Կփորձենք ֆինանսական չարաշահումների բացահայտմանն ուղղված նախագահի հանձնարարականի մասով հնարավորինս արագ արդյունք ապահովել․ ԱՀ գլխավոր դատախազ

ԱՀ գլխավոր դատախազ Գուրգեն Ներսիսյանը Արցախի Հանրայինի եթերում անդրադարձել է նախագահ Արայիկ Հարությունյանի իրավապահ համակարգին իջեցված վերջին հանձնարարականին, որով երկրի ղեկավարը պահանջել է իրավապահներից սեղմ ժամկետներում ուսումնասիրել ՀԷԿ-աշինության ոլորտում կորուստների փոխհատուցման, ինչպես նաև Արցախի Ներդրումային և Գյուղի և գյուղատնտեսության աջակցության հիմնադրամների միջոցների հնարավոր փոշիացման և չարաշահման դեպքերը, դրանց տալ իրավական գնահատական և վերականգնել պետությանը հասցված վնասը։

Անդրադառնալով ՀԷԿ-աշինության ոլորտին, գլխավոր դատախազը, մասնավորապես նշել է, որ պատերազմից հետո մի շարք ՀԷԿ-եր մնացել են Ադրբեջանի կողմից օկուպացված տարածքներում, ժամանակին այդ ՀԷԿ-երի կառուցումը իրականացվել է վարկային միջոցներով, և պատերազմից հետո դրանց կորուստի պատճառով բանկային կայունության և բանկերի անխափան գործունեության հարց է առաջացել այդ վարկերի հետ կապված։

«ՀՀ-ի հետ նաև իրավական հարցեր առաջացան, և որոշվեց, որ ՀՀ կառավարությունը իր վրա կվերցնի վարկերի կատարման ֆինանսական ծանրաբեռնվածությունը, իսկ տեխնիկական մասը կիրականացվի Արցախի պետական մարմինների միջոցով։ Այս ֆոնին հանրության շրջանում սկսվեցին խոսակցություններ այն մասին, որ որոշ տնտեսվարողներ այնուամենայնիվ կարողացել են տարհանել այդ ՀԷԿ-երի շարժական կոնստրուկցիաները, սակայն դրանց դիմաց անհարկի փոխհատուցում են ստացել։

Խոսքը հարյուրավոր միլլիոն դրամների մասին է։ Այդ տեղեկությունների իսկությունը նախագահի հանձնարարությամբ իրավապահները սկսել են ուսումնասիրել։ Միևնույն ժամանակ տարօրինակ է, որ նման խոսակցությունների տիրաժավորման ֆոնին այս երկու տարվա ընթացքում իրավապահ համակարգին գեթ մեկ կոնկրետ դեպքով որևէ քաղաքացու կողմից հաղորդում չի ներկայացվել։ Եվ, օգտվելով առիթից, ես մարդկանց հորդորում եմ՝ նման տեղեկություն ունենալու դեպքում ներկայացնել դա իրավապահ մարմիններին»,- նշեց ԱՀ գլխավոր դատախազը։

Անդրադառնալով Արցախի Ներդրումային և Գյուղի ու գյուղատնտեսության հիմնադրամներից տնտեսավարողներին հատկացված փոխհատուցումների հնարավոր չարաշահման կամ փոշիացման մասին խոսակցություններին և այն մտայինությանը, որ այդ բոլոր «չարաշահումները» իրականացվում են ԱՀ բարձրագույն իշխանության հովանու ներքո, գլխավոր դատախազը պնդեց, որ որևէ հանգամանք չի կարող խոչընդոտ հանդիսանալ նման դեպքերի վերհանման և բացահայտման համար։

«Եթե կան փաստարկված տվյալներ ֆինանսական չարաշահումների և հանցագործությունների մասին, ապա միանշանակ հարուցվելու են քրեական գործեր և դրանում ոչ մի խոչընդոտ լինել չի կարող»,- պնդեց գլխավոր դատախազը։ Նա նաև հաղորդեց, որ նախագահի հանձնարարականի շուրջ արդեն սկսվել են համապատասխան գործողություններ։

«Կփորձենք հնարավորինս արագ արդյունք ապահովել իջեցված հանձնարարականով»,- խոստացավ գլխավոր դատախազը։

Հիշեցնենք, որ InfoPort.am-ի արցախյան աղբյուրները չէին բացառել ձեռնարկված միջոցառումների արդյունքում աղմկահարույց բացահայտումներ։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝