Այս օրերին նրանց պահվածքը հերթական անգամ ապացուցում է, որ սա դավաճանների իշխանություն է. Մելիք-Շահնազարյան

«Իրավունքը» զրուցել է «Ոսկանապատ» վերլուծական կենտրոնի ղեկավար, քաղաքագետ ՀՐԱՆՏ ՄԵԼԻՔ-ՇԱՀՆԱԶԱՐՅԱՆԻ հետ:

— Մի քանի ամիս առաջ ՀՀ այցելեց ԱՄՆ Կենտրոնական հետախուզության վարչության ղեկավար Վիլիամ Բըրնսը, այնուհետեւ օրերս Երեւանում էր գաղտնի հետախուզության ծառայության ղեկավար Ռիչարդ Մուրը: Փաստացի այս ուժային կենտրոնները հետաքրքրված են Կովկասով, այս այցերը որեւէ կապ ունե՞ն այսօր ստեղծված իրավիճակի հետ: 

— Աշխարհը գտնվում է վերափոխման փուլում, ուժերի նոր կենտրոններ են ստեղծվում, նախկինները մրցակցում են միմյանց դեմ, եւ վերաբաշխվում են ազդեցության գոտիները: Կարծում եմ, որ ուժային կառույցների, հատկապես հատուկ ծառայությունների ղեկավարների տարածաշրջանային այցերը պայմանավորված են այդ վերափոխման գործընթացում մեր տարածաշրջանի կարեւորությամբ: Հարավային Կովկասը հանդիսանում է աշխարհաքաղաքական մրցակցության կարեւոր օջախ, կարեւոր կետ, որտեղ պատերազմներ են լինում, եւ նաեւ այդ ռիսկերը շարունակում են գոյություն ունենալ: Եվ բացի դրանից, իհարկե, մեծ կոմունիկացիոն հնարավորություն ունեցող տարածաշրջան է ՝ արեւելքը արեւմուտքի եւ հյուսիսը հարավի հետ կապող պոտենցիալով: Դրա համար բնական է, որ տարածաշրջանի համար պայքարն ավելի սաստիկ է լինելու, ավելի ընդգծված, եւ կարծում եմ, որ ուժային կառույցների ղեկավարների եւ հատկապես հատուկ ծառայությունների ներկայացուցիչների այցերը այստեղ առաջին հերթին պայմանավորված են աշխարհաքաղաքական մրցակցությամբ, որը մեր տարածքում է իրականացվում:

— Արցախի հարցը շարունակում է մնալ օդից կախված, ի՞նչ լուծումներ եք տեսնում Դուք, ռազմական գործողություններ հնարավո՞ր են:

— Ռազմական գործողությունները լուծում չեն: Վերջնական լուծումներ, իհարկե, դիվանագիտական դաշտում պետք է լինեն, բայց այս վիճակում ես կասեի, որ ոչ թե օդից է կախված Արցախի հարցը, այլ հայության համար մազից է կախված: Եթե Հայաստանը կամ Արցախը, եւ ընդհանրապես մեր ժողովուրդը վճռական չլինեն, ամեն գնով չպայքարեն Արցախի համար, ցավոք սրտի, մենք կորցնելու ենք ոչ միայն Արցախը, այլ նաեւ հնարավոր է Հայաստանի պետականությունը, եւ դա լուծում կոչել մեզ համար, իհարկե, հնարավոր չէ ոչ մի կերպ:

— Ի՞նչ է անում իշխանությունն այս ուղղությամբ:

— Իշխանությունն այս ուղղությամբ ոչինչ չի անում, այլ շարունակում է սպասարկել մեր թշնամու տարածաշրջանային, քաղաքական, աշխարհաքաղաքական եւ բոլոր տիպի շահերը: Բազմիցս խոսել եմ այն մասին, որ, ցավոք սրտի, սա դավաճանների իշխանություն է, եւ այս օրերին նրանց պահվածքը հերթական անգամ ապացուցում է այդ փաստը: Կարծում եմ, որ Հայաստանը երկար սպասելու ժամանակ չունի, եւ շտապ իշխանափոխություն է պետք ու ազգային իշխանություն, որպեսզի պաշտպանենք մեր տարածաշրջանային շահերը:

— ՄԱԿ-ում քննակվեց Բերձորի միջանցքի հարցը, ի՞նչ տպավորություններ ունեք, ի՞նչ արդյունք կարելի է ակնկալել:

— Այդ քննարկումներից ոչ մի արդյունք հնարավոր չէ ակնկալել: Ավելին ասեմ՝ շատ տագնապալի լուրեր հնչեցին այնտեղ, հատկապես Ռուսաստանի ներկայացուցչի ելույթում, որտեղ ասվում էր, որ իբրեւ մասնակի բաց է միջանցքը, եւ հիմա քննարկվում է Ադրբեջանցի պաշտոնյաների՝ արցախյան հանքեր մուտք գործելու մեխանիզմները: Այսինքն՝ եթե ճանապարհը պետք է բացվի՝ ադրբեջանցիներին այդ հանքեր մուտ գործելու հնարավորություններ տալով, ապա դա, իհարկե, նշանակում է ադրբեջանական կողմի եւս մեկ ձեռքբերում, եւ հայկական կողմի եւս մեկ կորուստ: Սա ինձ համար բացասական ազդակ է, եւ ես հույս ունեմ, որ հնարավոր կլինի իրավիճակը հանգուցալուծել՝ առանց մեր տնտեսական շահերին վնաս հասցնելու:

ԼԻԼԻԹ ՀԱՐՈՒԹՅՈՒՆՅԱՆ