Ա՛յ ստահակներ, ուզում եք ասել, թե զոհված տղաները իրենք են իրենց գլխին սարքել եւ արդյունքում կենդանի այրվե՞լ. Նախկին փոխոստիկանապետը բացառիկ փակագծեր է բացում

Զինվորական կեցավայրում բռնկված հրդեհից տուժած երեք զինծառայողներից երկուսը շարունակում են շնչուղիների այրվածքներով մնալ վերակենդանացման բաժանմունքում, վիճակը գնահատվում է կայուն ծանր։ Փոքր-ինչ բարելավվել է նրանցից ժամկետային զինծառայող Լյովա Խառատյանի վիճակը, նա միացված է շնչառական սարքին: Քննչական կոմիտեից փոխանցում են՝ հարցաքննվել են տասնյակ զինվորականներ, քննությունը շարունակվում է։

Որքանո՞վ էր իրավաչափ դեպքից ժամեր անց կարգել մեղավորներ եւ գլխատել մի ողջ բանակային կորպուս, ինչքանո՞վ է պաշտոնական վարկածը իրատեսական հաշվի առնելով դեպքից հետո համացանց սփռդված կադրերը եւ սպայական կազմի հակասական ցուցմունքները: Այս եւ այլ հարցերի շուրջ զրուցել ենք ախկին փոխոստիկանապետ, Ոստիկանության գեներալ-մայոր Գագիկ Համբարձումյանի հետ, ով նախ նկատեց.

-Նախ մեկ վարկած ի սկզբանե առաջ քաշելը, իրավաբանության, կրիմինալոգիայի տարրական կանոնները իմացողի համար արդեն իսկ զավեշտալի է դառնում: Բոլորին ուսանող տարիներից սովորեցնում են , որ կատարված հանցագործությունների դեպքում մեկ վարկած չէ, որ պետք է առաջ քաշել: Առաջ են քաշվում տարբեր վարկածներ, իսկ հետաքննություննը եւ նախաքննությունը սկսվում է առավել ծանր դեպք նախատեսող վարկածներից: Առավելեւս այս պարագայում, երբ երկիրը գտնվում է տոտալ օկուպացման մեջ, երբ թշնամին այդ նույն զորամաս կոչեցված գոմից ընդամենը մետրերի հեռավորության վրա է գտնվում, երբ ամեն օր թիրախավորվում են բնակիչներն ու տեխնիկան,  առաջ քաշել ընդամենը մեկ վարկած եւ բեմականացված Կառավարության նիստ իրականացնել այդ վարկածը հանրությանը հրամցնելու համար` ոչ միայն զավեշտալի է, այլ հանացագործություն է: 

-Պարոն Համբարձումյան, ականատես լինելով դեպքին հաջորդող իրականությանը, ի՞նչ վարկածներ առաջ կքաշեիք Դուք, եթե ինքներդ վարեիք այս գործի քննությունը:

-Առաջին վարկածը, որ դա թշնամու կողմից իրականացված դիվերսիոն, ահաբեկչական ակտ էր, որովհետեւ, այսպես ասած, քթների տակ, գտնվում է թշնամին: Բայց, ինչ արեց Կառավարության «ղեկավար» կոչվածը, նա հայտարարած վարկածով, տպավորություն էր ստեղծվում, որ հովանավորում, քողարկում էր թշնամուն, եւ փոխարենը, սահմռկեցուցիչ դեպքը վերագրում` զոհված տղաներին, թե իրենք են, փաստորեն, իրենց գլխին սարքել եւ արդյունքում կենդանի այրվել: Չի կարելի երկիր թիվ մեկ պաշտոնը զբաղեցնողի մակարդակով հայտարարել պաշտոնական վարկած, ուղղորդելով քննչական մարմիններին, իսկ այն ինչ մենք տեսանք դասական ուղղորդման դեպք էր:

-Պարոն Համբարձումյան, առանց պատշաճ քննության բարձագույն զինվորականությանը ժամեր անց պաշտոններից ազատելը, որքանո՞վ է իրավաչափ:

-Նախ փաստեմ, որ այդ բարդակ իրավիճակը, այդ գոմը, որպես զորանոց օգտագործելը արդեն իսկ հանցագործություն է: Եթե անգամ տեսականորեն պատկերացնենք, որ որեւէ շարքային զինծառայողի անփութության հետեւանք էր, ինչո՞ւ պետք գլխատվեր մի ամբողջ բանակային կորպուս: Եթե բանակային կորպուսի հրամանատարին հանում եք մեղավոր, բա ա՛յ ստահակներ Դուք մեղավոր չե՞ք` գոմը զորանոցի վերածելու համար, բա բյուջեով նախատեսված 350 մլրդ.-ի կեսը, որ չեք իրացրել, ինչի՞ համար էիք պահում:

Զրույցը` ԻԼՈՆԱ ԱԶԱՐՅԱՆԻ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝