Մեծ հույս ունեմ, որ գոնե մեր թատրոնի 50 ամյակին վերանորոգման աշխատանքներն արդեն ավարտված կլինեն.ԺԻՐԱՅՐ ԴԱԴԱՍՅԱՆ
Մշակութային«Իրավունքը» զրուցել է ՀՀ արվեստի վաստակավոր գործիչ, Մնջախաղի պետական թատրոնի գեղարվեստական ղեկավար ԺԻՐԱՅՐ ԴԱԴԱՍՅԱՆՒ հետ:
- Եթե ամփոփենք Մնջախաղի թատերաշրջանը, այս ընթացքում ի՞նչ է արվել:
- Բեմադրվել է երկու նոր պրոյեկտ, որոնցից մեկը ՀՀ վաստակավոր արտիստ Յուրի Կոստանյաի բեմադրած «Արա Գեղեցիկ եւ Շամիրամ» առասպելի հիման վրա «Լեգենդի հետքերով» ներկայացումն է: Բոլորովին վերջերս եղավ, Լուիս Քերոլի Ալիսի մասին պատմող հեքիաթների հիման վրա բեմադրված մնջախաղային մանկական ներկայացման պրեմիերան, որը կոչվում է «Ալիսի երազում»: Շատ երեխաներ այցելում են դիտելու այդ ներկայացումը, որոնց արձագանքներից հասկանալի է, որ բավականին լավ է ընդունվել մեր փոքրիկ հանդիսատեսի կողմից:
- Իսկ Ամանորյա ներկայացումներ լինելո՞ւ են Մնջախաղի թատրոնում:
- Մենք երբեք Ամանորին ներկայացումներ չենք խաղում, որովհետեւ չունենք դահլիճը, որտեղ կարող ենք դա անել: Եվ սպասում ենք՝ երբ է մեր դահլիճը պատրաստ լինելու, որպեսզի արդեն սկսենք պատրաստվել նաեւ Ամանորյա ներկայացումներին:
- Պարեն Դադասյան, Մնջախաղի թատրոնի վերանորոգումը ե՞րբ կավարտվի:
- Աշխատանքները նորից վերսկսվել են: Եթե այսպես շարունակվի, երեւի մյուս տարի կավարտվի: Ես շատ ավելի մեծ հույս ունեմ, որ գոնե մինչեւ 2024 թվականին` մեր թատրոնի 50-ամյակին, վերանորոգման աշխատանքներն արդեն ավարտված կլինեն:
ՆՈՒՆԵ ԶԱՔԱՐՅԱՆ