Ունենք շատ լավ ծրագիր իմ վարպետին՝ Փայլակ Սարգսյանին նվիրված. Արման Ջուլհակյան

«Իրավունքը» զրուցել է բեմադրող ռեժիսոր, բալետմայստեր, Մայր Աթոռ Սուրբ Էջմիածնի եւ ՀԲԸՄ Նորքի հայորդյաց տան «Նարեկ» պարային դպրոցի գեղարվեստական ղեկավար ԱՐՄԱՆ ՋՈՒԼՀԱԿՅԱՆԻ հետ:

-Ներկա պահին ի՞նչ ծրագրեր ունեք:

-Տարին դեռ նոր է սկսվել ու աշխատում ենք նոր ծրագրերի վերաբերյալ: Ունենք շատ լավ ծրագիր իմ վարպետին՝ Փայլակ Սարգսյանին նվիրված: Նա շատ մեծ ավանդ ունի մեր ժողովրդական պարի մեջ: Ու հիմա աշխատում ենք նրա մեծարման երեկոյի վրա: Ամբողջ ծրագիրը նա է բեմադրել: Մարտի վերջին ունենալու ենք այդ համերգը: Բացի այդ, Global to Local  այսպիսի մի կազմակերպություն կա, որը զբաղվում է մարդասիրական գործունեությամբ՝ հաշմանդամ մարդկանց խնդիրների վերաբերյալ: Պատվիրել էին մեզ հաշմանդամության խնդիրները ներկայացնենք արվեստի լեզվով՝ ներկայացում բեմադրենք: Մենք բեմադրեցինք եւ հիմա նրանք արդեն ծրագրում են, որ այդ ներկայացումը պետք է առայժմ Հայաստանով մեկ շրջագայի: Նաեւ հիմա աշխատում ենք դրա վրա:

-Դուք ի՞նչ սկզբունքով եք ընտրում Ձեր սաներին:

-Մեր դպրոց ընդունվում են քննություն հանձնելով եւ ոչ բոլոր են կարողանում ընդունվել: Մեծ քաստինգի միջոցով ենք ընտրում մեր սաներին: Եվ ամեն կիսամյակը մեկ՝ անցկացնում ենք քննություն: Նրանք կարող է չորս, հինգ տարի սովորեն, բայց չտեղափոխվեն մյուս դասարան: Ընդհանուր դպրոցն ունի վեց դասարան, հետո տեղափոխվում են պահեստայի խումբ, որից հետո արդեն անհայտ է քանի ամիս կամ տարի իրենք կարող են այնտեղ աշխատել, նոր միայն տեղափոխվեն  «Նարեկ» պարային անսամբլ: Այսինքն՝ ամեն ինչ կախված է իրենց ընդունակություններից: Դպրոցն ունի 160 սան:

-Այսօր Արցախը գտնվում է շրջափակման մեջ ինչպիսի՞ն է Ձեր տեսակետն այս խնդրի վերաբերյալ:

- Իհարկե, շատ վատ եմ տանում Արցախի շրջափակումը: Եվ դրա վերաբերյալ ամենօրյա մտահոգություն ունեմ: Եվ ամեն օր ինքս ինձ հարց եմ տալիս՝ ինչո՞վ կարող եմ այդ ամեն ինչը փոխել: Ու եթե գտնեմ պատասխանն, անպայման ես կգործեմ: Մենք կապի մեջ ենք Արցախում գտնվող մեր պարային խմբերի եւ պարարվեստի ուսումնարանի հետ: Արցախի պարարվեստի դպրոցի տնօրենի հրավերքով պետք է մեկնեինք Արցախ՝  այնտեղ բեմադրություններ անելու, բայց, ցավոք, սկսվեց շրջափակումը եւ  չգիտենք՝ ինչքան կտեւի: Սակայն, հույս ունենք, որ այս ամեն ինչը շուտով կավարտվի եւ կկարողանանք մեր համագործակցությունը շարունակել:

ՆՈՒՆԵ ԶԱՔԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝