Երբ ոչ մի հայ չի մնա Արցախում եւ Հայաստանում՝ կսկսվի «խաղաղության դարաշրջան». Ադիբեկյան

Տեւական ժամանակ է ներկայիս իշխանությունները խոսում են «խաղաղության դարաշրջանի» մասին, պատրաստվում ստորագրել «խաղաղության պայմանագիր» Ադրբեջանի հետ, որի բովանդակությունը թերեւս հայ հասարակությունից հույժ գաղտնի է պահվում: «Իրավունքի» հետ զրույցում Ադրբեջանի հարցերով փորձագետ ԱՐՄԻՆԵ ԱԴԻԲԵԿՅԱՆԸ նշեց, որ Ալիեւը բավականին հստակ ներկայացրել է իր տեսլականը, որի արդյունքում ողջ հայությունը սեփական հողում այլեւս տեղ չի ունենալու:

— Ո՞րն է Ադրբեջանի ծրագիրը` Հայաստանի հետ կապված:

— Սյունիքը օտարվելու է հօգուտ Ադրբեջանի, ադրբեջանցիները վերադառնալու են Հայաստան, Արցախը օտարվում է հօգուտ Ադրբեջանի եւ դրա դիմաց սկսվելու է հայաթափում, ինչից հետո` երբ ոչ մի հայ չի մնա Արցախում եւ Հայաստանի Հանրապետությունում, կսկսվի «խաղաղության դարաշրջան»:

— Կարելի՞ է ենթադրել, որ Բերձորի միջանցքի փակ լինելը հենց այս ամենի նախաբանն է:

— Բերձորի միջանցքը փակ է, ու դա առաջին քայլն է Հայաստանի ոչնչացման ճանապարհին: Այս հարցի լուծումն ունի միայն ուժային ճանապարհ, բարի խոսքով, հորդորներով, բանաձեւերով, խնդրանքներով եւ պահանջներով հարցը չի լուծվի: Հայաստանը հանձնում է Սյունիքը Ադրբեջանին, եւ Ադրբեջանը Սիսիանի կողմերը անցակետ է դնում, ինչպես նաեւ Բերձորի ճանապարհին: Այսինքն՝ Մեղրի գնալու համար ես պետք է Ադրբեջանից թույլտվություն հարցնեմ, սա է իմաստը, եւ Ադրբեջանը ստանում է ցամաքային կապ Նախիջեւանի հետ ու իր զորքն է հսկում, որովհետեւ՝ այնտեղ հատուկ կետ կա, որ վերադարձող ադրբեջանցիների անվտանգությունը ապահովելու են ադրբեջանական զորքերը, ինչը նշանակում է, որ Թուրքիան ու Ադրբեջանը զորք են մտցնելու ՀՀ տարածք: Եվ բնական է, որ ամբողջ քաղաքականությունը տանելու է նրան, որ Սյունիքը հայաթափվի ու կարճ ժամանակահատվածում այնտեղ հաստատվեն ադրբեջանցիներ, ոչ միայն Սյունիքում, այլեւ՝ Տավուշում ու ամբողջ հայ-ադրբեջանական սահմանի երկայնքով ու այդ տարածքները կօտարվեն հօգուտ Ադրբեջանի:

— Այս ամենը «խաղաղության դարաշրջանի» դիմա՞ց:

— Այս ամենի դիմաց մենք ստանում ենք ՀՀ ոչնչացում, Ադրբեջանի ընկալմամբ` խաղաղությունը հնարավոր է մի պայմանով, Հայաստանի ու հայերի տարածաշրջանում չլինելով: Այս ամենից հետդարձ, իհարկե, ունենք, ինչը պահանջելու է լուրջ ռեսուրս ու լուրջ ժամանակ, եւ ոչ այս իշխանությունների հետ, որովհետեւ այս իշխանությունները զբաղված են Թուրքիայի ու Ադրբեջանի շահերը պաշտպանելով, նրանք ուրիշ գործառույթ չեն կատարում:

Ս. ԱՍԱՏՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝