելով առաջիկա անելիքների մասին՝ նկարիչ-դիզայներն ասել է. «Ծրագրերը կթելադրի Վիլյամ Լուկան: Բայց առայժմ մեր թե՛ ստեղծագործական, թե՛ անձնական կյանքը կապված է Երեւանի հետ: Ես գարնան վերջին պատրաստվում եմ իմ անհատական ցուցահանդեսին»:

Նշենք, որ արդեն մի քանի տարի է, ինչ ռեփերն ապրում եւ ստեղծագործում է հայրենիքում: Մինչ այդ A.Chilla-ն բնակվում էր ԱՄՆ-ում:

https://bravo.am/news/77202

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝