Ես չգիտեմ, որքան ու ոնց ենք դիմակայելու, բայց վստահ եմ՝ Ալիեւի երազանքը չի իրագործվելու․ ԱՀ պատգամավորը տոտալ շրջափակմանը դիմակայելու մասին

2022թ․ դեկտեմբերի 12-ից Ադրբեջանը փակել է Արցախը ՀՀ-ին կապող Լաչինի միջանցքը, ինչի հետևանքով շրջափակման մեջ է Արցախի 120 000 բնակիչ, այդ թվում՝ 30 000 երեխա։ 1100 քաղաքացիական անձ, այդ թվում՝ 270 անչափահաս, չի կարողանում ՀՀ-ից վերադառնալ Արցախ։

Թե ինչպես է հանգուցվածելու ստեղծված իրավիճակը դժվարանում է կանխատեսել ԱՀ ԱԺ պատգամավոր, մերօրյա անմահացած հերոսի՝ ԱՐՏՅՈՄ ԱՎԱԳՅԱՆԻ հայրիկը՝ ԱՐԵԳ ԱՎԱԳՅԱՆԸ, փոխարենը վստահեցնում է․

-Ժողովրդի կամքը անկորտրում է, չկա ընկճվածություն, դիմանալու ենք ինչքան որ անհրաժեշտ եղավ, բայց ծնկի չենք գալու Ալիեւի ու նրա վարչախմբի առաջ։

-Պարոն Ավագյան, հասարակական-քաղաքական շրջանակներում հնչում են տեսակետներ, որ Լաչինի միջանցքը կարող է բացվել բացառապես ուժի միջոցով։ Դուք նման սցենարի խաղարկում հնարավոր համարո՞ւմ եք։

-Տվյալ իրավիճակում՝ ոչ, ազգին հոգեբանորեն այն վիճակի են հասցրել, որ պատերազմի առայժմ պատրաստ չենք, թեեւ ոչ մի սցենար չի բացառվում։ Համենայնդեպս, առկա իրավիճակում ակնկալում ենք ռուս խաղաղապահների եւ միջազգային հանրության ակտիվ բանակցությունների միջոցով միջանցքի բացումը։ Թե ինչ զարգացումներ կարող են ընթանալ յուրաքանչյուր րոպե հետո՝ դժվար է կանխատեսել։

-Պարոն Ավագյան, լավ, որքա՞ն կդիմակայի արցախցին օր-օրի ահագնացող հումանիտար մարտահրավերներին։

-Ես չգիտեմ, որքան ու ոնց ենք դիմակայելու, բայց վստահ եմ՝ Ալիեւի երազանքը չի իրագործվելու, հումանիտար աղետով չի հաջողվելու եւ ոչ մի արցախցու մեջք կոտրել, արցախցուն խեղճացնելը անհնար է։ Ցանկացած արցախցի տարիներ շարունակ սեփական մաշկի վրա զգացել է ե՛ւ  պատերազմի ե՛ւ ցանկացած աղետի հետեւանքները, բայց ինչպես տեսնում եք դեռ կանք ու լինելու ենք։

ԻԼՈՆԱ ԱԶԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝